ပါရီ၊ ဩဂုတ် ၁
ပြင်သစ်နိုင်ငံ ပါရီမြို့တွင် ကျင်းပလျက်ရှိသည့် Esports World Cup (EWC 2026) ၏ Mobile Legends: Bang Bang Mid Season Cup (MSC 2026) ပြိုင်ပွဲကြီးတွင် မြန်မာကိုယ်စားပြု Yangon Galacticos (YG) အသင်းသည် ဖိလစ်ပိုင်အသင်းကြီးဖြစ်သော Team Falcons PH ကို အကြိတ်အနယ် ယှဉ်ပြိုင်အနိုင်ယူကာ Grand Final (ဗိုလ်လုပွဲ) သို့ ပထမဆုံးအကြိမ် တက်ရောက်သွားပြီ ဖြစ်သည်။
ဇူလိုင် ၃၁ ရက်ညက ကျင်းပခဲ့သည့် ဆီမီးဖိုင်နယ် ပွဲစဉ်တွင် YG အသင်းသည် အင်အားကြီး ဖိလစ်ပိုင်ကလပ်ကို ၅ ပွဲမြောက် (Game 5) အထိ အစွမ်းကုန်ယှဉ်ပြိုင်ခဲ့ရပြီး ၃ ပွဲ – ၂ ပွဲ (၃-၂) ရလဒ်ဖြင့် သမိုင်းဝင် အောင်ပွဲကို ဖော်ဆောင်နိုင်ခဲ့ခြင်း ဖြစ်သည်။ ဤနိုင်ပွဲသည် ၂၀၁၉ ခုနှစ်နောက်ပိုင်း MSC ဗိုလ်လုပွဲများတွင် ဖိလစ်ပိုင်အသင်းများ အမြဲတမ်း ပါဝင်နေကျ စံချိန်ကို ပထမဆုံးအကြိမ် ရိုက်ချိုးနိုင်ခဲ့ခြင်းလည်း ဖြစ်သည်။
YG အသင်းသည် ယခုပြိုင်ပွဲတစ်လျှောက် အုပ်စုအဆင့်မှစတင်ကာ ကွာတားဖိုင်နယ်အထိ တစ်ပွဲမှ မရှုံးဘဲ ရှုံးပွဲမရှိ စံချိန် (Unbeaten Run) ဖြင့် ဗိုလ်လုပွဲအထိ တက်လှမ်းလာခဲ့ခြင်း ဖြစ်သည်။ အုပ်စုအဆင့်တွင် ဆော်ဒီအာရေဗျမှ Geekay Esports ကို ၂-၀၊ ကမ္ဘောဒီးယားမှ PRO Esports ကို ၂-၀ ဖြင့်လည်းကောင်း၊ ကွာတားဖိုင်နယ်တွင် PRO Esports အသင်းကို ၃-၀ ဖြင့်လည်းကောင်း ပြတ်ပြတ်သားသား အနိုင်ယူခဲ့သည်။
MSC ပြိုင်ပွဲသမိုင်းတစ်လျှောက် မြန်မာအသင်းတစ်သင်းအနေဖြင့် ဗိုလ်လုပွဲသို့ ပထမဆုံးအကြိမ် တက်ရောက်နိုင်ခဲ့သည့် Yangon Galacticos အသင်းသည် ချန်ပီယံဆုဖလားကြီးကို ဆွတ်ခူးနိုင်ရန်အတွက် ရုရှားအသင်းဖြစ်သော Team Spirit နှင့် ယနေ့ (ဩဂုတ် ၁ ရက်) မြန်မာစံတော်ချိန် ညနေ ၆ နာရီခွဲတွင် အဆုံးအဖြတ် ဗိုလ်လုပွဲ (Best of 7) အဖြစ် ဆက်လက်ယှဉ်ပြိုင် သွားရမည်ဖြစ်သည်။
