ရန်ကုန်၊ ဩဂုတ် ၄
အာဆီယံဟွန်ဒိုင်းဖလားပြိုင်ပွဲအုပ်စု (B) ပွဲစဉ်အဖြစ် မြန်မာအသင်းနှင့် လာအိုအသင်းတို့သည် ဩဂုတ် ၄ ရက် (ယနေ့) ညနေ ၄ နာရီခွဲတွင် ရန်ကုန်မြို့ရှိ သုဝဏ္ဏကွင်း၌ ယှဉ်ပြိုင်ကစားကြမည် ဖြစ်သည်။
မြန်မာအသင်းအနေဖြင့် အဆိုပါပွဲစဉ်တွင် ဂိုးပြတ်အနိုင်ကစားမှသာ အုပ်စုအဆင့်မှ ဆီမီးဖိုင်နယ်သို့ တက်လှမ်းနိုင်ရေး မျှော်လင့်ချက် ရှိမည်ဖြစ်သည်။
မြန်မာအသင်းသည် ပြီးခဲ့သည့် အုပ်စုပွဲစဉ်များတွင် မလေးရှားအသင်းကို ရှုံးနိမ့်ခဲ့သော်လည်း ဖိလစ်ပိုင်အသင်းကို အနိုင်ရယူထားနိုင်ခဲ့သည်။ ထို့ကြောင့် ဆီမီးဖိုင်နယ် တက်ရောက်နိုင်ရေးအတွက် လာအိုအသင်းကို အနိုင်ရလဒ်တစ်ခုတည်းဖြင့် မလုံလောက်ဘဲ ဂိုးကွာခြားချက် အသာရရှိစေရန် ဂိုးများများ သွင်းယူနိုင်ရေး အစွမ်းကုန် ကြိုးစားကစားရမည်ဖြစ်သည်။
အဆိုပါနှစ်သင်း နောက်ဆုံးတွေ့ဆုံခဲ့သည့် ၂၀၂၄ AFF ချန်ပီယံရှစ် ပြိုင်ပွဲတွင် မြန်မာအသင်းက ၃ ဂိုး – ၂ ဂိုးဖြင့် လာအိုအသင်းကို အနိုင်ရရှိထားသည်။
တစ်ဖက်တွင် လာအိုအသင်းသည် အုပ်စုပွဲစဉ်များ၌ ထိုင်းအသင်းကို ၅ ဂိုး – မရှိ၊ မလေးရှားအသင်းကို ၄ ဂိုး – မရှိ၊ ဖိလစ်ပိုင်အသင်းကို ၄ ဂိုး – ၁ ဂိုး ရလဒ်များဖြင့် ၃ ပွဲဆက်တိုက် ဂိုးပြတ်ရှုံးနိမ့်ကာ ပြိုင်ပွဲမှ ထွက်ခွာခဲ့ရပြီးဖြစ်သည်။ ထို့ကြောင့် ယနေ့ မြန်မာအသင်းနှင့် ယှဉ်ပြိုင်ရမည့် ပွဲစဉ်သည် လာအိုအသင်းအတွက် နောက်တစ်ဆင့်တက်ရေး ဖိအားမရှိဘဲ ယှဉ်ပြိုင်ရမည့် ပွဲတစ်ပွဲသာ ဖြစ်သည်။
လက်ရှိ အုပ်စု (B) ရမှတ်ဇယားတွင် ထိုင်းအသင်းက ၂ ပွဲကစား ၆ မှတ်ဖြင့် အုပ်စုပထမ၊ မလေးရှားအသင်းက ၃ ပွဲကစား ၆ မှတ်ဖြင့် အုပ်စုဒုတိယနှင့် မြန်မာအသင်းက ၂ ပွဲကစား ၁ ပွဲနိုင် ရမှတ် ၃ မှတ်ဖြင့် အုပ်စုတတိယနေရာတို့တွင် ရပ်တည်နေကြောင်း သိရသည်။
