မကွေးတိုင်းဒေသကြီး၊ စကုမြို့ရှိ အခြေခံပညာနှင့် စက်မှု၊ စိုက်ပျိုး၊ မွေးမြူရေး အထက်တန်းကျောင်း၌ ၂၀၂၆-၂၀၂၇ ပညာသင်နှစ်အတွက် ကျောင်းသား/သူ စုစုပေါင်း ၂၀၈ ဦး တက်ရောက်ပညာသင်ကြားလျက်ရှိကြောင်း သိရသည်။
ကျောင်း၏ ပထမနှစ် Grade-10 တွင် စက်မှုဘာသာရပ် ၂၇ ဦး၊ စိုက်ပျိုးရေးဘာသာရပ် ၇ ဦးနှင့် မွေးမြူရေးဘာသာရပ် ၃ ဦး တက်ရောက်လျက်ရှိသည်။ ဒုတိယနှစ် Grade-11 တွင် စက်မှုဘာသာရပ် ၄၆ ဦး၊ စိုက်ပျိုးရေးဘာသာရပ် ၂၅ ဦးနှင့် မွေးမြူရေးဘာသာရပ် ၁၃ ဦး တက်ရောက်လျက်ရှိပြီး တတိယနှစ် Grade-12 တွင် စက်မှုဘာသာရပ် ၄၉ ဦး၊ စိုက်ပျိုးရေးဘာသာရပ် ၂၂ ဦးနှင့် မွေးမြူရေးဘာသာရပ် ၇ ဦး တက်ရောက်သင်ကြားလျက်ရှိကြောင်း သိရသည်။
အခြေခံပညာနှင့် စက်မှု၊ စိုက်ပျိုး၊ မွေးမြူရေး အထက်တန်းကျောင်းများကို မြန်မာနိုင်ငံတစ်ဝှမ်းတွင် ဖွင့်လှစ်သင်ကြားလျက်ရှိပြီး ကျောင်းသား၊ ကျောင်းသူများအား စက်မှု၊ စိုက်ပျိုးရေးနှင့် မွေးမြူရေး မေဂျာဘာသာရပ်များအပြင် အခြေခံပညာသင်ရိုးများကိုလည်း သင်ကြားပေးလျက်ရှိသည်။
အဆိုပါကျောင်းများတွင် သုံးနှစ်တာကာလအတွင်း စာတွေ့နှင့် လက်တွေ့ပေါင်းစပ်သင်ကြားမှုစနစ်ဖြင့် လုပ်ငန်းခွင်အသင့်ဖြစ်စေမည့် သင်ရိုးညွှန်းတမ်းများကို အသုံးပြုကာ သက်ဆိုင်ရာဘာသာရပ်အလိုက် ကျွမ်းကျင်နည်းပြ ဆရာ၊ ဆရာမများက စနစ်တကျ သင်ကြားပေးလျက်ရှိကြောင်း သိရသည်။
ထို့ပြင် ကျောင်းပြီးဆုံးအောင်မြင်သည့် ကျောင်းသား/သူများအနေဖြင့် သတ်မှတ်ထားသည့် တက္ကသိုလ်နှင့် ကောလိပ်များသို့ ဆက်လက်တက်ရောက်ပညာသင်ကြားနိုင်မည့်အပြင် သက်မွေးဝမ်းကျောင်းဆိုင်ရာ အလုပ်အကိုင်အခွင့်အလမ်းများကိုလည်း ပိုမိုရရှိနိုင်မည်ဖြစ်ကြောင်း သိရသည်။
