ဂျပန်မြောက်ပိုင်းမှာတောမီးလောင်၊ရာနှင့်ချီ၍လူများရွှေ့ပြောင်းရ

ဂျပန်နိုင်ငံမြောက်ပိုင်းတွင် တောမီးလောင်ကျွမ်းမှုကြောင့် အဆောက်အအုံ ၈၀ ကျော် ပျက်စီးခဲ့ပြီး ဒေသခံ ပြည်သူများကို ရာနှင့်ချီ၍ ဘေးလွတ်ရာသို့ ရွှေ့ပြောင်းစေခဲ့ကြောင်းနှင့် စစ်ဘက်ရဟတ်ယာဉ်များကို စေလွှတ်၍ မီးငြိမ်းသတ်ရာတွင် ကူညီဆောင်ရွက်နေကြောင်း အာဏာပိုင်များက ဖေဖော်ဝါရီ ၂၇ တွင် ပြောကြားသည်။

Iwate ဒေသရှိ သစ်တောထူထပ်သော Ofunato မြို့တွင် မီးတောက်မီးလျှံများကြောင့် လူနေအိမ်များစွာသည် သံဖရိန်များအတိုင်းသာ ကျန်တော့သည်အထိ မီးကျွမ်းသွားခဲ့သည်ကို အင်န်အိပ်ချ်ကေသတင်းဌာန၏ ဝေဟင်မှ ရိုက်ကူးထားသော ဗီဒီယိုတွင် တွေ့ရသည်။

တောမီးအနီးနေထိုင်ကြသော ဒေသခံ ၆၀၀ နီးပါးကို ဘေးလွတ်ရာ ရွှေ့ပြောင်းပေးထားပြီး ထိခိုက်ဒဏ်ရာရရှိမှုများနှင့် ပတ်သက်၍ အတည်မပြုနိုင်သေးကြောင်း ဒေသဆိုင်ရာ အုပ်ချုပ်ရေးအဖွဲ့က ပြောဆိုသည်။

မီးလောင်မှုကြောင့် ဖေဖော်ဝါရီလ ၂၇ ရက် မနက်ပိုင်းအထိ အဆောက်အအုံ ၈၄ ခု ထက်မနည်း ပျက်စီးခဲ့သည်ဟု မြို့တာဝန်ရှိသူများက ပြောဆိုခဲ့ပြီး ကိုယ်ပိုင်ကာကွယ်ရေးတပ်ဖွဲ့သည် တောမီးကို ဝေဟင်မှ ငြိမ်းသတ်နိုင်ရန် ကြိုးပမ်းနေကြောင်း သိရသည်။

ဖေဖော်ဝါရီ ၂၆ ရက်ညနေပိုင်းတွင် တောမီးလောင်ကျွမ်းမှုသည် ပမာဏကြီးမားပြီး မိုနာကိုမြို့ အကျယ်အဝန်း၏ သုံးဆခန့်ဖြစ်သော မြေဧရိယာ ဟက်တာ ၆၀၀ ဝန်းကျင် လောင်ကျွမ်းခဲ့ပြီဖြစ်ကြောင်း Ofunato မြို့တော်ဝန် ကီယိုရှီ ဖူချီဂါမီက ပြောဆိုသည်။

တောမီးလောင်ရသည့် အကြောင်းရင်းကို မသိရသေးကြောင်းကိုလည်း ၎င်းက ပြောကြားခဲ့သည်။

ဂျပန်နိုင်ငံတစ်ဝန်းတွင် ၂၀၂၃ ခုနှစ်က တောမီးလောင်ကျွမ်းမှု ၁,၃၀၀ ခန့်ဖြစ်ပွားခဲ့ပြီး လေပူ လေပြင်းများတိုက်ခတ်သော ဖေဖော်ဝါရီလမှ ဧပြီလအထိကာလသည် တောမီးလောင်ကျွမ်းမှု ပြင်းထန်လေ့ရှိသည်။

Ref: သည်စထရိတ်တိုင်းမ်စ်