NLD အစိုးရလက်ထက်က MOU လက်မှတ်ထိုးခဲ့သော ရှမ်းပြည်နယ်(တောင်ပိုင်း) တောင်ကြီးခရိုင် ကလောမြို႔နယ်၊ အင်းခေါင်းကျေးရွာအနီး တည်ဆောက်မည့် နိုင်ငံတကာအဆင့်မီ ဂေါက်ကွင်းနှင့် ဟိုတယ်လုပ်ငန်းများ အပါအဝင် အိမ်ရာမြေ ဖော်ထုတ်ခြင်း စီမံကိန်းများအတွက် အကျိုးတူပူးပေါင်းဆောင်ရွက်ရန် ချုပ်ဆိုသည့် အကောင်အထည်ဖော်ရေးဆိုင်ရာ မူဘောင် သဘောတူစာချုပ် (FrameWork Agreement)ကို လက်ရှိ ရှမ်းပြည်နယ် စီမံအုပ်ချုပ်ရေးကောင်စီနှင့် နိုဝင်ဘာလ ဒုတိယပတ်က လက်မှတ်ရေးထိုးပြီး ဖြစ်ကြောင်း သိရသည်။
အဆိုပါ စီမံကိန်းကို ကုမ္ပဏီပိုင်မြေ ၃၁၄ ဒသမ ၄၂ ဧကတွင် Heho Resort (InnKhaung) Co.,Ltd က တည်ဆောက်ရန် ၂၀၁၉ ခုနှစ်၊ ၾသဂုတ်လ (၂၇)ရက်က စီမံကိန်းအကောင်အထည်ဖော် တည်ဆောက်ခြင်းလုပ်ငန်း ဖြစ်မြောက်နိုင်စွမ်း လေ့လာရန် ချုပ်ဆိုသည့် နားလည်မှုစာချွန်လွှာ (MoU)ကို လက်မှတ်ရေးထိုးခဲ့ကာ ယခုအခါ မူဘောင်သဘောတူစာချုပ် FrameWork Agreement လက်မှတ်ရေးထိုး ခြင်းလည်း ဖြစ်သည်။
အဆိုပါ နိုင်ငံတကာအဆင့်မီ ဂေါက်ကွင်းနှင့် ဟိုတယ်လုပ်ငန်းများ အပါအဝင် အိမ်ရာမြေ ဖော်ထုတ်ခြင်း စီမံကိန်းများအတွက် ရင်းနှီးမြှုပ်နှံမှုတန်ဖိုးမှာ ကျပ်သန်း ၄၀၀၀ ဖြစ်ကြောင်းသိရသည်။
ရှမ်းပြည်နယ်အတွင်း တွင် အိမ်ရာ စီမံကိန်းလုပ်ငန်း(၁၆)ခု၊ ဟိုတယ်နှင့် အပန်းဖြေစခန်း စီမံကိန်း(၄)ခု၊ ရုပ်မြင်သံကြား စတူဒီယို တည်ဆောက်ရေး စီမံကိန်း(၁)ခု၊ အခြားစီးပွားရေးလုပ်ငန်း စီမံကိန်း(၉)ခု၊ လျှပ်စစ်ဓါတ်အား ဖြန့်ဖြူးရေးလုပ်ငန်း စီမံကိန်း(၄၂)ခု ဖြစ်ကြောင်း၊ ယင်းတွင် MoA(၂၈)ခု၊ MoU(၄၂)ခု၊ FrameWork Agreement (၃)ခုတို႔ကို လုပ်ဆောင်မည် ဖြစ်ကြောင်း ရှမ်းပြည်နယ် အစိုးရအဖွဲ႔ ၏ မှတ်တမ်းများ အရ သိရသည်။
ဟဲဟိုးသည် ယခင်က ဓနုတိုင်းရင်းသားများ နေထိုင်သော ရွာတစ်ရွာသာဖြစ်ပြီး ၁၉၂၀ ပြည့်နှစ်မှစတင်၍ မြို႔အဖြစ် ခေါ်ဝေါ်ခဲ့ခြင်း ဖြစ်သည်။ပင်လယ်ရေမျက်နှာပြင်ထက် ၃၈၅၈ ပေ တည်ရှိပြီး စိုက် ပျိုးရေးကို အဓိကထားသော ဒေသလည်း ဖြစ်သည်။ ယခုအခါ ရှမ်းပြည်နယ်သို႔လာရောက်သည့် ကမ္ဘာလှည့်ခရီးသည်များ တစ်ထောက်နားရာမြို႔ဖြစ်ကာ ဓနု၊ တောင်ရိုး၊ ပအိုဝ်း၊ ရှမ်း၊ ဗမာ၊ အင်းသား စသည့်တိုင်းရင်းသားများ စုပေါင်းနေထိုင်ကြသည့် အနက် ဓနုတိုင်းရင်းသား အများဆုံး နေထိုင်သော မြို႔ ဖြစ်ကြောင်း သိရသည်။