တရုတ်နိုင်ငံ၏ Belt and Road Initiative (BRI) နှင့် အဆင့်မြင့်တံခါးဖွင့်စီးပွားရေးစနစ် တည်ဆောက်ရေးသည် ကမ္ဘာ့စီးပွားရေးပူးပေါင်းဆောင်ရွက်မှုကို မြှင့်တင်ပေးနေပြီး အပြန်အလှန်အကျိုးဖြစ်ထွန်းမှုနှင့် ပူးတွဲဖွံ့ဖြိုးတိုးတက်မှုအတွက် အရေးပါသော အခန်းကဏ္ဍမှ ပါဝင်လျက်ရှိကြောင်း ပေကျင်းမြို့ရှိ နိုင်ငံတကာစီးပွားရေးနှင့် ကုန်သွယ်မှုတက္ကသိုလ် (University of International Business and Economics – UIBE) ၏ Foreign Economic and Trade Relations Museum တွင် ဖော်ပြထားသည်။
အဆိုပါ ပြတိုက်တွင် တရုတ်နိုင်ငံ၏ နှစ်ပေါင်းထောင်ချီကြာ နိုင်ငံခြားစီးပွားရေးနှင့် ကုန်သွယ်ရေးဖွံ့ဖြိုးတိုးတက်မှု သမိုင်းကြောင်းကို ခင်းကျင်းပြသထားပြီး ပြုပြင်ပြောင်းလဲရေးနှင့် တံခါးဖွင့်မူဝါဒမှစ၍ WTO ဝင်ရောက်မှု၊ BRI အကောင်အထည်ဖော်မှုနှင့် အဆင့်မြင့်တံခါးဖွင့်စီးပွားရေးစနစ် တည်ဆောက်မှုအထိ ဖွံ့ဖြိုးတိုးတက်လာသည့် လမ်းကြောင်းကို ထင်ဟပ်ဖော်ပြထားသည်။
ပြတိုက်၏ ဖော်ပြချက်များအရ ၁၉၇၈ ခုနှစ်တွင် စတင်ချမှတ်ခဲ့သော ပြုပြင်ပြောင်းလဲရေးနှင့် တံခါးဖွင့်မူဝါဒသည် တရုတ်နိုင်ငံ၏ စီးပွားရေးဖွံ့ဖြိုးတိုးတက်မှုအတွက် အခြေခံအုတ်မြစ်ဖြစ်ခဲ့ပြီး ၂၀၀၁ ခုနှစ်တွင် ကမ္ဘာ့ကုန်သွယ်ရေးအဖွဲ့ (WTO) သို့ ဝင်ရောက်ခဲ့ခြင်းက တရုတ်စီးပွားရေးကို ကမ္ဘာ့စီးပွားရေးနှင့် ပိုမိုနီးကပ်စွာ ချိတ်ဆက်နိုင်စေခဲ့ကြောင်း ဖော်ပြထားသည်။
တရုတ်ကွန်မြူနစ်ပါတီ၏ (၁၈) ကြိမ်မြောက် အမျိုးသားညီလာခံကျင်းပပြီးနောက်ပိုင်း တရုတ်နိုင်ငံ၏ ကုန်စည်ကုန်သွယ်ရေး အင်အား ပိုမိုခိုင်မာလာခဲ့ပြီး ဝန်ဆောင်မှုကုန်သွယ်ရေးကဏ္ဍ လျင်မြန်စွာ ဖွံ့ဖြိုးတိုးတက်လာသည့်အပြင် သွင်းကုန်နှင့် ပို့ကုန်ဖွဲ့စည်းပုံများ ပိုမိုကောင်းမွန်လာခဲ့ကြောင်း ပြသထားသည်။
ထို့ပြင် “ဖွင့်လှစ်မှုသည် ဖွံ့ဖြိုးတိုးတက်မှုကို ဆောင်ကြဉ်းပေးပြီး ပိတ်ဆို့မှုသည် နောက်ကျကျန်ရစ်မှုကို ဖြစ်ပေါ်စေသည်” ဟူသော အယူအဆသည် တရုတ်နိုင်ငံ၏ နိုင်ငံခြားစီးပွားရေးနှင့် ကုန်သွယ်ရေးဖွံ့ဖြိုးတိုးတက်မှု သမိုင်းမှ ရရှိခဲ့သည့် အရေးပါသော သင်ခန်းစာတစ်ရပ်ဖြစ်ကြောင်း ဖော်ပြထားသည်။
ပြတိုက်၏ ဖော်ပြချက်များအရ Belt and Road Initiative (BRI) သည် တရုတ်နိုင်ငံ၏ ပြုပြင်ပြောင်းလဲရေးနှင့် တံခါးဖွင့်မူဝါဒကို ပိုမိုနက်ရှိုင်းစွာ အကောင်အထည်ဖော်နိုင်ရန် အရေးပါသည့် စီမံကိန်းတစ်ရပ်ဖြစ်သကဲ့သို့ ပွင့်လင်းသော ကမ္ဘာ့စီးပွားရေးစနစ် တည်ဆောက်ရေးနှင့် လူသားမျိုးနွယ်အတွက် မျှဝေကံကြမ္မာအသိုက်အဝန်း ဖော်ဆောင်ရေးအတွက်လည်း အရေးပါသော မဟာဗျူဟာတစ်ရပ်ဖြစ်ကြောင်း သိရသည်။
အနာဂတ်တွင် တရုတ်နိုင်ငံအနေဖြင့် ပိုမိုကျယ်ပြန့်သော၊ ပိုမိုနက်ရှိုင်းသော တံခါးဖွင့်မူဝါဒကို ဆက်လက်ကျင့်သုံးသွားမည်ဖြစ်ပြီး ပြည်တွင်းဈေးကွက်၏ အားသာချက်များကို အသုံးချကာ နိုင်ငံတကာပူးပေါင်းဆောင်ရွက်မှုများကို မြှင့်တင်၍ အပြန်အလှန်အကျိုးဖြစ်ထွန်းမှုနှင့် ပူးတွဲဖွံ့ဖြိုးတိုးတက်မှုကို ဖော်ဆောင်သွားမည်ဖြစ်ကြောင်း ပြတိုက်တွင် ဖော်ပြထားသည်။