အီလွန်မတ်စ်ဟာ သူ့ရဲ့ SpaceX ဒုံးပျံကုမ္ပဏီ ရှယ်ယာတွေ စတော့ဈေးကွက်မှာ သမိုင်းတစ်လျှောက် အကြီးမားဆုံး စတင်ရောင်းချမှုအတွင်း ဈေးတွေအရမ်းတက်သွားပြီးတဲ့နောက် သောကြာနေ့မှာ ကမ္ဘာ့ပထမဆုံး ထရီလီယံနာ (Trillionaire) သူဌေးကြီး ဖြစ်လာခဲ့ပါတယ်။
Bloomberg ရဲ့ သူဌေးကြီးများစာရင်းအရ သူ့ရဲ့ စုစုပေါင်းပိုင်ဆိုင်မှုက ဒေါ်လာ ၁.၁၁ ထရီလီယံ (ပေါင် ၈၂၈ ဘီလီယံ) ရှိသွားပြီဖြစ်လို့ Tesla နဲ့ SpaceX တည်ထောင်သူဟာ ကမ္ဘာ့အချမ်းသာဆုံးလူသားဆိုတဲ့ နေရာကို သက်တောင့်သက်သာနဲ့ပဲ အခိုင်အမာ ရယူသွားနိုင်ခဲ့ပါတယ်။
ဒီလိုဖြစ်လာတာက အဲဒီ ဒုံးပျံ၊ ဆက်သွယ်ရေးနဲ့ ဉာဏ်ရည်တု (AI) နည်းပညာ ကုမ္ပဏီကို တန်ဖိုး ဒေါ်လာ ၂.၂ ထရီလီယံနဲ့ Nasdaq စတော့အိတ်ချိန်းမှာ စာရင်းသွင်းခဲ့လို့ပါ။
ကုမ္ပဏီဘက်ကတော့ ရှယ်ယာတစ်ခုကို ၁၃၅ဒေါ်လာနဲ့ ရောင်းချမယ်လို့ ဆိုခဲ့ပေမဲ့၊ အရောင်းအဝယ် စဖွင့်ချိန်မှာ ဒေါ်လာ ၁၅၀ ဖြစ်ခဲ့ပြီး ၁၇၆.၅၀ ဒေါ်လာအထိ ခဏတာ ရောက်သွားခဲ့ပါတယ်။ ဒါက အာကာသနဲ့ပတ်သက်တဲ့ စီးပွားရေးလုပ်ငန်း အလားအလာတွေနဲ့ မတ်စ်နဲ့ ပတ်သက်နေတဲ့ ကုမ္ပဏီတွေအပေါ် ရင်းနှီးမြှုပ်နှံသူတွေ ဘယ်လောက် စိတ်ဝင်စားနေလဲဆိုတာကို ပြသလိုက်တာပါပဲ။
သောကြာနေ့ ဈေးပိတ်ချိန်မှာတော့ SpaceX ရဲ့ ရှယ်ယာဈေးက ၁၆၁ ဒေါ်လာ ဝန်းကျင်မှာ ရှိခဲ့ပါတယ်။
SpaceX ရဲ့ ရှယ်ယာတွေကို သောကြာနေ့က အများပြည်သူရှေ့ စတော့ဈေးကွက်မှာ မဖွင့်ခင်ကတည်းက၊ ကနဦး ရှယ်ယာရောင်းချမှု (IPO) ကနေ ရင်းနှီးမြှုပ်နှံသူတွေနဲ့ ကြားခံအာမခံသူတွေဆီကနေ ဒေါ်လာ ၇၅ ဘီလီယံ ရရှိခဲ့ပါတယ်။
SpaceX မှာ မတ်စ် ပိုင်ဆိုင်တဲ့ ၄၂% သော ရှယ်ယာတွေက သူ့ကို ကုမ္ပဏီရဲ့ လုပ်ဆောင်သမျှ အရာအားလုံးအပေါ် တစ်ဦးတည်း ထိန်းချုပ်ခွင့်ကို အပြည့်အဝ ပေးထားပါတယ်။ သူက ရင်းနှီးမြှုပ်နှံထားတဲ့ ငွေတွေကို သူလိုချင်သလို သုံးစွဲနိုင်ပါတယ်။
Bloomberg ရဲ့ အဆိုအရ ဈေးပိတ်ချိန်မှာ သူ့ရဲ့ SpaceX ရှယ်ယာတွေက ဒေါ်လာ ၇၆၇.၁ ဘီလီယံ တန်ကြေးရှိပြီး၊ သူ့မှာ နောက်ထပ် SpaceX options ဒေါ်လာ ၅၃.၈ ဘီလီယံဖိုး ရှိပါသေးတယ်။ ဒါ့အပြင် သူ့မှာ Tesla ရှယ်ယာ ဒေါ်လာ ၁၆၈ ဘီလီယံနဲ့၊ Tesla options ဒေါ်လာ ၁၁၆.၄ ဘီလီယံဖိုးလည်း ရှိနေပါသေးတယ်။
မတ်စ် တစ်ယောက် ကမ္ဘာ့ပထမဆုံး ထရီလီယံနာ ဖြစ်လာတဲ့ အခြေအနေက ကြွယ်ဝချမ်းသာမှု မညီမျှခြင်းတွေအကြောင်း ချက်ချင်း ငြင်းခုံစရာတွေ ဖြစ်လာစေပါတယ်။ သူ့ရဲ့ ပိုင်ဆိုင်မှုက အခုဆိုရင် ပိုလန် ဒါမှမဟုတ် ဆွစ်ဇာလန်နိုင်ငံ တစ်နိုင်ငံလုံးရဲ့ စီးပွားရေးထွက်ကုန် စုစုပေါင်းနဲ့ သွားပြီးထပ်တူကျနေပါတယ်။
ဒီလို ကြားတောင်မကြားဖူးတဲ့ ချမ်းသာကြွယ်ဝမှုက မတ်စ်ကို ကမ္ဘာ့နိုင်ငံရေးမှာ ဩဇာလွှမ်းမိုးမှုကြီးမားတဲ့ ပုဂ္ဂိုလ်တစ်ဦး ဖြစ်သွားစေပါပြီ။