ကရင်အမျိုးသားဒီမိုကရက်တစ်ပါတီ(KNDP )အနေဖြင့် လာမည့်ရွှေးကောက်ပွဲကာလတွင် ပြည်နယ်အတွင်း ၌သာ မဲအောင်နိုင်ရေးလုပ်ငန်းများလုပ်ဆောင်သွားရန် ပြန်လည်လျာထားကြောင်း ယင်းပါတီဥက္ကဖြစ်သူ မန်းအောင်ပြည်စိုးက ယနေ့တွင် ပေါ်ပြူလာနယူးစ်သို့ပြောသည်။
KNDP ပါတီအနေဖြင့် ယခင်က နိုင်ငံတဝှမ်း မဲအောင်နိုင်ရေးအတွက် မှတ်ပုံတင်ထားသည့်ပါတီတစ်ခုဖြစ်ပြီး၊ နစက ၏ ၂၀၂၃ ရွေးကောက်ပွဲအတွက် ပါတီမှတ်ပုံတင်ခြင်းလုပ်ငန်းစဉ်များထုတ်ပြန် ပြီးနောက်ပိုင်း ယင်းသို့ ပြောင်းလဲရန်လျာထားခြင်းဖြစ်သည်ဟုဆိုသည်။
“ကျွန်တော်တို့ နဂိုကတော့တစ်ပြည်လုံး အခုကတော့ တစ်ပြည်လုံးအနေနဲ့မလွယ်ဘူးထင်တယ်။ အခုကတော့ ပြည်နယ်အတွင်းဘဲ လုပ်ဖြစ်ဖို့များပ့တယ်။ ပါတီအနေနဲ့တစ်နေရာတည်းဝင်ရင်လည်း ပါတီထောင်ထားတာ သိပ်အဓိပ္ပါယ်မရှိဘူးလေ။ ပြည်နယ်အတွင်း ဝင်ပြိုင်လို့ရမယ့်နေရာတွေက်ုတော့ လုပ်ရမှာပေါ့။ “ဟု ရှင်းပြသည်။
လက်ရှိတွင် ပါတီ မှတ်ပုံတင်ခြင်းအတွက် ယခုရက်ပိုင်းအတွင်း ပါတီတွင်း အစည်းအဝေးတစ်ရပ်ကို ကျင်းပြုလုပ်ရန် စီစဉ်လျက်ရှိကြောင်း သိရသည်။
ရွေးကောက်ပွဲပြုလုပ်ပါက ကရင်ပြည် နယ်အတွင်းရှိနေရာစုံတွင် ဝင်ရောက်ယှဉ်ပြိုင်နိုင်ရေး လုံခြုံရေးအတွက် စိုးရိမ်ပူပန်မှုရှိနေကြောင်း ကရင်အမျိုးသားဒီမိုကရက်တစ်ပါတီ ဉက္ကဌ မန်းအောင်ပြည်စိုးက ယခင်က ပြောကြားထား သည်။
ကရင်အမျိုးသားဒီမိုကရက်တစ်ပါတီအနေဖြင့် ပြီးခဲ့သော ၂၀၂၀ ပြည့်နှစ် ရွေးကောက်ပွဲတွင် ကရင်ပြည်နယ်အတွင်း ပြည်နယ်လွှတ်တော် မဲဆန္ဒနယ်မြေ ၁၁ နေရာတွင် လေးနေရာ၊ ပြည်သူ့လွှတ်တော် မဲဆန္ဒနယ် ၆ နေရာတွင် ငါးနေရာ ၊ အမျိုးသားလွှတ်တော် မဲဆန္ဒနယ် ၁၁ နေရာတွင် ၆ နေရာတို့တွင် ဝင်ရောက်အရွေးခံခဲ့သော်လည်း နေရာတစ်ခုမှရွေးချယ်ခံရခြင်းမရှိဘဲ ရရှိခဲ့သည့် မဲအရေအတွက်မှာမူ ဆိုးဆိုးရွားရွားမဖြစ်ခဲ့ပေ။
ကရင်အမျိုးသားဒီမိုကရက်တစ်ပါတီအား ကရင်ပါတီ သုံးပါတီ ပူးပေါင်းတည်ထောင်ထားခြင်းဖြစ်ပြီး၊ ကရင်ပြည်နယ် ဒီမိုကရေစီနှင့် ဖွံ့ဖြိုးတိုးတက်ရေးပါတီ၊ ကရင်ဒီမိုကရက်တစ်ပါတီ၊ စည်းလုံးညီညွှတ်သောကရင်အမျိုးသားဒီမိုကရက်တစ်ပါတီတို့ဖြင့် ၂၀၁၈ခုနှစ် ဖေဖော်ဝါရီ ၂၂ရက်တွင် တည်ထောင်ထားခြင်းဖြစ်သည်။
