FATF မှ ထုတ်ပြန်သည့် ဆုံးရှုံးနိုင်ခြေမြင့်မားခြင်း နှင့် အခြား စောင့်ကြည့်ရမည့် နိုင်ငံနှင့် ဒေသများအနက် မြန်မာနိုင်ငံသည် အကြံပြချက် (၄) ချက်အနက် တစ်ချက်လျော့သွားခဲ့ပြီဖြစ်ကြောင်း သိရသည်။
FATF ၏ အကြံပြုချက်များအပေါ် မြန်မာနိုင်ငံအနေဖြင့် လိုက်နာအကောင်အထည် ဖော်ဆောင်ရွက်လျက်ရှိပြီး အကြမ်းဖက်မှုတိုက်ဖျက်ရေးဥပဒေအား ပြင်ဆင်ခြင်း၊ ယုံမှတ်အပ်နှံမှုဥပဒေအား ပြင်ဆင်ခြင်း၊ သက်သေခံ ပစ္စည်းများ စီမံရေးထိန်းသိမ်းရေးနှင့် စီမံခန့်ခွဲရေးဥပဒေ အား အသစ်ပြင်ဆင်ပြဋ္ဌာန်းခြင်းတို့အပါ အဝင် သိသာ ထင်ရှားသော တိုးတက်ဆောင်ရွက်မှုများ ဆောင်ရွက်ခဲ့ခြင်းကြောင့် ဖြစ်ကြောင်း သိရသည်။
ငွေကြေးဆိုင်ရာအရေးယူဆောင်ရွက်ရေးအဖွဲ့ (Financial Action Task Force-FATF) ၏ မျက်နှာစုံညီအစည်းအဝေးကို ၂၀၂၅ ခုနှစ်၊ အောက်တိုဘာလ ၂၂ ရက်မှ ၂၄ ရက်အထိ ပြင်သစ်နိုင်ငံ၊ ပါရီမြို့၌ ကျင်းပပြုလုပ်ခဲ့သည်။
အဆိုပါအစည်းအဝေးကို FATF ဥက္ကဋ္ဌ မက္ကဆီကို နိုင်ငံသူ Ms. Elisa de Anda Madrazo ဦးဆောင်မှုအောက်တွင် ကျင်းပပြုလုပ်ခဲ့ခြင်းဖြစ်ပြီး မျက်နှာစုံညီအစည်းအဝေးမတိုင်ခင် အောက်တိုဘာလ ၂၀ ရက်နှင့် ၂၁ ရက်နေ့တို့တွင် လုပ်ငန်းအဖွဲ့အစည်းအဝေးများ ကျင်းပခဲ့ကြောင်း သိရသည်။
အစည်းအဝေးများသို့ နိုင်ငံနှင့် ဒေသပေါင်း ၂၀၀ ကျော်မှ ကိုယ်စားလှယ်များ တက်ရောက်ခဲ့ပြီး ငွေကြေးခဝါချမှုတို-က်ဖျ-က်ရေး (Anti Money Laundering-AML)၊ အကြမ်းဖက်မှုကို ငွေကြေးထောက်ပံ့မှုတို-က်ဖျ-က်ရေး( Countering the Financing of Terrorism-CFT) လူအများအပြားသေကျေစေသည့်လက်နက်များပြန့်ပွားရေးကို ငွေကြေးထောက်ပံ့မှု တို-က်ဖျ-က်ရေး (Countering the Proliferation of Financing of Weapon of Mass Destruction-CPF ) ဆိုင်ရာ အဓိကကိစ္စရပ်များကို ဆွေးနွေးခဲ့ကြောင်း သိရသည်။
အဆိုပါအစည်းအဝေးများအပြီးတွင် ဆုံးရှုံးနိုင်ခြေမြင့်မားခြင်းနှင့် အခြား စောင့်ကြည့်ရမည့် နိုင်ငံနှင့် ဒေသများ (High-risk and other monitored jurisdictions) စာရင်းအား ထုတ်ပြန်မည်ဖြစ်သည်ဟုဆိုသည်။
မြန်မာနိုင်ငံအနေဖြင့်၂၀၂၅ ခုနှစ်၊ ဇွန်လတွင် FATF မှ ထုတ်ပြန်သည့် High-risk and other monitored jurisdictions စာရင်း (High-Risk Jurisdictions subject to a Call for Action – 13 June 2025) တွင် ပါရှိပြီး (၅) ချက်အား အကောင်အထည်ဖော် ဆောင်ရွက်ရန် ဖော်ပြထားသည်။
သို့သော် ၂၀၂၅ ခုနှစ်၊ အောက်တိုဘာလ ၂၄ ရက်တွင် FATF မှ ထုတ်ပြန်သည့် ဆုံးရှုံးနိုင်ခြေမြင့်မားခြင်း နှင့် အခြား စောင့်ကြည့်ရမည့် နိုင်ငံနှင့် ဒေသများတွင် မြန်မာနိုင်ငံအနေဖြင့် အကြံပြုချက်တစ်ချက် လျော့သွားခြင်းဖြစ်သည်။