SNLD ပါတီ၏ နိုင်ငံလုံးဆိုင်ရာ ညီလာခံတွင် ပါတီဖွဲ့စည်းပုံစည်းမျဉ်းနှင့် ပါတီမူဝါဒလမ်းစဉ်ကို ပြန်လည် ဆွေးနွေး အတည်ပြု
ရှမ်းအမျိုးသားများဒီမိုကရေစီပါတီ(SNLD)၏ နှစ်ရက်ကြာကျင်းပပြုလုပ်ခဲ့သည့် နိုင်ငံလုံးဆိုင်ရာ ညီလာခံတွင် ပါတီဖွဲ့စည်းပုံစည်းမျဉ်းနှင့် ပါတီမူဝါဒလမ်းစဉ်ကို ပြန်လည်ဆွေးနွေ အတည်ပြုနိုင်ခဲ့ကြကြောင်း ယင်းပါတီက ယမန်နေ့ မေ ၂၇ ရက် ညပိုင်းတွင် ထုတ်ပြန်ခဲ့သည်။
ယင်းသို့ အတည့်ပြုရာ၌ ၂၀၂၀ ပြည့်နှစ်တွင် ရေးဆွဲခဲ့သည့် ပါတီမူဝါဒလမ်းစဉ်ကို အပြန်အလှန်ဆွေးနွေးပြီး အတည်ပြုနိုင်ခဲ့သည့်အပြင် ပါတီဖွဲ့စည်းပုံစည်းမျဉ်းအား ပြင်ဆင်ဖြည့်စွက်မှုများကို အတည်ပြုနိုင်ခဲ့ကြောင်း ထုတ်ပြန်ချက်တွင် ပါရှိသည်။
ထို့အပြင် ညီလာခံမှတဆင့် ဗဟိုအလုပ်အမှုဆောင်ကော်မတီဝင် ၃၁ ဦး အပါအဝင် ဗဟိုကော်မတီ စုစုပေါင်း ၁၁၇ ဦးတို့ကို ပါတီ ဖွဲ့စည်းပုံ စည်းမျဉ်းနှင့် အညီ ပြန်လည် ရွေးကောက်တင်မြောက်ခဲ့သည်။
ယင်းအပြင် ဗဟိုအလုပ်အမှုဆောင်ကော်မတီက ရေးဆွဲထားသော နိုင်ငံလုံးဆိုင်ရာညီလာခံ လုပ်ငန်းလမ်းညွှန်၊ ဗဟိုဌာနချုပ်ရုံးခွဲလုပ်ငန်းလမ်းညွှန်၊ မြို့နယ်အလုပ်အမှုဆောင်ကော်မတီ လုပ်ငန်းလမ်းညွှန်တို့ကိုလည်း ဆွေးနွေးအတည်ပြုနိုင်ခဲ့ခြင်းဖြစ်ကြောင်း သိရသည်။
အဆိုပါ ညီလာခံ ပထမရက်တွင် ကိုယ်စားလှယ် ၂၃၂ ဦး၊ သဘာပတိ ၅ ဦး၊ ညီလာခံဆိုင်ရာ ရွေးကောက်ပွဲကော်မရှင် ၇ ဦး၊ အထူးဧည့်သည်တော် ၆၇ ဦး၊ သတင်းမီဒီယာ ၄ ဦး၊ စေတနာ့ဝန်းထမ်း ၉၀ ဦး စုစုပေါင်း ၄၀၅ ဦး တို့တက်ရောက်ခဲ့ပြီး၊ ဒုတိယရက်တွင် ကိုယ်စားလှယ် ၂၃၅ ဦး၊ သဘာပတိအဖွဲ့ဝင် ၅ ဦး၊ ညီလာခံဆိုင်ရာရွေးကောက်ပွဲကော်မရှင် ရဦး၊ စေတနာ့ဝန်ထမ်း ၉၀ ဦး၊ စုစုပေါင်း ၃၃၇ ဦးတို့ တက်ရောက်ခဲ့ကြကြောင်း သိရသည်။
