ဒေသတွင်း စီးပွားရေး၊ ကုန်သွယ်ရေးနှင့် ချစ်ကြည်ရေး ပူးပေါင်းဆောင်ရွက်မှုများ တိုးမြှင့်မည်
တရုတ်နိုင်ငံ အန်ဟွေးပြည်နယ် ဟွမ်ရှန်မြို့တွင် “2026 RCEP Local Governments and Friendship Cities Cooperation (Huangshan) Forum” ကို မေလ ၂၈ ရက် နံနက်ပိုင်းက ကျင်းပခဲ့ပြီး RCEP အဖွဲ့ဝင်နိုင်ငံများအကြား ဒေသဆိုင်ရာ ပူးပေါင်းဆောင်ရွက်ရေး၊ စီးပွားရေးနှင့် ယဉ်ကျေးမှုဖလှယ်ရေးများကို မြှင့်တင်ရန် အဓိက ဆွေးနွေးခဲ့ကြသည်။
ဖိုရမ်ဖွင့်ပွဲ အခမ်းအနားကို အန်ဟွေးပြည်နယ်အစိုးရ အုပ်ချုပ်ရေးမှူး ဝမ်ချင်းရှန်က အစီအစဉ်မှူးအဖြစ် ဆောင်ရွက်ခဲ့ပြီး တရုတ်နိုင်ငံ အမျိုးသားပြည်သူ့ကွန်ဂရက် အမြဲတမ်းကော်မတီ ဒုတိယဥက္ကဋ္ဌ ထီးနင်းက အဖွင့်မိန့်ခွန်း ပြောကြားခဲ့သည်။
ထို့ပြင် အန်ဟွေးပြည်နယ် ကွန်မြူနစ်ပါတီ အတွင်းရေးမှူး လျန်ယန်ရွှန်း၊ မလေးရှား အထက်လွှတ်တော် ဒုတိယဥက္ကဋ္ဌ နူးဂျက်ဇ်လန်၊ တရုတ်ပြည်သူ့ချစ်ကြည်ရေးအသင်း ဥက္ကဋ္ဌ ယန်ဝမ်မင်း၊ ASEAN အတွင်းရေးမှူးချုပ် ကောင်းကင်ဟွန်း (ဗီဒီယိုမိန့်ခွန်း) အပါအဝင် ဒေသတွင်း အစိုးရ၊ သံတမန်နှင့် နိုင်ငံတကာအဖွဲ့အစည်း ကိုယ်စားလှယ်များ တက်ရောက်ခဲ့ကြသည်။
ကမ္ဘောဒီးယားနိုင်ငံ ပရဟ်စီဟနုခ်ပြည်နယ် အုပ်ချုပ်ရေးမှူး မန်စီနက်၊ တရုတ်နိုင်ငံဆိုင်ရာ ဗီယက်နမ်သံအမတ် ဖမ်သန်းဘင်၊ ASEAN-China Centre အထွေထွေအတွင်းရေးမှူး ရှီကျုံးကျွန်၊ Trilateral Cooperation Secretariat အတွင်းရေးမှူးချုပ် လီဟီးဆပ်နှင့် တရုတ်ကုန်သွယ်ရေးဝန်ကြီးဌာနမှ ဖူဘိုတို့လည်း မိန့်ခွန်းအသီးသီး ပြောကြားခဲ့ကြသည်။
ဖိုရမ်၏ ဒုတိယအစီအစဉ်အဖြစ် Keynote Speeches, Project Signing and Initiative Launch ကို ဆက်လက်ကျင်းပခဲ့ပြီး ရှန်ဟိုင်း နိုင်ငံတကာလေ့လာရေးသိပ္ပံ၏ ဒုတိယဥက္ကဋ္ဌ လီခိုင်ရှန်းက အစီအစဉ်မှူးအဖြစ် ဆောင်ရွက်ခဲ့သည်။
APEC China Business Council အမှုဆောင် ဒုတိယဥက္ကဋ္ဌ ကျန်းရှောင်ကန်း၊ လာအိုနိုင်ငံ ခမ်မိုဝမ်ပြည်နယ် ပါတီအတွင်းရေးမှူး ဇိုင်ဆာနာ ခော့ဖိုသုန်း နှင့် China Institute for Reform and Development ဥက္ကဋ္ဌ ချီဖူလင်တို့က RCEP အဖွဲ့ဝင်နိုင်ငံများအကြား ဒေသဆိုင်ရာ စီးပွားရေး ပူးပေါင်းဆောင်ရွက်မှု အလားအလာများအပေါ် အဓိကထား ဆွေးနွေးခဲ့ကြသည်။
ထို့နောက် သိပ္ပံနှင့်နည်းပညာ၊ စီးပွားရေးနှင့် ကုန်သွယ်ရေး၊ ယဉ်ကျေးမှုဖလှယ်ရေးနှင့် ညီအမမြို့တော်ဆက်ဆံရေးဆိုင်ရာ ပူးပေါင်းဆောင်ရွက်မှု စီမံကိန်းများကို လက်မှတ်ရေးထိုးခဲ့ကြသည်။
ဖိုရမ်အတွင်း “East Huangshan RCEP Demonstration Zone for Local Exchange and Cooperation” တည်ဆောက်ရေး အစီအစဉ်ကိုလည်း Huangshan Municipal People’s Government၊ Beijing Urban Construction Group Co., Ltd.၊ Thai Chinese Chamber of Commerce နှင့် RCEP အဖွဲ့ဝင်နိုင်ငံများရှိ Anhui မူရင်း တရုတ်လူမျိုးအဖွဲ့အစည်းများ ပူးပေါင်း၍ စတင်ကြေညာခဲ့သည်။
အဆိုပါဖိုရမ်သည် RCEP အဖွဲ့ဝင်နိုင်ငံများအကြား ဒေသဆိုင်ရာ ချိတ်ဆက်မှုများ တိုးမြှင့်ရေး၊ ရင်းနှီးမြှုပ်နှံမှုနှင့် ကုန်သွယ်မှု အခွင့်အလမ်းများ ဖန်တီးရေး၊ ယဉ်ကျေးမှုနှင့် လူမှုရေး ပူးပေါင်းဆောင်ရွက်မှုများ ခိုင်မာလာစေရေးတို့အတွက် အရေးပါသည့် နိုင်ငံတကာဆွေးနွေးပွဲတစ်ရပ်အဖြစ် သတ်မှတ်ခံထားရသည်။