လာမည့် ၂၀၂၆-၂၀၂၇ ပညာသင်နှစ်တွင်တက်ရောက်ပညာသင်ကြားမည့် G-2 မှ G-12 အထိ ကျောင်းသား၊ ကျောင်းသူများကို ကျောပိုးအိတ်အလုံး(၅၀၀)ကို “ထိုက်သူပန်”တိုင်းရင်းဆေးဝါးထုတ်လုပ်ရေးမှ မေ ၃၀ ရက်(နယုန်လပြည့်နေ့)တွင်လှူဒါန်းပေးသွားမည်ဖြစ် ကြောင်း သိရသည်။
” ကျောင်းသားမိဘတွေအနေနဲ့ ကလေးတွေအတွက် ကျောပိုးအိတ်ဝယ်ရင်ကုန်ကျမယ့်ငွေကြေးတွေကို တစ်ခြားလိုအပ်တဲ့နေရာတွေမှာအသုံးပြုလို့ရအောင် အခုလို ကျောင်းသားတွေအတွက် ကျောပိုးအိတ်အလုံး (၅၀၀)လှူဒါန်းပေးဖို့စီစဥ်တာပါ။ နှစ်တိုင်းကျောင်းဖွင့်ချိန်ရောက်ခါနီးရင်အခုလိုလှူဖြစ်တာက အာဟာရဒါနစကျွေးတဲ့အချိန်ထဲကပါဘဲ (၅)ကြိမ်ရှိပါပြီ”ဟု ထိုက်သူပန် တိုင်းရင်းဆေးဝါးထုတ်လုပ်ရေး၏ပဲ့ကိုင်ရှင်ဦးစိုးလှမြင့်က ပြော သည်။
ကျောပိုးအိတ်အလှူခံမည့် ကျောင်းသား၊ ကျောင်းသူများအနေဖြင့် မေ ၂၃ ရက်မှ မေ ၂၇ ရက်အထိ နံနက် စာအာဟာရဒါနအလှူအပြီး နံနက် ၁၀ နာရီမှ မွန်းတည့် ၁၂ နာရီအတွင်းနှင့် ညနေစာအာဟာရဒါနမလှူခင် နေ့လည် ၃ နာရီခွဲမှ ညနေ ၅ နာရီအတွင်း ကျောပိုးအိတ်အလှူခံရန် အမည်စာရင်းပေးပြီး တုံကင်ယူရမည်ဖြစ် ကြောင်း သိရသည်။
အဆိုပါ ကျောပိုးအိတ်များကို မေ ၃၀ ရက်(နယုန်လပြည့်နေ့)ညနေ ၄ နာရီမှ ညနေ ၅ နာရီအတွင်း ညနေစာအာဟာရဒါနအလှူမစတင်မီအချိန်တွင်လှူဒါန်းပေးသွားမည်ဖြစ်ရာ အလှူခံမည့် ကျောင်းသား၊ ကျောင်းသူများအနေဖြင့် ကျောင်းဝတ်စုံဖြင့်အလှူခံရယူရမည်ဖြစ် ကြောင်း သိရသည်။
ပုံစာ-ယမန်နှစ်က ကျောပိုးအိတ်လှူဒါန်းခဲ့သည့်မြင်ကွင်း။