စပိုက်ဒါမန်းရုပ်ရှင်ဝင်ငွေက ဇယားတွင် ထိပ်ဆုံးမှ ဦးဆောင်နေ

လော့စ်ဆန်းဂျလိစ်၊ ဩဂုတ် ၂ ရက်

Sony နှင့် Marvel တို့၏ စူပါဟီးရိုး ရုပ်ရှင်ဇာတ်ကား ဖြစ်သော “Spider-Man: Brand New Day” သည် ရုံတင်သည့် ပထမပတ် အားလပ်ရက်အတွင်း မြောက်အမေရိက ရုံဝင်ငွေ စာရင်း၌ အမေရိကန်ဒေါ်လာ ၃၅၅ သန်းခန့် ရရှိကာ ထိပ်ဆုံးနေရာတွင် ရပ်တည်နိုင်ခဲ့ကြောင်း Comscore က တနင်္ဂနွေနေ့က ထုတ်ပြန်သော အချက်အလက်များအရ သိရသည်။

အဆိုပါဇာတ်ကားရုံတင်ပြသမှုသည် ၂၀၁၉ ခုနှစ်က ဒေါ်လာ ၃၅၇ သန်းဖြင့် ရုံတင်ခဲ့သည့် Disney နှင့် Marvel တို့၏ “Avengers: Endgame” ရုပ်ရှင်ပြီးလျှင် ဟောလိဝုဒ် သမိုင်းတွင် ဒုတိယမြောက် ပြည်တွင်း ရုံဝင်ငွေ အများဆုံး ပထမပတ် ပြသမှုအဖြစ် စံချိန်တင်ခဲ့သည်။

နိုင်ငံတကာတွင်မူ “Spider-Man: Brand New Day” သည် ပထမပတ်၌ အမေရိကန်ဒေါ်လာ ၅၇၂ သန်း ရရှိခဲ့သည်။ မြောက်အမေရိက ရုံဝင်ငွေနှင့် ပေါင်းစပ်လိုက်ပါက အဆိုပါ ရုပ်ရှင်၏ ကမ္ဘာတစ်ဝန်း ပထမပတ် ရုံဝင်ငွေမှာ ဒေါ်လာ ၉၂၇ သန်းအထိ ရှိခဲ့ပြီး သမိုင်းတွင် ဒုတိယမြောက် ကမ္ဘာ့အကောင်းဆုံး ပထမပတ် ရုံတင်ပြသမှု ဖြစ်လာခဲ့သည်။

ရုပ်ရှင် ဝေဖန်သုံးသပ်မှုများ စုစည်းရာ Rotten Tomatoes ဝက်ဘ်ဆိုက်တွင် လက်ရှိအချိန်ထိ ဝေဖန်ရေးသမား ၃၂၀ ၏ သုံးသပ်ချက်များအပေါ် အခြေခံ၍ ထောက်ခံမှု ၉၀ ရာခိုင်နှုန်း ရရှိထားသည်။ စျေးကွက်သုတေသန လုပ်ငန်းဖြစ်သည့် CinemaScore ၏ ပရိသတ်စစ်တမ်းများတွင်လည်း “A+” မှ “F” အထိ သတ်မှတ်သည့် အဆင့်များအနက် အဆင့် “A” ရရှိခဲ့သည်။

Universal Pictures ၏ အက်ရှင်ရုပ်ရှင် “The Odyssey” ကမူ ၎င်း၏ တတိယမြောက် ပတ်တွင် ဒေါ်လာ ၅၁ သန်း ရရှိကာ ဒုတိယနေရာသို့ လျှောကျသွားခဲ့သည်။ ဒါရိုက်တာ ခရစ်စတိုဖာ နိုလန် ရိုက်ကူးပြီး ဟိုးမား ၏ ရှေးဟောင်း ဂရိ အာဇာနည် ကဗျာရှည်ကို အခြေခံထားသည့် အဆိုပါရုပ်ရှင်သည် မြောက်အမေရိက၌ ဒေါ်လာ ၃၉၅.၅ သန်းနှင့် ကမ္ဘာတစ်ဝန်း၌ ဒေါ်လာ ၉၁၁.၄ သန်း ရရှိထားပြီး ဖြစ်သည်။

Disney နှင့် Pixar တို့၏ အန်နီမေးရှင်း ရုပ်ရှင်ဇာတ်ကား “Toy Story 5” ကမူ ၎င်း၏ စတုတ္ထပတ်တွင် ဒေါ်လာ ၆.၃ သန်းဖြင့် တတိယနေရာ၌ ရပ်တည်ခဲ့သည်။ အဆိုပါရုပ်ရှင်သည် ပြည်တွင်း၌ စုစုပေါင်း ဒေါ်လာ ၄၆၁.၇ သန်းနှင့် ကမ္ဘာတစ်ဝန်းတွင် စုစုပေါင်း ဒေါ်လာ ၁.၀၆၆ ဘီလျံ ရရှိထားပြီး ဖြစ်သည်။

Ref: ဆင်ဟွာ