ကံကြီးဝရေလွှဲဆည် အမြန်ပြုပြင်ပေးရန် လွှတ်တော်တွင် တင်ပြ၊ ၂၀၂၇-၂၀၂၈ ဘဏ္ဍာနှစ်၌ ရန်ပုံငွေတောင်းခံ ဆောင်ရွက်မည်

စစ်ကိုင်းတိုင်းဒေသကြီး၊ တမူးမြို့နယ်ရှိ တောင်သူများ၏ စိုက်ပျိုးရေအတွက် အဓိကအားထားနေရသော ကံကြီးဝရေလွှဲဆည်ကို အမြန်ဆုံး အကြီးစားပြုပြင်ဆောင်ရွက်ပေးရန် အစီအစဉ်ရှိ/မရှိနှင့်ပတ်သက်၍ တမူးမဲဆန္ဒနယ် ပြည်သူ့လွှတ်တော်ကိုယ်စားလှယ် ဦးအောင်ကိုလတ်က တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး (၁၇) ရက်မြောက်နေ့တွင် မေးမြန်းတင်ပြခဲ့ကြောင်း သိရသည်။

ကံကြီးဝရေလွှဲဆည်သည် တမူးမြို့ရှိ အကျိုးပြုစိုက်ဧရိယာ ၈၃၅ ဒသမ ၂၄ ဧကအတွက် အဓိကရေပေးဝေသည့် ဆည်ဖြစ်ပြီး တမူးမြို့ရှိ အိမ်ထောင်စု ၁၃,၀၀၀ နီးပါးနှင့် လူဦးရေ ၆၃,၀၀၀ ကျော်အနက် အများစုမှာ လယ်ယာစိုက်ပျိုးရေးကို အဓိကလုပ်ကိုင်နေကြသည့် တောင်သူများဖြစ်ကြောင်း ကိုယ်စားလှယ်က ပြောကြားသည်။

၂၀၂၃ ခုနှစ် ဩဂုတ်လအတွင်း မိုးသည်းထန်စွာ ရွာသွန်းမှုကြောင့် ဆည်ကျိုးပေါက်ပျက်စီးခဲ့ပြီး စိုက်ပျိုးရေပြတ်လပ်မှုများ ဖြစ်ပေါ်ခဲ့ကြောင်း၊ ၂၀၂၄ ခုနှစ်တွင် တောင်သူများက ကိုယ်ထူကိုယ်ထစနစ်ဖြင့် ငွေကျပ် ၄၅၇ သိန်းခန့် အသုံးပြုကာ ဆည်ပေါင်တင်ခြင်း၊ ကျောက်ချခြင်း၊ ရေမြောင်းလိုက်ခြင်းနှင့် ရေကာတာပြုပြင်ခြင်းတို့ကို ဆောင်ရွက်ခဲ့သော်လည်း ၂၀၂၅ ခုနှစ် မိုးရာသီတွင် တောင်ကျချောင်းရေ စီးဆင်းမှုကြောင့် ဆည်ထပ်မံပျက်စီးခဲ့ကာ စပါးအထွက်နှုန်းများ သိသိသာသာ ကျဆင်းခဲ့ကြောင်း ၎င်းက ထောက်ပြပြောကြားခဲ့သည်။

ယင်းမေးခွန်းကို စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော်က ပြန်လည်ဖြေကြားရာတွင် ကံကြီးဝရေလွှဲဆည် ပြုပြင်ရေးလုပ်ငန်းများအတွက် လိုအပ်သည့် ရန်ပုံငွေကို ၂၀၂၇-၂၀၂၈ ဘဏ္ဍာရေးနှစ် ပြည်ထောင်စုရန်ပုံငွေ သို့မဟုတ် သင့်လျော်သည့် ရန်ပုံငွေအရင်းအမြစ်များထံ တင်ပြတောင်းခံသွားမည်ဖြစ်ပြီး ရန်ပုံငွေရရှိမှုအပေါ် မူတည်၍ ဆောင်ရွက်ပေးသွားမည်ဖြစ်ကြောင်း ပြောကြားခဲ့သည်။

ကံကြီးဝရေလွှဲဆည်သည် တမူးမြို့၊ မြို့မရပ်ကွက်ရှိ မဟူရာချောင်း (ပါဟဲချောင်း) ပေါ်တွင် ၂၀၁၆ ခုနှစ်၌ တည်ဆောက်ခဲ့သည့် အကျယ် ၂၈၀ ပေ၊ အမြင့် ၆ ပေရှိ ကျောက်စီကွန်ကရစ်ရေလွှဲဆည်ဖြစ်သည်။ ၂၀၂၅ ခုနှစ် မိုးရာသီတွင် တောင်ကျချောင်းရေများ စီးဆင်းမှုကြောင့် ဆည်အထက်ပိုင်း၌ သဲနုန်းများ ပို့ချလာပြီး ရေတိုက်စားမှုများကြောင့် ရေလျှံထိန်းတာပေါင် ပေ ၁,၀၀၀ ခန့်နှင့် ရေလွှဲဆည်အောက်ပိုင်း ရေငြိမ်ကန်၏ အောက်ခံကြမ်းခင်းများ ပျက်စီးခဲ့ကြောင်း သိရသည်။