ဘေးကင်းလုံခြုံရေး အကြောင်းပြချက်ဖြင့် စည်းမျဉ်းသစ် ထုတ်ပြန်
ကမ္ဘာ့ဘောလုံးအဖွဲ့ချုပ် (FIFA) သည် ဘေးကင်းလုံခြုံရေးဆိုင်ရာ အကြောင်းပြချက်များကြောင့် ကမ္ဘာ့ဖလားပြိုင်ပွဲများ ကျင်းပရာ အားကစားကွင်းများအတွင်းသို့ ရေပြန်ဖြည့်နိုင်သော ရေဘူးအလွတ်များ ယူဆောင်လာခြင်းကို တားမြစ်လိုက်ကြောင်း The Athletic က ဇွန် ၃ ရက်တွင် ဖော်ပြခဲ့သည်။
FIFA က ပြီးခဲ့သည့်လအတွင်း ထုတ်ပြန်ခဲ့သည့် တရားဝင် အားကစားကွင်း စည်းကမ်းချက်များ၌ “ထွင်းဖောက်မြင်နိုင်ပြီး ပြန်လည်အသုံးပြုနိုင်သော ၁ လီတာဆံ့ ပလတ်စတစ်ဘူးအလွတ်များကို အားကစားကွင်းအတွင်း ယူဆောင်လာနိုင်သည်” ဟု ဖော်ပြထားခဲ့သည်။
သို့သော် နောက်ပိုင်းတွင် စည်းမျဉ်းများကို ပြင်ဆင်ခဲ့ပြီး ပြန်လည်အသုံးပြုနိုင်သော ရေဘူးများအား အားကစားကွင်းအတွင်း ယူဆောင်လာခွင့်မပြုတော့ကြောင်း The Athletic က ထပ်မံဖော်ပြခဲ့သည်။
“ရှင်းလင်းပြတ်သားမှုရှိစေရန်အတွက် ပြန်လည်အသုံးပြုနိုင်သော ရေဘူးများကို အားကစားကွင်းအတွင်း ယူဆောင်လာခွင့် မပြုပါ” ဟု စည်းကမ်းချက်အသစ်တွင် ဖော်ပြထားသည်။
FIFA ပြောရေးဆိုခွင့်ရှိသူတစ်ဦးက ယင်းစည်းမျဉ်းပြောင်းလဲမှုသည် ဘေးကင်းလုံခြုံရေးဆိုင်ရာ အကြောင်းပြချက်များကြောင့် ဖြစ်ကြောင်းနှင့် ကမ္ဘာ့ဖလားပြိုင်ပွဲ ကျင်းပမည့် အားကစားကွင်းအများအပြားတွင် ယင်းကဲ့သို့ ရေဘူးများ ယူဆောင်ခွင့်ကို ယခင်ကတည်းက တားမြစ်ထားပြီးဖြစ်ကြောင်း AFP သတင်းဌာနသို့ ပြောကြားခဲ့သည်။
FIFA အနေဖြင့် ကစားသမားများ၊ ဒိုင်လူကြီးများ၊ ပရိသတ်များ၊ စေတနာ့ဝန်ထမ်းများနှင့် ဝန်ထမ်းများအားလုံး၏ ကျန်းမာရေးနှင့် ဘေးကင်းလုံခြုံရေးကို အကာအကွယ်ပေးရန် ကတိကဝတ်ပြုထားကြောင်းလည်း သတင်းထုတ်ပြန်ချက်တွင် ဖော်ပြထားသည်။
ထို့ပြင် အားကစားကွင်းအတွင်း သောက်ရေဘူးများကို အခြားအားကစားပွဲများတွင် ရောင်းချသည့် ဈေးနှုန်းများအတိုင်း ဝယ်ယူနိုင်မည်ဖြစ်ကြောင်း FIFA က အသိပေးထားသည်။
Ref: Bangkok Post
