ပြည်တွင်း စားသောက်ကုန်ဈေးကွက်တွင် ကြက်သွန်ဖြူ တစ်ပိဿာ ၁၀၀၀၀ ကျပ်ကျော်အထိ မြင့်တက်လာကြောင်း ကြက်သွန်ဖြူရောင်းဝယ်ရေးလုပ်ကိုင်သူများထံမှ သိရသည်။
လက်ရှိတွင် တရုတ်နိုင်ငံဘက်မှ တင်သွင်းနေသည့် တရုတ်ကြက်သွန်ဖြူ (ကြူကုတ်) သည် ပြည်တွင်းစျေးကွက်အတွင်း ဝင်ရောက်မှုနည်းနေသည့်အတွက် ကြူကုတ်စျေးလည်း မြင့်တက်လာပြီး ပြည်တွင်းထွက် ကြက်သွန်ဖြူစျေးသည်လည်း ယခင်ကထက် ပိုမိုမြင့်တက်လာနေကြောင်း ကုန်သည်များ၏ ပြောပြချက်အရ သိရသည်။
“ကြူကုတ်က အဝင်နည်းလို့တက်တာ။ ခုရက်ဆို ၆၉၀၀ လောက် ဖြစ်တယ်။ တရုတ်က အဝင်နည်းနေလို့ပါ။ တင်သွင်းရတာ အခက်အခဲရှိနေတာပေါ့။ ရှမ်းတွေက နည်းနည်းပြန်ကျတဲ့ သဘောရှိပေမယ့် အကြီးဆိုရင် ၈၃၀၀ ရှိနေသေးတယ်။ မနှစ်က အများဆုံးစျေးကမှ ၅၀၀၀ တောင်မရှိဘူး။ အခုက တအားကို မြင့်နေတာပေါ့။ လက်လီကတော့ ချက်ချင်းမကျဘူး။ ၃ ရက်လောက်နေမှပဲ ချရောင်းကြတာ” ဟု ရန်ကုန်ဘုရင့်နောင်ကုန်စည်ဒိုင်မှ တာဝန်ရှိသူတစ်ဦးက ပြောကြားသည်။
လက်ရှိတွင် တရုတ်ကြက်သွန်ဖြူသည် ရန်ကုန်ကုန်စည် ဒိုင်ပေါက်စျေးအနေဖြင့် တစ်ပိဿာလျှင် ကျပ် ၇၀၀၀ ဝန်းကျင်သာရှိသော်လည်း ပြင်ပလက်လီစျေးကွက်တွင် ကျပ် ၉၀၀၀ အထိရှိနေကြောင်းနှင့် ရှမ်းပြည်ထွက်ကြက်သွန်ဖြူသည် ကုန်စည်ဒိုင်စျေးတွင် ကျပ် ၈၅၀၀ ဝန်းကျင်ရှိပြီး လက်လီစျေးကွက်၌ တစ်ပိဿာလျှင် ကျပ် ၁၀၀၀၀ ကျော်အထိ စျေးနှုန်းရှိနေကြောင်းသိရသည်။
ပြီးခဲ့သည့် ဇွန်လအတွင်းက တရုတ်ကြက်သွန်ဖြူ တစ်ပိဿာလျှင် လက်လီစျေးကွက်၌ ကျပ် ၇၀၀၀ မှ ၈၀၀၀ စျေးရှိပြီး ရှမ်းကြက်သွန်ဖြူစျေးနှုန်းမှာ ကျပ် ၈၀၀၀ မှ ၉၀၀၀ ဝန်းကျင်ရှိခဲ့ကြောင်းသိရသည်။
ကြက်သွန်ဖြူကို ပြည်ပတင်ပို့မှုအနေဖြင့် တစ်နှစ်ကို တန်ချိန် ၃၀၀၀၀ ဝန်းကျင်တင်ပို့မှုရှိကြောင်း၊ အများဆုံးတင်ပို့မှုသည် တာချီလိတ် ကုန်သွယ်ရေးစခန်းမှတဆင့် တင်ပို့နေခြင်းဖြစ်ကြောင်း သိရသည်။
ကြက်သွန်ဖြူကို ပြည်တွင်းစိုက်ပျိုးမှုအနေဖြင့် ရှမ်းပြည်နယ်တွင် နှစ်စဉ်စိုက်ပျိုးဧက သောင်းနှင့်ချီ စိုက်ပျိုးလေ့ရှိပြီး အဓိကအနေဖြင့် အောင်ပန်း၊ တောင်ကြီးမြို့နယ်၊ ပင်လောင်းမြို့နယ်နှင့် ဟိုပုံးတို့တွင် အများဆုံးစိုက်ပျိုးကြပြီး ကျန်မြို့နယ်များတွင် အနည်းငယ်စိုက်ပျိုးမှုရှိကြောင်း သိရသည်။
ကြက်သွန်ဖြူကို နှစ်စဉ်အောက်တိုဘာလနှင့် နိုဝင်ဘာလများတွင် စတင်စိုက်ပျိုးလေ့ရှိပြီး ဖေဖေါ်ဝါရီလနှင့် မတ်လတွင် သီးနှံစတင်ရိတ်သိမ်းလေ့ရှိကြောင်း သိရသည်။
