အာဆီယံ-ပရာ့ဂ်ကော်မတီက ဦးဆောင်ကျင်းပတဲ့ အာဆီယံ+၃ ရုပ်ရှင်ပွဲတော် (ASEAN+3 Film Festival)ကို ချက်နိုင်ငံ ပရာ့ဂ်မြို့၊ အမှတ်(၁) မြို့နယ် မာရီယန်ရင်ပြင်(Marian Square)မှာရှိတဲ့ ဗဟိုစာကြည့်တိုက်က ရုပ်ရှင်ခန်းမမှာ စက်တင်ဘာ ၁ရက်နေ့က နေ ၉ ရက်နေ့အထိ ကျင်းပလျှက်ရှိပါတယ်။
အာဆီယံနိုင်ငံတွေဖြစ်တဲ့ အင်ဒိုနီးရှား၊ မလေးရှား၊ မြန်မာ၊ ဖိလစ်ပိုင်နဲ့ ဗီယက်နမ်နိုင်ငံတွေအပြင် တရုတ်၊ ဂျပန်နဲ့ တောင်ကိုရီးယား နိုင်ငံတွေက ရိုက်ကူးထားတဲ့ ရုပ်ရှင်ဇာတ်ကားတွေကို နေ့စဉ် တစ်ကားစီ ပြသနေတာဖြစ်ပါတယ်။
အဲဒီ ရုပ်ရှင်ပွဲတော်မှာ မြန်မာနိုင်ငံက ဒါရိုက်တာ အကယ်ဒမီ စင်ရော်မောင်မောင်နဲ့ တွဲဖက်ဒါရိုက်တာ မင်းသန့်မောင်မောင်တို့ ရိုက်ကူးတင်ဆက်ထားတဲ့ “တိမ်တွေပေါ်ကပန်း”ရုပ်ရှင်ဇာတ်ကားကို နက်ဖြန် စက်တင်ဘာ ၈ရက်နေ့မှာ ပြသွားမှာဖြစ်ပါတယ်။
“တိမ်တွေပေါ်ကပန်း” ရုပ်ရှင်ဇာတ်ကားကို ၂၀၁၉ ခုနှစ် ဒီဇင်ဘာလက မြန်မာနိုင်ငံမှာ ပြသခဲ့ပြီးဖြစ်ပါတယ်။ ၂၀၂၀ ပြည့်နှစ် တရုတ်နှစ်သစ်ကူး အခါသမယမှာလဲ စင်ကာပူနိုင်ငံမှာ ပြသခဲ့ပါသေးတယ်။ အဲဒီနှစ်မှာပဲ အင်ဒိုနီးရှားနိုင်ငံ ဂျာကာတာမြို့မှာကျင်းပတဲ့ အာဆီယံရုပ်ရှင်ပွဲတော်မှာလဲ သွားရောက်ပြသခဲ့ပါသေးတယ်။
“တိမ်တွေပေါ်ကပန်း” ရုပ်ရှင်ဇာတ်ကားဟာ မြန်မာနိုင်ငံနဲ့ တောင်ကိုရီးယားနိုင်ငံတွေမှာ ရိုက်ကူးခဲ့တာဖြစ်ပြီး၊ အဓိက သရုပ်ဆောင်တွေအဖြစ် တောင်ကိုရီးယား ရုပ်ရှင်သရုပ်ဆောင် Ryu Sang Wook နဲ့ မြန်မာ ရုပ်ရှင်သရုပ်ဆောင်တွေဖြစ်ကြတဲ့ အကယ်ဒမီ ဝတ်မှုန်ရွှေရည် ၊ အကယ်ဒမီ မေသန်းနု နဲ့ ကျော်ထက်အောင် တို့က ပါဝင်သရုပ်ဆောင်ထားကြတာဖြစ်ပါတယ်။