မောင်းနှင်နေစဉ် ယာဉ်ကို ထိန်းချုပ်ရ ခက်ခဲစေနိုင်ကာ အထူးသဖြင့် အရှိန်နှေးသည့်အခါမျိုးတွင် ယာဉ်တိုက်မှုဖြစ်နိုင်ချေများသည့် ပါဝါစတီယာရင် အထောက်အကူပြုစနစ် ချို့ယွင်းချက်ကြောင့် တက်စ်လာ(Tesla) ကုမ္ပဏီက အမေရိကတွင် ၎င်း၏ လျှပ်စစ်ကား အစီးရေ ၃၇၆,၀၀၀ ကို ပြန်လည်သိမ်းဆည်းနေကြောင်း သိရသည်။
နေ့လည်ပိုင်း အရောင်းအဝယ်တွင် တက်စ်လာ၏ ရှယ်ယာများသည် ၃ ရာနှုန်း ကျဆင်းခဲ့သည်။
တက်စ်လာကားပိုင်ရှင်အချို့က စတီယာရင် ချို့ယွင်းချက်များနှင့် ပတ်သက်၍ သတင်းပို့ခဲ့ပြီးနောက် နိုင်ငံတော် အဝေးပြေးယာဉ်လမ်းကြောင်း ဘေးကင်းရေးအဖွဲ့(NHTSA) က တစ်နှစ်ကျော် စစ်ဆေးအပြီးတွင် ယခုကဲ့သို့ ပြန်လည်သိမ်းဆည်းခဲ့ခြင်းဖြစ်သည်။
အချို့ကားပိုင်ရှင်များက ဘီးကို လှည့်မရကြောင်းနှင့် အချို့က ပိုမိုအားစိုက်၍ လှည့်ရကြောင်း တိုင်တန်းခဲ့ကြသည်။ အဆိုပါပြဿနာကြောင့် ယာဉ်စီးရေ ၅၀ ကျော်သည် ဆွဲယူရသည့် အခြေအနေဖြစ်ခဲ့သည်ဟု NHTSA က ၂၀၂၄ ခုနှစ်တွင် ပြောဆိုခဲ့သည်။
၂၀၁၆ ခုနှစ်အတွင်း စတီယာရင် အစိတ်အပိုင်းများ အချိန်မတန်မီ ချို့ယွင်းမှုပေါ်ပေါက်ခြင်းကို သောင်းနှင့်ချီသော ယာဉ်ပိုင်ရှင်များ ကြုံတွေ့ခဲ့ရသည်ဟု တက်စ်လာ စာရွက်စာတမ်းများ၊ ဖောက်သည်ဟောင်းများနှင့် ဝန်ထမ်းဟောင်းများကို တွေ့ဆုံမေးမြန်းမှုများကို ကိုးကား၍ ရိုက်တာက သတင်းဖော်ပြခဲ့သည်။
ယခု ပြန်လည်သိမ်းဆည်းမှုများသည် စတီယာရင် ထိန်းချုပ်မှုမကောင်းပါဆိုသော စွပ်စွဲချက်များအပေါ် NHTSA က စုံစမ်းစစ်ဆေးမှုကို တုန့်ပြန်ဆောင်ရွက်ခြင်းမျိုးမဟုတ်ဟု တက်စ်လာက ပြောကြားခဲ့သည်။
Ref: သည်စထရိတ်တိုင်းမ်စ်