ဆိုလ်း၊ ဇူလှိုင် ၁၁
ကေပေါ့ ယောက်ျားလေးအဖွဲ့ အန်စီတီ (NCT) ၏အဖွဲ့ဝင်ဟောင်းတစ်ဦးဖြစ်သူ တေးအိုင်လ် ဟုလည်းသိကြသည့် မွန်းတေးအိုင်လ်သည် ကြံရာပါ ၂ ဦးဖြင့် အရက်မူးနေသော အမျိုးသမီးတစ်ဦးကို အဓမ္မပြုကျင့်မှုဖြင့် ဇူလိုင်လ ၁၀ ရက် နေ့က ထောင်ဒဏ် သုံးနှစ်နှင့် ခြောက်လ ချမှတ်ခံခဲ့ရသည်။
ဆိုလ်းဗဟို တရားရုံးက မွန်း ၃၁ နှစ်ကို မုဒိမ်းမှုဖြင့် အပြစ်ရှိကြောင်း တွေ့ရှိခဲ့သည်။
ကျူးလွန်သူ နှစ်ဦး သို့မဟုတ် ထို့ထက်ပိုသော ကျူးလွန်သူများသည် သတိလစ်မေ့မြောနေသော သို့မဟုတ် ခုခံနိုင်စွမ်းမရှိသော သားကောင်ကို မုဒိမ်းကျင့်မှုဖြင့်စွဲချက်တင်ခြင်း အကျုံးဝင်ပါသည်။ လီ နှင့် ဟွန် ဟု အမည်ပေးထားသည့် ပူးတွဲတရားခံများသည်လည်း အလားတူ ထောင်ဒဏ်များ ချမှတ်ခံခဲ့ရသည်။
စီရင်ချက်ချပြီးနောက် သုံးဦးစလုံးကို ဖမ်းဆီးထိန်းသိမ်းလိုက်သည်။ တရားရုံးသည် ၎င်းတို့ကို လိင်ပိုင်းဆိုင်ရာ အကြမ်းဖက်မှု ကုသရေး အစီအစဉ်ကို နာရီ ၄၀ တက်ရောက်ရန်လည်း အမိန့်ပေးခဲ့သည်။
“တရားခံတွေက အရက်မူးပြီး ခုခံနိုင်စွမ်းမရှိတဲ့ သားကောင်ကို လိင်ပိုင်းဆိုင်ရာအပြုအမူများ တလှည့်စီ ကျူးလွန်ခဲ့ကြတယ်။ သက်သေထွက်ဆို ချက်များအရ ထိုအမျိုးသမီးသည် အလွန်အမင်း အရက်မူးနေပြီး ခုခံနိုင်စွမ်း မရှိခဲ့ပေ။ ထိုပြစ်မှုသည် ကြီးလေးသည့် ပြစ်မှုတစ်ခုဖြစ်သည်” ဟု တရားရုံးက ဆိုသည်။ “မရင်းနှီးတဲ့ ပတ်ဝန်းကျင်မှာ နိုင်ငံခြားသား ခရီးသွားဧည့်သည်တစ်ဦး အဓမ္မပြုကျင့်ခံရတာက စိတ်ပိုင်းဆိုင်ရာ ထိခို-က်မှု အတော်လေးရဖွယ်ရှိပါတယ်”ဟုလည်း တရားရုံးကထပ်မံ ဖော်ပြထားသည်။
သို့သော်လည်း တရားရုံးက သုံးဦးစလုံးသည် ပထမဆုံးအကြိမ် ကျူးလွန်သူများဖြစ်ကြပြီး စွဲချက်များကို ဝန်ခံခဲ့ကြကာ ကျူးလွန်ခံရသူနှင့်လည်း ပြေလည်မှုရရှိခဲ့ကြောင်း သိရ၍ တရားရုံးက အဆိုပါအချက်များကိုထည့်သွင်းစဉ်းစားခဲ့သည်။
အဆိုပါကိစ္စသည် ဆိုးလ်မြို့ရှိ ညဘက်အပန်းဖြေနေရာတစ်ခုဖြစ်သည့် အီထဲဝန်တွင် ၂၀၂၄ ခုနှစ် ဇွန်လတွင် ဖြစ်ပွားခဲ့သော အဖြစ်အပျက်တစ်ခုဖြစ်ပြီး မွန်းနှင့် ၎င်း၏အသိမိတ်ဆွေများသည် ဘားတစ်ခုတွင် ထိုတရုတ်အမျိုးသမီးနှင့် တွေ့ဆုံခဲ့ကြခြင်းဖြစ်သည်။
အတူတူသောက်ကြပြီးနောက် သူသည် အပြင်းအထန်မူးလာခဲ့ပြီး မွန်းသည် သူ့အား လီ နှင့်အတူ တက္ကစီတစ်စီးထဲသို့ ကူညီထည့်ပေးခဲ့ပြီး လီ၏ အိမ်သို့ခေါ်ဆောင်သွားခဲ့သည်။ မွန်း နှင့် ဟွန် တို့သည် သီးခြားစီလိုက်ကြပြီး အဓမ္မပြုကျင့်မှုသည် လီ ၏နေအိမ်တွင် ဖြစ်ပွားခဲ့သည်။
ဇွန်လတွင် အစိုးရရှေ့နေများသည် တရားခွင်အတွင်း တရားခံတစ်ဦးစီအတွက် ထောင်ဒဏ် ခုနစ်နှစ် ချမှတ်ခဲ့သည်။ မွန်း သည် ပထမအကြိမ် ကြားနာမှုတွင် စွဲချက်အားလုံးကို ၀န်ခံခဲ့သည်။
မွန်း ၏အေဂျင်စီဟောင်းဖြစ်သော အက်စ်အမ် ဖျော်ဖြေရေး အဖွဲ့ (SM Entertainment) သည် ၂၀၂၄ ခုနှစ် သြဂုတ်လတွင် အန်စီတီ (NCT) မှထွက်ခွာကြောင်းကြေငြာခဲ့ပြီး ထိုအချိန်တွင် “အဆိုပါကိစ္စရပ်၏ ဆိုးရွားမှုကြောင့်၊သူသည်အဖွဲ့ဝင်အဖြစ်လှုပ်ရှားမှုများကို ဆက်လက် လုပ်ဆောင်နိုင်မည်မဟုတ်ကြောင်းကျွန်ုပ်တို့ဆုံးဖြတ်ခဲ့သည်။”ဟုပြောကြားထားသည်။
မွန်း သည် ၂၀၁၆ ခုနှစ်တွင် အန်စီတီ(NCT) ၏ ပထမဆုံးယူနစ်ဖြစ်သော NCT U ဖြင့် ပွဲဦးထွက်ခဲ့ပြီး နောက်ပိုင်းတွင် ယူနစ်ခွဲ အန်စီတီ ၁၂၇ အဖွဲ့(NCT 127) သို့ ဝင်ရောက်ခဲ့သည်။
Ref: သည်စတွိတ်စ်တိုင်းမ်စ်