MNL League Cup 2025 ချန်ပီယံဆုရရှိခဲ့သည့် ရန်ကုန်ယူနိုက်တက်အသင်းအား အသင်းပိုင်ရှင်၊ ဥက္ကဋ္ဌ နှင့် မိတ်ဖက်ကုမ္ပဏီများမှ သိန်းပေါင်း (၁,၇၁၇) သိန်းပေးအပ် ချီးမြှင့်ခဲ့ကြောင်း သိရသည်။
ရန်ကုန်ယူနိုက်တက်အသင်းသည် MNL League Cup ဗိုလ်လုပွဲစဉ်တွင် ရှမ်းယူနိုက်တက်အသင်းကို တစ်ဂိုး ဂိုးမရှိဖြင့် အနိုင်ရရှိခဲ့ခြင်း ဖြစ်သည်။
ရန်ကုန်ယူနိုက်တက် အသင်းသည် ပြိုင်ပွဲတလျှောက် စုစုပေါင်း (၇) ပွဲယှဉ်ပြိုင်ကစားခဲ့ပြီး ပွဲစဉ်တစ်လျှောက်ရှုံးပွဲမရှိစံချိန်ကို ရယူနိုင်ခဲ့ခြင်းဖြစ်သည်။
ချန်ပီယံ ဖြစ်ခဲ့သည့် ရန်ကုန်ယူနိုက်အသင်းသည် တစ်ဦးချင်းရွှေတံဆိပ်ဆု၊ ဆုကြေးငွေကျပ်သိန်း (၃၅၀)နှင့် ချန်ပီယံဆုဖလားတို့ကိုလည်း ရရှိခဲ့ပြီး ဖြစ်သည်။
MNL League Cupကို မြန်မာနေရှင်နယ်လိဂ် ကော်မတီအနေဖြင့် ၂၀၂၄ -၂၀၂၅ ရာသီမှ စတင်ကာ ကမ္ဘာ့ဘောလုံးအဖွဲ့ချုပ်(FIFA)နှင့် အာရှဘောလုံးအဖွဲ့ချုပ် (AFC) တို့မှ သတ်မှတ်ထားသည့် ဘောလုံးပြက္ခဒိန်အတိုင်း ပြောင်းလဲကျင်းပလျက်ရှိခြင်းကြောင့် ပြိုင်ပွဲဝင်အသင်းများ လိဂ်ပြိုင်ပွဲအကြိုပြင်ဆင်မှု ပြုလုပ်နိုင်ရန်နှင့် ကစားသမားများပြိုင်ပွဲပြတ်လပ်မှု မရှိစေရန် MNL League Cup ပြိုင်ပွဲကို ပြိုင်ပွဲသစ်တစ်ခုအနေဖြင့် ၂၀၂၄ ခုနှစ်တွင် စတင်ကျင်းပခဲ့ခြင်းလည်း ဖြစ်သည်။