ကမ္ဘောဒီးယားနိုင်ငံ ချန်ပီယံအသင်းဖြစ်သည့် Svay Rieng FC အသင်းနှင့် မြန်မာနိုင်ငံ ချန်ပီယံအသင်း ရှမ်းယူနိုက်တက်အသင်းတို့ ယမန်နေ့ ဖေဖော်ဝါရီ(၅)ရက် ည(၇)နာရီအချိန်က ယှဉ်ပြိုင်ကစားကြရာ ရှမ်းယူနိုက်တက်အသင်းမှာ (၄)ဂိုး (၂)ဂိုးဖြင့် ရှုံးနိမ့်ခဲ့သည်။
ယနေ့ ယှဉ်ပြိုင်ကစားမှုသည် Asean Club Championship Shopee Cup အုပ်စုပွဲစဉ်တစ်ခုဖြစ်ပြီး ကမ္ဘောဒီးယား နိုင်ငံ National Olympic Stadium ကွင်းအတွင်းယှဉ်ပြိုင်ကစားခဲ့ကြခြင်းဖြစ်သည်။
ပွဲစဉ်ပထမပိုင်းအချိန်တွင် Svay Rieng FCအသင်းက (၃)ဂိုး (၁)ဂိုးဖြင့် ဦးဆောင်နေပြီး ၊ ဒုတိယပိုင်းပွဲချိန်တွင် (၄)ဂိုး (၂) ဂိုးဖြင့် အနိုင်ရလဒ်ထွက်ပေါ်ခဲ့ခြင်းဖြစ်သည်။
ရှမ်းယူနိုက်တက်၏ ယနေ့ ပွဲထွက်လူစာရင်းအရ မက်ခ်ဆာကီက အသင်းခေါင်းဆောင်အဖြစ် ပြည့်ဖြိုးသူ၊ ဇွဲခန့်မင်း၊ သက်ဟိန်းစိုး၊ နန္ဒကျော်၊ ကျော်ကိုကို၊ ဟိန်းဖြိုးဝင်း၊ အောင်ဝဏ္ဏစိုး၊ ခွန်ကျော်ဇင်ဟိန်း၊ မျိုးကိုထွန်းနှင့် ရဲရင့်အောင်တို့ ကစားခဲ့ကြသည်။
လက်ရှိ Asean Club Championship Shopee Cup ပွဲစဉ်တစ်လျောက် Svay Rieng FC အသင်းသည် အုပ်စု(အေ)၏ အဆင့်(၅)နေရာ၌ ရမှတ် (၄)မှတ်ဖြင့် ရပ်တည်လျက်ရှိပြီး ရှမ်းယူနိုက်တက်အသင်းမှာ ရမှတ်မရရှိသေးဘဲ အုပ်အောက်ဆုံး အဆင့်(၆)နေရာ၌ ရပ်တည်လျက်ရှိသည်။
Svay Rieng FC အသင်းနှင့် ရှမ်းယူနိုက်တက်အသင်းသည် လာမည့် မတ်လ AFC Challenge League ကွာတားဖိုင်နယ်၌ ထပ်မံတွေ့ဆုံရမည်ဖြစ်ပြီး၊ ယခု Asean Club Championship Shopee Cup ပြိုင်ပွဲတွေ့ဆုံမှုသည် ပြိုင်ဘက်အသင်း (၂)သင်း၏ ပထမအကြိမ်တွေ့ဆုံမှုလည်းဖြစ်သည်။