ထိုင်းနိုင်ငံ ဘန်ကောက်မြို့တွင် Space Systems Engineer အဖြစ် တာဝန်ထမ်းဆောင်နေသည့် မြန်မာအင်ဂျင်နီယာ မအိဖြူဖြူသည် လာမည့် အောက်တိုဘာလ ပထမပတ်တွင် ကျင်းပမည့် International Astronautical Federation (IAF) ၏ (၇၇) ကြိမ်မြောက် နှစ်ပတ်လည် ညီလာခံသို့ မြန်မာနိုင်ငံကိုယ်စားပြုအဖြစ် တက်ရောက်ရန် ရွေးချယ်ခံထားရကြောင်း သိရသည်။
မအိဖြူဖြူသည် ပြည်နည်းပညာတက္ကသိုလ်မှ Mechatronics ဘာသာရပ်ဖြင့် အင်ဂျင်နီယာဘွဲ့ ရရှိခဲ့ပြီးနောက် ဂျပန်နိုင်ငံ Kyushu Institute of Technology တွင် Space Systems Engineering မဟာဘွဲ့ကို ဆက်လက်သင်ယူခဲ့သူဖြစ်သည်။
လက်ရှိတွင် Space Systems Engineer အဖြစ် နိုင်ငံတကာ အာကာသစီမံကိန်းများတွင် ပါဝင်ဆောင်ရွက်နေပြီး NASA၊ ESA နှင့် JAXA တို့၏ စံချိန်စံညွှန်းများနှင့်အညီ CubeSat ဂြိုဟ်တုအစိတ်အ ပိုင်းများ၊ အင်တင်နာစနစ်များနှင့် ဆိုလာပြားဖြန့်ကြက်မှုစနစ်များကို ဒီဇိုင်းရေးဆွဲတီထွင်နိုင်သူဖြစ်ကြောင်း သိရသည်။
ထို့ပြင် CubeSat တည်ဆောက်ပုံဒီဇိုင်း၊ FEA စမ်းသပ်မှုများနှင့် အာကာသပတ် ဝန်းကျင်ဆိုင်ရာ စမ်းသပ်စစ်ဆေးမှုများတွင်လည်း ပါဝင်လုပ်ကိုင်နေပြီး Python၊ C၊ C++၊ MATLAB၊ SolidWorks နှင့် Fusion 360 စသည့် နည်းပညာများကို ကျွမ်းကျင်စွာ အသုံးပြုနိုင်သူလည်း ဖြစ် သည်။
အလားတူ အမေရိကန် Federal Communications Commission (FCC) ၏ Ground Station Operator လိုင်စင်များကိုလည်း ရရှိထားကြောင်း သိရသည်။
မအိဖြူဖြူသည် Space Generation Advisory Council (SGAC) တွင် မြန်မာနိုင်ငံကိုယ်စားပြုဆက်သွယ်ရေးတာဝန်ခံ (National Point of Contact for Myanmar) အဖြစ်လည်း တာဝန်ယူဆောင်ရွက်နေပြီး မြန်မာလူငယ်များနှင့် နိုင်ငံတကာ အာကာသနည်းပညာအသိုင်းအဝိုင်းအကြား ချိတ်ဆက်ဆောင်ရွက်ပေးလျက်ရှိသည်။
ယခု IAF ၏ ၇၇ ကြိမ်မြောက် နှစ်ပတ်လည်ညီလာခံသို့ မြန်မာနိုင်ငံကိုယ်စားပြုအဖြစ် ရွေးချယ်ခံရခြင်းသည် မြန်မာအမျိုးသမီး အင်ဂျင်နီယာတစ်ဦး၏ နိုင်ငံတကာအာကာသနည်းပညာကဏ္ဍတွင် ရရှိထားသည့် အောင်မြင်မှုမှတ်တိုင်တစ်ရပ်အဖြစ် မှတ်ယူနိုင်ကြောင်း MASES က ဖော်ပြထားသည်။
ဓာတ်ပုံ-MASES