ပြည်ပမှ ကုန်ပစ္စည်းများကို ခွင့်ပြုချက်မရမီ ဆိပ်ကမ်းနှင့် လေဆိပ်သို့ တင်သွင်းလာသည့် လူပုဂ္ဂိုလ်များနှင့် ကုမ္ပဏီများအား အရေးယူနိုင်ရေး စီမံခန့်ခွဲရေးအဖွဲ့၊ လေလံတင်ထုခွဲရောင်းချရေး လုပ်ငန်းအဖွဲ့မှ AWPT၊ MIP နှင့် MITT ဆိပ်ကမ်းများတွင် ပြည်သူ့ဘဏ္ဍာအဖြစ် သိမ်းဆည်းထားသော ကုန်သေတ္တာ (၅၂) လုံးအတွင်းရှိ ကုန်ပစ္စည်းများကို အိတ်ဖွင့်တင်ဒါစနစ်ဖြင့် လေလံတင် ရောင်းချသွားမည်ဖြစ်ကြောင်း လေလံတင်ထုခွဲရောင်းချရေး လုပ်ငန်းအဖွဲ့မှ ထုတ်ပြန်ထားသည်။
အဆိုပါ ကုန်ပစ္စည်းများကို လက်ရှိ မျက်မြင်အခြေအနေအတိုင်း လာမည့် သြဂုတ်လ (၆) ရက်နေ့နံနက် (၁၁) နာရီ အချိန်တွင် အိတ်ဖွင့်တင်ဒါစနစ်ဖြင့် လေလံတင် ထုခွဲရောင်းချသွားမည်ဖြစ်သည်။
လေလံပါဝင် လျှောက်ထားလိုသူများအနေဖြင့် လေလံပုံစံနှင့် စည်းကမ်းချက်များကို ဇူလိုင်လ (၂၃) ရက်မှ သြဂုတ်လ (၄) ရက်နေ့အထိ ရုံးဖွင့်ရက်များ၏ ရုံးချိန်အတွင်း ရန်ကုန်မြို့၊ ဗိုလ်တထောင်မြို့နယ်၊ ကမ်းနားလမ်း (ဗိုလ်တထောင်ဘုရားအနောက်ဘက်၊ ကွန်ကရစ်လမ်း၊ Toll Gate အနီး) ရှိ မြန်မာ့ဆိပ်ကမ်းအာဏာပိုင်၊ဗဟိုပစ္စည်းထိန်းဌာနတွင် ဆက်သွယ်ဝယ်ယူနိုင်ကြောင်း သိရသည်။
ယင်းလေလံပွဲနှင့် ပတ်သက်၍ အသေးစိတ်အချက်အလက်များကို သိရှိလိုပါက အဆိုပါဌာနသို့ လူကိုယ်တိုင် လာရောက်စုံစမ်း မေးမြန်းနိုင်ကြောင်း လေလံတင်ထုခွဲရောင်းချရေး လုပ်ငန်းအဖွဲ့၏ ထုတ်ပြန်ချက်အရ သိရသည်။