စက်သုံးဆီချွေတာရေးအတွက် ကားလိုင်စင် သက်သေခံကတ်ပြား ဝှီးတက်ပေါ်က QR code ကို Scan ဖတ်ပြီးမှသာ ဆီဖြည့်ရာတွင် အခက်အခဲအချို့ရှိနေကြောင်း သိရသည်။
အဓိကအားဖြင့် မော်တော်ယာဉ်ဝှီးတက်( Wheel Tax) ကို Scan ဖတ်ရာ၌ အခြားယာဉ်နံပါတ်များ ပေါ်နေခြင်း၊ Barcode များ ပျက်နေခြင်း၊ ဆီထည့်ပြီးသား ကားနံပတ်များ ပြန်ပေါ်နေခြင်း၊ ကညနတွင် စာရင်းမရှိကြောင်း ဖော်ပြခြင်းများလည်း ကြုံနေရကြောင်း သိရသည်။
“ကျွန်တော့်ကားက နှစ်ရက်ရှိပြီ ဆီမထည့်ထားတာ၊ စုံမကြောင့် ၊ ဒီနေ့ သိမ်ဖြူ Max မှာ ဆီသွားတန်းတော့ ရောက်တဲ့အခါ ဒီကားက တာမွေဆီဆိုင်မှာ မနက် ကိုးနာရီခွဲက ထည့်ပြီးသွားပြီဆိုပြီး ပြနေတယ်၊ ကိုယ်ကဆီကုန်မှာစိုးလို့ ထွက်ကိုမထွက်ရတာ၊ ဒါကို ဘယ်ကနေ ဘယ်လို ထည့်သွားတာတုန်း၊ အဲလိုတွေလွဲနေတယ်” ဟု ကိုယ်တိုင်ကြုံတွေ့သူတစ်ဦးက ပေါ်ပြူလာနယူးစ်ကို ပြောသည်။
ဆီဆိုင်ကလည်း ကညနကို ညွှန်းသောကြောင့် ကညနသို့သာ သွားရန်ရှိသည်ဟု ၎င်းက ဆက်လက်ပြောကြားခဲ့သည်။
နေပြည်တော်၊ ရန်ကုန်၊ မန္တလေးနှင့် တောင်ကြီးမြို့များတွင် QR စနစ်ဖြင့် ဆီဖြည့်ခြင်းကို မတ် ၁၂ ရက်မှစတင်ကာ စမ်းသပ်အသုံးပြုနေခြင်းဖြစ်သည်။
“ဘားကုတ်ပျက်နေရင် အသစ်ပြန်ရို-က်ပေးတယ်။ ကားနံပါတ်နဲ့ ဘားကုတ်လွဲနေရင်လည်း ဘားကုတ်အသစ် ပြန်လုပ်ပေးတယ်။ ကညနရုံးတွေမှာ သွားပြင်လို့ရတယ်”ဟု ပြန်လည်ပြင်ဆင်ခဲ့သူတစ်ဦးကလည်း လူမှုကွန်ယက်တွင် ရေးသားထားသည်။
ယနေ့ ရန်ကုန်မြို့တွင်မူ စုံမစနစ်၏ ပညာပေးကာလပြီးဆုံးပြီ ဖြစ်သောကြောင့် အရေးယူမည့် ပထမဆုံးနေ့ ဖြစ်သည်။
ရန်ကုန်မြို့တွင်း ယာဉ်သွားလာမှုနည်းပါးနေသည်ကို တွေ့ရပြီး စက်သုံးဆီဆိုင်အချို့တွင်မူ ကားတန်းစီမှုများ ရှိနေသည်။