U-19 Futsal Cup Mandalay 2025 ပြိုင်ပွဲကို ပြိုင်ပွဲဝင်အသင်း (၁၆)သင်းဖြင့် လာမည့် မတ်လ (၂၉) ရက်တွင် စတင်ကျင်းပပြလုပ်သွားမည်ဖြစ်ကြောင်း မန္တလေးတိုင်း သဲသောင်ပြင်နှင့် ဖူဆယ်ဆပ်ကော်မတီထံမှ သိရသည်။
ပြိုင်ပွဲအား မန္တလေးတိုင်း ဖူဆယ်ဘောလုံးဆပ်ကော်မတီမှ ကြီးမှူး၍ Tun Tauk Myanmar Co;Ltd မှ အဓိက ပံ့ပိုးကူညီမှုဖြင့် ကျင်းပသွားမည်ဖြစ်ကာ၊ ပြိုင်ပွဲနှင့် ပတ်သက်၍ ယမန်နေ့ ဖေဖော်ဝါရီ (၂၀) ရက်က ပြိုင်ပွဲသတ်မှတ်ချက်များနှင့် စည်းကမ်းချက်များ အတည်ပြုနိုင်ရန် ညှိနှိုင်းအစည်းအဝေးတစ်ရပ်ကို ကျင်းပပြုလုပ်ခဲ့သည်။
အစည်းအဝေး ရလဒ်အရ အသင်းတစ်သင်းလျှင် ပြိုင်ပွဲဝင် ကြေးအဖြစ် ကျပ်တစ်သိန်းငါးသောင်းအပြင် အာမခံကြေးအဖြစ် ကျပ် တစ်သိန်းပေးသွင်းရမည်ဖြစ်ကာ ၊ ပြိုင်ပွဲဝင် အသင်းတစ်သင်းတွင် ဂိုးသမား (၂) ဦးအပါအဝင် ကစားသမား အများဆုံး (၁၆) ဦး၊ အနည်းဆုံး (၁၀)ဦး ၊ နည်းပြအုပ်ချုပ်အဖွဲ့ဝင် အများဆုံး (၅) ဦး အနည်းဆုံး (၂) ဦး ပါဝင်ရမည်ဖြစ်ကြောင်း သိရသည်။
ထို့ပြင် အသင်းတစ်သင်း၌ ၉/မှတ် ပုံတင်မဟုတ်သည့် ပြင်ပ ကစားသမား (၂)ဦး ထည့်သွင်း ပါဝင်ခွင့်ရှိပြီး၊ MNL League 1/2 ၊ MNl U 20 ၊ MFF Futsal League 1/2 ကစားခဲ့ဖူးသည့် ကစားသမားများ သက်တမ်းအလိုက်ဘောလုံး/ဖူဆယ် လက်ရွေးစင်ကစားသမားများ ပါဝင်ကစားခွင့်မပြုကြောင်း ဆုံးဖြတ်ခဲ့ကြသည်။
သတ်မှတ်ချက်နှင့် မကိုက်ညီသော ကစားသမားများကို ထည့်သွင်းကစားကြောင်း စစ်ဆေးတွေ့ရှိပါက အသင်းအား ရောက်ရှိသည့် အဆင့်မှ ထုတ်ပယ်ကာ အသင်းနှင့် ကစား သမားများအား ပွဲပယ်ပြစ်ဒဏ်များ ချမှတ်သွားဟု ဆိုသည်။
ပြိုင်ပွဲကို ပထမအဆင့် အုပ်စုပတ်လည်စနစ်၊ ဒုတိယအဆင့် ရှုံးထွက်စနစ်များဖြင့် ယှဥ်ပြိုင်ကစားရမည်ဖြစ်ကာ ပွဲစဥ်အလိုက် အကောင်းဆုံးကစားသမားဆုများကို ရှုံးထွက်အဆင့်မှစတင်၍ ကော်မတီနည်းပြအဖွဲ့ဝင်များက ရွေးချယ်ပေးအပ်သွားမည်ဖြစ်ကြောင်း သိရသည်။
ပြိုင်ပွဲဆုကြေးအဖြစ် ပထမဆု ကျပ်(၇) သိန်း၊ ဒုတိယဆု ကျပ်(၅)သိန်း၊ တတိယဆု ကျပ်(၃)သိန်း၊ အကောင်းဆုံးကစားသမားဆု ကျပ်(၁)သိန်းနှင့် အကောင်းဆုံးဂိုးသမားဆု ကျပ်(၁)သိန်းကျပ် ချီးမြှင့်သွားမည်ဖြစ်ကြောင်း သိရသည်။