Peace Corps အဖွဲ့ မြန်မာနိုင်ငံအတွင်း လုပ်ငန်းများ ရပ်ဆိုင်းမှု အခြေခံပညာကျောင်းသားများအတွက် နစ်နာမှုဖြစ်စေခဲ့
မြန်မာနိုင်ငံမှာ ၂ဝ၁၆ ခုနှစ်ကစပြီး အင်္ဂလိပ်စာ သင်ကြားပို့ချပေးတဲ့ လုပ်ငန်းတွေ စတင်ခဲ့တဲ့Peace Corps အဖွဲ့က မြန်မာနိုင်ငံအတွင်း ၎င်းတို့ရဲ့ လုပ်ငန်းတွေကို ရပ်ဆိုင်းလိုက်ပြီလို့ ကြေညာချက်ထုတ်ပြန်လိုက်ပါတယ်။
နိုင်ငံတကာ လူမှုအသိုင်းအဝိုင်းကို အကူအညီပေးဖို့ရည်ရွယ်ချက်နဲ့ ၁၉၆၁ ခုနှစ်မှာ အမေရိကန် သမ္မတ John F Kennedy ဖွဲ့စည်းပေးခဲ့တဲ့ အမေရိကန် Peace Corps စေတနာ့ဝန်ထမ်းအဖွဲ့ကြီးဟာ နိုင်ငံပေါင်း ၁၄၂ နိုင်ငံမှာ စေတနာ့ဝန်ထမ်းပေါင်း ၂ သိန်း ၄ သောင်း ကျော် နဲ့ လူမှုအသိုင်းအဝိုင်းကို အထောက်အကူပြုနေကြတာဖြစ်ပါတယ်။
မြန်မာနိုင်ငံမှာဆိုရင်လည်း အင်္ဂလိပ်စာ သင်ကြားပို့ချပေးဖို့ စေတနာ့ဝန်ထမ်း ၈၇ ယောက်အထိ စေလွှတ်ပေးခဲ့တဲ့ အဖွဲ့လည်းဖြစ်ပါတယ်။
အဲ့ဒီအဖွဲ့ဟာ မြန်မာနိုင်ငံမှာ ကိုဗစ်ကပ်ရောဂါကြောင့် လုပ်ငန်းတွေ ၂၀၂၀ ပြည့် မတ်လ နောက်ပိုင်းကစပြီ ခေတ္တရပ်နားထားတဲ့ အဖွဲ့တစ်ခုဖြစ်ပါတယ်။
Peace Corps အမှုဆောင် အရာရှိချုပ် Carol Spahn က မတည်ငြိမ်မှုတွေ၊ ဆူပူမှုတွေနဲ့ လက်နက်ကိုင် ပဋိပက္ခတွေ ဆက်လက် ပေါ်ပေါက် နေပြီး စေတနာ့ဝန်ထမ်းတွေ ဘေးအန္တရာယ်ကင်းကင်း အလုပ်လုပ်နိုင်မှာ မဟုတ်တာကြောင့် လုပ်ငန်းတွေ ရပ်ဆိုင်းမှာဖြစ်ကြောင်းတနင်္လာနေ့မှာ ကြေညာချက်ထုတ်ပြန် ပြောဆိုထားတာရှိပါတယ်။
ဒါ့အပြင် Peace Corps စေတနာ့ဝန်ထမ်းတွေ မြန်မာနိုင်ငံမှာ လုပ်ငန်းတွေ မလုပ်နိုင်ပေမဲ့ ကမ္ဘာတလွှားက ကျန်းမာရေးနဲ့ လုံခြုံရေးအတွက် စိတ်ချရတဲ့ နေရာတွေမှာ အလုပ်လုပ်ကြမှာ ဖြစ်ကြောင်းနဲ့ တချိန်ချိန် မြန်မာနိုင်ငံမှာ အခြေအနေတွေ ပြန်လည်ကောင်းမွန်လာရင်တော့ လုပ်ငန်းတွေ ပြန်စမှာ ဖြစ်ကြောင်းလည်း ပြောပါတယ်။
မြန်မာ့ပညာရေးအကဲခတ်တွေကတော့ Peace Corps စေတနာ့ဝန်ထမ်းတွေ မြန်မာနိုင်ငံကနေ စွန့်ခွာသွားခြင်းက အခြေခံပညာကျောင်းသားတွေရဲ့ အင်္ဂလိပ်စာသင်ယူမှုတွေအပေါ် နစ်နာမှုဖြစ်စေတယ်လို့ ထောက်ပြကြပါတယ်။
