နာမည်ကျော် ဆိုရှယ်မီဒီယာအက်ပ်ကို ပိတ်ပင်ခံရနိုင်သည့် သို့မဟုတ် အတင်းအကြပ်ရောင်းချရစေနိုင်သည့် ဖက်ဒရယ် TikTok ဥပဒေတစ်ရပ်ကို ဆိုင်းငံ့ပေးရန် ဒေါ်နယ်ထရမ့်ပ်က အမေရိကန်တရားရုံးချုပ်ကို လျှောက်ထားတောင်းဆိုလိုက်ပြီး သူတာဝန်ထမ်းဆောင်ချိန်တွင် အဆိုပါကိစ္စကို နိုင်ငံရေးအရဖြေရှင်းနိုင်ရန် အချိန်ရသင့်သည်ဟု စောဒကတက်ခဲ့သည်။
TikTok ၏ မိခင်ကုမ္ပဏီဖြစ်သော ByteDance အနေဖြင့် အက်ပ်ကို ဇန်နဝါရီ ၁၉ ရက်အထိ လွှဲပြောင်းရောင်းချခြင်းမပြုပါက ပိတ်ပင်ရန် ကွန်ဂရက်က ဧပြီလတွင် မဲပေးဆုံးဖြတ်ခဲ့သည်။ ယင်းအချိန်မှစကာ TikTok နှင့် ByteDance သည် အမေရိကန်ပြည်ထောင်စုရှိ အွန်လိုင်းပေါ်တွင် အက်ပ်ဆက်ရှိနေရေးအတွက် တိုက်ပွဲဝင်နေခဲ့သည်။
၎င်းတို့သည် ဥပဒေကို ပယ်ချနိုင်ရေး ကြိုးပမ်းနေပြီး တရားရုံးချုပ်က အဆိုပါအမှုကို ကြားနာရန် သဘောတူထားခဲ့သည်။
သို့ရာတွင် တရားရုံးက ByteDance အပေါ် အနိုင်မပေးခြင်း သို့မဟုတ် ဥပဒေကို ပယ်ချခြင်းမျိုး မရှိခဲ့ပါက ထရမ့်ပ် ရာထူးမထမ်းဆောင်မီ တစ်ရက်အလို ဇန်နဝါရီ ၁၉ ရက်တွင် အက်ပ်သည် အမေရိကန်ပြည်ထောင်စုတွင် ပိတ်ပင်ခံရနိုင်မည်ဖြစ်သည်။
အဆိုပါအမှုသည် တစ်ဖက်တွင် လွတ်လပ်စွာထုတ်ဖော်ပြောဆိုခွင့်နှင့် အခြားတစ်ဖက်တွင် နိုင်ငံခြားရေးမူဝါဒနှင့် နိုင်ငံတော်လုံခြုံရေးဆိုင်ရာ စိုးရိမ်ပူပန်ရမှုကြားတွင် မကြုံစဖူးဆန်းသစ်သော ခက်ခဲသည့် အကျပ်အတည်းတစ်ခုဖြစ်သည်ဟု ထရမ့်ပ်က ဒီဇင်ဘာ ၂၅ ရက်က တိုင်ကြားလွှာတွင် ပြောဆိုခဲ့သည်။
ယင်းကို ဆိုင်းထားခြင်းအားဖြင့် ဖွဲ့စည်းပုံဥပဒေဆိုင်ရာ အရေးကြီးသောကိစ္စရပ်များကို ဆုံးဖြတ်ရာတွင် တရားရုံးဝင်ပါစရာမလိုဘဲ သမ္မတထရမ့်ပ်ကို နိုင်ငံရေးဆုံးဖြတ်ချက်တစ်ခု အကောင်အထည်ဖော်ရန် အခွင့်အလမ်းအား ပေးစွမ်းလိမ့်မည်ဖြစ်သည်ဟုလည်း တိုင်းကြားလွှာတွင် ပြောဆိုထားခဲ့သည်။
Ref: သည်စထရိတ်တိုင်းမ်စ်