မြန်မာနိုင်ငံက စစ်ကိုင်းပြတ်ရွေ့ရဲ့ တောင်ပိုင်းအပိုင်းဟာ ခန့်မှန်းခြေ နှစ် ၁၀၀ လည်ပတ်မှုစက်ဝန်း ကုန်ဆုံးဖို့ နီးကပ်လာပြီဖြစ်တာကြောင့် အကယ်၍သာ အဲဒီကနေ အင်အားပြင်း ငလျင်လှုပ်ခတ်လာရင် ဘန်ကောက်မြို့အနေနဲ့ ပြင်းထန်တဲ့ အန္တရာယ်တွေနဲ့ ရင်ဆိုင်ရနိုင်တယ်လို့ ထိုင်းအင်ဂျင်နီယာတွေနဲ့ သဘာဝဘေးအန္တရာယ်ဆိုင်ရာ ကျွမ်းကျင်သူတွေက သတိပေးလိုက်ပါတယ်။
သောကြာနေ့က ထမ်မဆတ်(Thammasat) တက္ကသိုလ်မှာ ကျင်းပခဲ့တဲ့ “ရာသီဥတု မသေချာမရေရာတဲ့ခေတ်မှာ သဘာဝဘေးအန္တရာယ် ကြိုတင်ကာကွယ်ရေးအတွက် နည်းပညာပိုင်းဆိုင်ရာ ဖြေရှင်းချက်များ” ဆိုတဲ့ ဘာသာရပ်ပေါင်းစုံ ဆွေးနွေးပွဲမှာ ထိပ်တန်းသုတေသီတွေက အရင်ကလှုပ်ခဲ့တဲ့ ငလျင်တွေအပြီးမှာ ပြည်သူတွေနဲ့ စည်ပင်သာယာရေး အာဏာပိုင်တွေအနေနဲ့ ပေါ့ပေါ့ဆဆ မနေကြဖို့ သတိပေးခဲ့ပါတယ်။
အဲဒီ စစ်ကိုင်းပြတ်ရွေ့ တောင်ပိုင်းမှာ နောက်ဆုံး အင်အားပြင်းငလျင် လှုပ်ခတ်ခဲ့တာဟာ ရာမ ၇ ဘုရင်လက်ထက် လွန်ခဲ့တဲ့ ၉၆ နှစ်ခန့်က ဖြစ်တာကြောင့် မကြာခင်မှာ နောက်ထပ် အင်အားပြင်း ငလျင်တစ်ခု လှုပ်ခတ်လာနိုင်ဖွယ်ရှိတယ်လို့ ထိုင်းသိပ္ပံပညာရှင်တွေက သုံးသပ်ထားကြပါတယ်။
ဒီတောင်ပိုင်းစင်္ကြံတစ်လျှောက်ကနေ မြစ်ဖျားခံပြီး လှုပ်ခတ်လာမယ့် ငလျင်ဟာ အရင်လှုပ်ခဲ့တာတွေထက်စာရင် ဗဟိုချက်က ဘန်ကောက်မြို့နဲ့ အများကြီး ပိုနီးနေမှာဖြစ်ပါတယ်။ ဒါ့အပြင် မြို့တော်ရဲ့ ပျော့ပျောင်းပြီး တုန်ခါမှုအားကို ပိုပြင်းထန်စေနိုင်တဲ့ မြေပြင်အနေအထားဆီကို အရင်ကထက် အများကြီးပိုပြင်းထန်တဲ့ မြေပြင်တုန်ခါမှုတွေကို သက်ရောက်စေမှာပါလို့ သူတို့ကဆိုကြပါတယ်။
မြေပြင်တုန်ခါမှု ပြင်းအားဆိုတာဟာ ဘေးအန္တရာယ်ကြီးမားမှုကို ဆုံးဖြတ်တဲ့ အချက်တစ်ခုသာဖြစ်ပြီး မြို့ပြကြိုတင်ပြင်ဆင်မှုနဲ့ အဆောက်အအုံတွေရဲ့ ကြံ့ခိုင်မှုကသာ အဓိကကျတယ်ဆိုတာကို ထမ်မဆတ်တက္ကသိုလ် အင်ဂျင်နီယာမဟာဌာနက ပါမောက္ခ ဒေါက်တာ နခွန်း ပူဗာရိုဒွန်က အထူးပြု ပြောကြားခဲ့ပါတယ်။
အတိတ်က ဖြစ်ရပ်တွေနဲ့ နှိုင်းယှဉ်ပြရင်း၊ ၂၀၂၆ ခုနှစ် ဇူလိုင်လက ဂျပန်နိုင်ငံ၊ ကူမာမိုတိုမှာ လှုပ်ခတ်ခဲ့တဲ့ ငလျင်ဟာ အမြင့်ဆုံး မြေပြင်အရှိန် (PGA) ၂.၄ အထိ ရှိခဲ့ပေမယ့် အခြေခံအဆောက်အအုံတွေ ခိုင်မာမှုရှိတာကြောင့် လူအသေအပျောက် ဆယ်ဂဏန်းလောက်သာ ရှိခဲ့တယ်လို့ ပါမောက္ခ ဒေါက်တာ နခွန်းက မှတ်ချက်ပြုခဲ့ပါတယ်။
ပြောင်းပြန်အားဖြင့်၊ ၂၀၂၅ ခုနှစ် မတ်လ ၂၈ ရက်နေ့က မြန်မာနိုင်ငံ၊ မန္တလေးမြို့အနီးကို ဗဟိုပြုလှုပ်ခတ်ခဲ့တဲ့ ငလျင်မှာတော့ ဘန်ကောက်မြို့မှာ PGA တန်ဖိုး ၀.၀၂ သာရှိခဲ့ပြီး (ဂျပန်ငလျင်ထက် အဆတစ်ရာကျော် ပိုအားနည်းပေမယ့်) မြို့ပြဧရိယာတစ်ဝိုက်မှာ လူရာနဲ့ချီ သေဆုံးခဲ့ရပါတယ်။
ဒါကြောင့် ငလျင်ဒ-ဏ်ခံနိုင်တဲ့ အဆောက်အအုံ စည်းမျဉ်းစည်းကမ်းတွေကို ဥပဒေအရ တင်းတင်းကြပ်ကြပ် စည်းကြပ်ဖို့ သူက တောင်းဆိုခဲ့ပြီး၊ အိမ်ခြံမြေ ဝယ်ယူမယ့်သူတွေနဲ့ အိမ်ငှားတွေအနေနဲ့ အထပ်မြင့်အဆောက်အအုံတွေမှာ မနေထိုင်ခင် အဆောက်အအုံရဲ့ ကြံ့ခိုင်ဘေးကင်းရေးဆိုင်ရာ အထောက်အထားတွေကို တက်တက်ကြွကြွ တောင်းဆိုကြဖို့လည်း တိုက်တွန်းခဲ့ပါတယ်။