ကုန်သွယ်ရေးနှင့် အိန္ဒိယသင်္ဘောသားများ လုံခြုံရေးကိစ္စ ထရမ့်ပ်-မိုဒီ ဆွေးနွေး

အမေရိကန်သမ္မတ ဒေါ်နယ်ထရမ့်ပ်နှင့် အိန္ဒိယဝန်ကြီးချုပ် နာရင်ဒြာမိုဒီတို့သည် G7 ထိပ်သီးအစည်းအဝေးကာလအတွင်း တွေ့ဆုံဆွေးနွေးခဲ့ကြပြီး နှစ်နိုင်ငံကုန်သွယ်ရေး ပူးပေါင်းဆောင်ရွက်မှုများနှင့် အိန္ဒိယသင်္ဘောသားများ၏ လုံခြုံရေးကိစ္စများကို အဓိကထား ဆွေးနွေးခဲ့ကြကြောင်း သိရသည်။

ထရမ့်ပ်က မိုဒီနှင့် တွေ့ဆုံဆွေးနွေးမှုမှာ အလွန်အဆင်ပြေခဲ့ကြောင်း ပြောကြားခဲ့ပြီး နှစ်နိုင်ငံအကြား ကုန်သွယ်ရေးသဘောတူညီချက်များ ရရှိရေးအတွက် ဆက်လက်ဆောင်ရွက်နေကြောင်းလည်း ပြောဆိုခဲ့သည်။

ထို့ပြင် မိုဒီကို “ပြတ်သားသော ညှိနှိုင်းဆွေးနွေးရေးသမား” ဟု ချီးကျူးပြောကြားခဲ့ပြီး အနာဂတ်တွင် အိန္ဒိယနိုင်ငံသို့ သွားရောက်မည့်အစီအစဉ်ရှိကြောင်း သတင်းထောက်များအား အသိပေးခဲ့သည်။

ယခုတွေ့ဆုံမှုသည် ၂၀၂၅ ခုနှစ် ဖေဖော်ဝါရီလတွင် မိုဒီ၏ ဝါရှင်တန်ခရီးစဉ်နောက်ပိုင်း ခေါင်းဆောင်နှစ်ဦးအကြား ပထမဆုံးအကြိမ် မျက်နှာချင်းဆိုင်တွေ့ဆုံမှုဖြစ်ကြောင်း သိရသည်။

ဆွေးနွေးပွဲအတွင်း အိန္ဒိယဝန်ကြီးချုပ် မိုဒီက ဟော်မုဇ်ရေလက်ကြားဒေသတွင် တာဝန်ထမ်းဆောင်နေသည့် အိန္ဒိယသင်္ဘောသားများ၏ လုံခြုံရေးသည် အိန္ဒိယနိုင်ငံအတွက် အထူးအရေးကြီးသည့် ကိစ္စရပ်တစ်ခုဖြစ်ကြောင်း ပြောကြားခဲ့သည်။

အိန္ဒိယသင်္ဘောသားများ သေဆုံးခဲ့သည့်ဖြစ်ရပ်နှင့်ပတ်သက်၍ မေးမြန်းမှုအပေါ် ထရမ့်ပ်က ဝမ်းနည်းကြောင်း ပြောကြားခဲ့ပြီး အမေရိကန်နှင့် အိန္ဒိယတို့ ပူးပေါင်းဆောင်ရွက်လျက်ရှိကြောင်း ထည့်သွင်းပြောဆိုခဲ့သည်။

ထို့ပြင် အမေရိကန်ပြည်ထောင်စုအနေဖြင့် အိန္ဒိယနိုင်ငံ၏ လုံခြုံရေးနှင့် အကျိုးစီးပွားများကို ဆက်လက်ကာကွယ်ပံ့ပိုးသွားမည်ဖြစ်ကြောင်း ထရမ့်ပ်က ပြောကြားခဲ့သည်။

Ref: International