အမေရိကန်အစိုးရထိရောက်မှုရှိရေးဆိုင်ရာဌာန(DOGE) ၏ အကြီးအကဲ အီလွန်မတ်စ်က အမေရိကန်နိုင်ငံတကာဖွံ့ဖြိုးရေးအေဂျင်စီ(USAID)ကို ဖျက်သိမ်းရေးလုပ်ငန်းစဉ် စတင်နေပြီဖြစ်ကြောင်း ပြောကြားသည်။
“ကျွန်တော်တို့ဒါကိုပိတ်သိမ်းနေပါတယ်” ဟု မတ်စ်ကသူ့၏ X လူမှုကွန်ရက်တွင် ရေးသားခဲ့သည်။
ယင်းအဖွဲ့အစည်းကိုပြန်လည်မတည်ဆောက်သင့်ကြောင်းကိုလည်း မတ်စ်ကပြောကြားခဲ့သည်။ “ကျွန်တော်တို့မှာရှိနေတာက ပိုးတွေလောက်တွေ ရောနှောနေအလုံးကြီးပါပဲ။ ဒါကိုလုံးဝဖျက်ပစ်ရမယ်။ ဒါကပြင်လို့မရတော့ဘူး” ဟုသူကထပ်လောင်းပြောကြားခဲ့သည်။
USAIDသည် ဇီဝလက်နက်များဖွံ့ဖြိုးတိုးတက်ရေးအတွက်ငွေကြေးထောက်ပံ့ပေးနေကြောင်း မတ်စ်က ယခင်ကပင်လျှင် ပြောခဲ့ဖူးသည်။
မတ်စ် ဦးစီးသော DOGE ဌာန နှင့်အငြင်းပွားမှုကြောင့် USAID လုံခြုံရေးမန်နေဂျာနှစ်ဦးကို စီမံခန့်ခွဲမှုများပြုလုပ်ခွင့် ရုပ်သိမ်းခဲ့ကြောင်း သတင်းရင်းမြစ်များကို ကိုးကား၍ AP သတင်းဌာနက သတင်းရေးသားခဲ့သည်။ အဆိုပါ အနားပေးခံရသူနှစ်ဦးက သူတို့သည် မက်စ်၏အေဂျင်စီသို့လျှို့ဝှက်စာရွက်စာတမ်းများကိုမပေးခဲ့ကြကြောင်း ငြင်းဆိုကြသည်။
ဇန်နဝါရီလကုန်ပိုင်းက NBC သတင်းဌာန၏ သတင်းထုတ်ပြန်ချက်အရ USAID ဝန်ထမ်း ၅၀ ကျော်ကိုလည်း အလားတူပင် စီမံခန့်ခွဲမှုများပြုလုပ်ခွင့်ရုပ်သိမ်းခဲ့ပြီး၊ နောက်ထပ်အမိန့်တစ်စုံတစ်ရာ မထုတ်ပြန်မချင်း လစာနှင့်အကျိုးခံစားခွင့်များကိုဆက်လက်ခံစားစေခဲ့သည်။
ဤဆုံးဖြတ်ချက်များကို USAID အား ဌာနတွင်း စာရင်းစစ်ဆေးမှုအပြီးတွင်ချမှတ်ခဲ့ခြင်းဖြစ်ကြောင်း အေဂျင်စီ၏ယာယီအုပ်ချုပ်ရေးမှူးအသစ် ဂျေဆန်ဂရေးကပြောသည်။