ကယ်လီဖိုးနီးယားတောမီး ပြည်သူ့ကျန်းမာရေးအရေးပေါ်အခြေအနေအဖြစ် ကြေညာ

လော့စ်ဆန်းဂျလိစ်တွင် လောင်ကျွမ်းလျက်ရှိသော တောမီး၏ ကျန်းမာရေး အပေါ် အကျိုးသက်ရောက်မှုကို ဖြေရှင်းရန်အတွက် အမေရိကန်ကျန်းမာရေးနှင့် လူမှုဝန်ဆောင်မှုဌာန(HHS) က ဇန်နဝါရီ ၁၀ ရက်တွင် ကယ်လီဖိုးနီးယားဒေသ၌ ပြည်သူ့ကျန်းမာရေးအပေါ်အခြေအနေ ကြေညာလိုက်သည်။

တောမီးလောင်ကျွမ်းမှုကြောင့် လော့စ်ဆန်းဂျလိစ်မြို့၏ အရှေ့နှင့် အနောက်ခြမ်းရှိ ရပ်ကွက်များ မီးလောင်ခဲ့ပြီး လက်ရှိအချိန်အထိ လူ ၁၀ ဦးထက်မနည်း ‌ေ-သဆုံးခဲ့ပြီဖြစ်ကာ အဆောက်အအုံ ၁၀,၀၀၀ နီးပါး မီးလောင်ပျက်စီးခဲ့သည်။ ‌ေ-သကြေထိခိုက်မှု ကိန်းဂဏန်းများသည် မြင့်တက်လာနိုင်သည်ဟုလည်း ဆိုခဲ့သည်။

အရေးပေါ်ကြေညာချက်သည် Medicare and Medicaid ကျန်းမာရေးအာမခံအစီအစဉ်များတွင် စာရင်းသွင်းထားသူများ၏ အရေးပေါ်ကျန်းမာရေးလိုအပ်ချက်များကို ဖြည့်ဆည်းရာတွင် ပိုမိုချောမွေ့လွယ်ကူစေသည်ဟု HHS က ပြောဆိုခဲ့သည်။

ဌာန၏ အရေးပါသော ကြိုတင်ပြင်ဆင်မှုနှင့် တုန့်ပြန်မှုဆိုင်ရာ အုပ်ချုပ်ရေးအဖွဲ့(ASPR) သည် ပြည်နယ်က တောင်းဆိုလာပါက ဆေးဘက်ဆိုင်ရာပစ္စည်းနှင့် ထောက်ပံ့ရေးပစ္စည်းများကို ဝန်ထမ်းများနှင့်အတူ ဖြန့်ကျက်ချထားရန် ပြင်ဆင်ထားသည်ဟု HHS က ပြောကြားခဲ့သည်။

တောမီးလောင်ကျွမ်းမှုကို ကြီးမားသောကပ်ဘေးတစ်ခုအဖြစ် ဇန်နဝါရီ ၈ ရက်တွင် သမ္မတ ဂျိုးဘိုင်ဒင်က ကြေညာခဲ့ပြီး အမေရိကန်အစိုးရသည် လာမည့် ခြောက်လအတွက် ပြန်လည်ထူထောင်ရေးအစီအစဉ်ကို ၁၀၀ ရာခိုင်နှုန်း ဖြည့်ဆည်းပေးအပ်သွားမည်ဟု ဆိုခဲ့သည်။ ထို့အပြင် မီးငြိမ်းသတ်ရန်နှင့် ပြန်လည်တည်ဆောက်ရေးအတွက် ကယ်လီဖိုးနီးယားပြည်နယ်က လိုအပ်သော အရင်းအမြစ်များကို ဖြည့်ဆည်းပေးသွားမည်ဟုလည်း ဇန်နဝါရီ ၁၀ ရက်တွင် ဘိုင်ဒင်က ထပ်လောင်းကတိပြုခဲ့သည်။

Ref: သည်စထရိတ်တိုင်းမ်စ်