EV တင်သွင်းရာတွင် လျှပ်စစ်သုံးယာဉ်အရောင်းပြခန်းဖွင့်လှစ်နိုင်ရေးအနိမ့်ဆုံးစံနှုန်းသတ်မှတ်ချက် သတ်မှတ်ရာ၌ ခြံအကျယ်အဝန်း ၁၀,၀၀၀ စတုရန်းပေ (အရောင်းပြခန်းနှင့် Service Center ဧရိယာနှင့် ဧည့်နားနေခန်း၏ စုစုပေါင်းဧရိယာသည် ၅,၀၀၀ စတုရန်းပေရှိရမည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန သတ်မှတ်ထုတ်ပြန်ထားသည်။
ယင်းတွင် Pilot Project ကာလအတွင်း ပြည်ပမှ လျှပ်စစ်သုံးယာဉ်တင်သွင်းခြင်းဆိုင်ရာ လိုက်နာရမည့်စည်းကမ်းချက်များကို မေလ ၂၉ ရက် ရက်စွဲဖြင့် သတ်မှတ်ထုတ်ပြန်ခဲ့ရာ သတ်မှတ်ထားသည့်စံချိန်စံညွှန်းနှင့်ခွင့်ပြု ထားသည့် အစီးအရေအတွက်ကိုသာ တင်သွင်းရမည်ဖြစ်သည်။
ထို့ပြင် လျှပ်စစ်သုံးယာဉ်တင်သွင်းမည့်ကုမ္ပဏီသည် တင်သွင်းမည့်လျှပ်စစ်သုံးယာဉ်များအတွက် လိုအပ်သည့် အာမခံမှု၊ အပိုပစ္စည်းများ (Spare Parts) ရရှိနိုင်မှုနှင့် ရောင်းချပြီးနောက်ပိုင်းပြင်ဆင်မှုများ (After-Sale Service) ကို ဆောင်ရွက်နိုင်သည့် အစီအမံထားရှိရမည်ဖြစ်ကြောင်း သတ်မှတ်ထားသည်။
သက်ဆိုင်ရာတိုင်းဒေသကြီး သို့မဟုတ် ပြည်နယ်အစိုးရအဖွဲ့၏ ခွင့်ပြုမိန့်နှင့်သက်ဆိုင်ရာ စည်ပင်သာယာရေးအဖွဲ့များထံမှ လုပ်ငန်းလိုင်စင်နှင့် လျှပ်စစ်သုံးမော်တော်ယာဉ်အသစ်များ ဖြန့်ဖြူးရောင်းချရေး ကိုယ်စားလှယ် (Distributorship) သို့မဟုတ် အရောင်းကိုယ်စားလှယ် (Dealership) အဖြစ် တရားဝင်ခန့်အပ်ခြင်းခံရသည့် ကုမ္ပဏီဖြစ်ရမည် ဖြစ်သည်။
ထို့ပြင် အခွန်ကင်းရှင်းကြောင်း၊ အရောင်းပြခန်းဖွင့်လှစ်မည့်နေရာ၊ အဆောက်အဦး၊ သိုလှောင်ရုံတို့ကို ထုတ်ပြန်သောစံနှုန်း သတ်မှတ်ချက်များနှင့်အညီ လိုက်နာဆောင်ရွက်ရမည်ဖြစ်သည်။
အရောင်းပြခန်းနှင့် သိုလှောင်ရုံနေရာသည် ယင်းအရောင်းပြခန်းဖွင့်လှစ်မည့် သက်ဆိုင်ရာ တိုင်းဒေသကြီး သို့မဟုတ် ပြည်နယ်တစ်ခုအတွင်း၌သာ တည်ရှိရမည်ဖြစ်ပြီး ဗဟိုဘဏ်က အသိအမှတ်ပြုသည့် ဘဏ်တွင် မြန်မာငွေကျပ်သိန်း ၅၀၀ ပေးသွင်းထားကြောင်း ဘဏ်အာမခံချက် (Bank Guarantee) တင်ပြရမည်ဟု ဖော်ပြထားသည်။
ဤအမိန့်ကြော်ငြာစာပါ လျှပ်စစ်သုံးယာဉ်ဟူသောစကားရပ်တွင် လျှပ်စစ်သုံးလူစီးယာဉ်နှင့် ခရီးသည် တင်ယာဉ်တို့အကျုံးဝင်ပြီး ဘက်ထရီသုံးလျှပ်စစ်သုံးယာဉ် (Battery Electric Vehicle-BEV) ယာဉ်များသာ ဖြစ်ကြောင်း၊ ၂၀၂၅ ခုနှစ်၊ ဇန်နဝါရီလမှ ၂၀၂၆ ခုနှစ်၊ မတ်လ ၃၁ ရက်နေ့အထိအကျိုးသက်ရောက်စေရးမည်ဖြစ်သည်။
ပူးတွဲဖော်ပြချက်အရလျှပ်စစ်သုံးယာဉ်အရောင်းပြခန်းဖွင့်လှစ်နိုင်ရေးအနိမ့်ဆုံးစံနှုန်းသတ်မှတ်ချက်များတွင် ခြံအကျယ်အဝန်း၁၀,၀၀၀ စတုရန်းပေ (အရောင်းပြခန်းနှင့် Service Center ဧရိယာနှင့် ဧည့်နားနေခန်း၏ စုစုပေါင်းဧရိယာသည် ၅,၀၀၀ စတုရန်းပေရှိရမည်။)၊ ၅,၀၀၀ စတုရန်းပေ (အမိုး၊ အကာ တည်ဆောက်ပြီးဖြစ်ရမည်၊ သိုလှောင်ရုံအတွင်းရှိ ပစ္စည်းများရှင်းလင်းပြီးဖြစ်ရမည်ဖြစ်သလို ၅၀ စတုရန်းပေ ( Distributor/Dealer အဖြစ် ခန့်အပ်ခံရသည့် ယာဉ်၏ အမှတ်တံဆိပ်ကို နိုင်ငံတကာစံနှုန်းနှင့်အညီ တပ်ဆင်ရမည်။)ဟု သိရသည်။