7-Eleven ကုမ္ပဏီဟာ အားကစားပစ္စည်းထုတ်လုပ်တဲ့ Nike ကုမ္ပဏီကို အမေရိကန်နိုင်ငံ တက္ကဆက်ပြည်နယ် ဖက်ဒရယ်တရားရုံးမှာ တရားစွဲဆိုလိုက်ပါတယ်။ အကြောင်းရင်းကတော့ Nike က မကြာခင် ဖြန့်ချိတော့မယ့် Air Max 95 ဖိနပ်အမျိုးအစားမှာ 7-Eleven စတိုးဆိုင်တွေရဲ့ လူသိများတဲ့ လိမ္မော်ရောင်၊ အစိမ်းရောင်နဲ့ အနီရောင် ကာလာဒီဇိုင်းနဲ့ တစ်ထပ်တည်းကျလုနီးပါး တူညီတဲ့ အရောင်တွေကို အသုံးပြုထားတာကြောင့်လို့ စွပ်စွဲထားတာပါ။
ဒါးလပ်စ် (Dallas) မြို့က ဖက်ဒရယ်တရားရုံးမှာ တင်သွင်းခဲ့တဲ့ ဒီအမှုဟာ လာမယ့် ဇူလိုင်လ ၁၁ ရက်နေ့မှာ ဖြန့်ချိဖို့ စီစဉ်ထားတဲ့ Nike Air Max 95 ဖိနပ်မော်ဒယ်အပေါ် အဓိက အငြင်းပွားနေကြတာပါ။ ဒီဇူလိုင် ၁၁ ရက် ဆိုတဲ့ နေ့ရက်ဟာ အမေရိကန်မှာ “7-Eleven နေ့” အဖြစ် လူသိများသလို၊ ဆိုင်တွေမှာ နှစ်စဉ်ကျင်းပမြဲဖြစ်တဲ့ Slurpee အအေး အခမဲ့သောက်ရက် ပရိုမိုးရှင်းနေ့နဲ့လည်း တိုက်ဆိုင်နေပါတယ်။
7-Eleven ရဲ့ တရားစွဲဆိုချက်ထဲမှာ ဖိနပ်ရဲ့ ဒီဇိုင်းဟာ သူတို့ကုမ္ပဏီရဲ့ အမှတ်တံဆိပ်ဖြစ်တဲ့ အရောင်သုံးရောင်စင်းနဲ့ အလွန်တူနေတာကြောင့် ဝယ်ယူသူတွေကို ဝေခွဲမရ ဖြစ်စေနိုင်တယ်လို့ စွပ်စွဲထားပါတယ်။ တကယ်တမ်းတော့ ဒီကုမ္ပဏီနှစ်ခုကြားမှာ ဘာပူးပေါင်းဆောင်ရွက်မှုမှ မရှိဘဲနဲ့၊ ဝယ်ယူသူတွေအနေနဲ့ ဒီဖိနပ်ကို 7-Eleven ကပဲ စပွန်ဆာပေးထားတာ၊ ခွင့်ပြုချက်ပေးထားတာ ဒါမှမဟုတ် ပတ်သက်မှုရှိနေတာလို့ အထင်အမြင်လွဲမှားသွားနိုင်တယ်လို့လည်း လက်လီအရောင်းဆိုင်ကြီးက တင်ပြထားပါတယ်။
တက္ကဆက်အခြေစိုက် ဒီစတိုးဆိုင်ကြီးက ပြောကြားရာမှာတော့ သူတို့အနေနဲ့ ဒီလိမ္မော်၊ အစိမ်း၊ အနီ အရောင်တွဲကို ဆိုင်ဆိုင်းဘုတ်တွေ၊ ကြော်ငြာတွေ၊ အမှတ်တံဆိပ်ပါပစ္စည်းတွေ၊ ဖိနပ်တွေနဲ့ တခြားထုတ်ကုန်တွေမှာ ဆယ်စုနှစ်ပေါင်းများစွာ သုံးစွဲလာခဲ့တာ ဖြစ်တယ်လို့ ဆိုပါတယ်။ ဒါ့အပြင် ဒီဒီဇိုင်းနဲ့ပတ်သက်ပြီး ကုန်အမှတ်တံဆိပ် (Trademark) မှတ်ပုံတင်ခွင့် အများအပြားကိုလည်း ပိုင်ဆိုင်ထားတယ်လို့ ဆိုပါတယ်။
ဒါတင်မကသေးဘဲ Nike အနေနဲ့ 7-Eleven ရဲ့ အမှတ်တံဆိပ်ကို လူတွေ ပြေးမြင်မိစေဖို့နဲ့ သူတို့ရဲ့ လူသိများမှုကို အခွင့်ကောင်းယူဖို့အတွက် ဒီဖိနပ်ကို တမင်သက်သက် ရည်ရွယ်ဒီဇိုင်းဆွဲခဲ့တာဖြစ်တယ်လို့လည်း စွပ်စွဲထားပါတယ်။ တရားစွဲဆိုချက်ထဲမှာ ဒီဖိနပ်ဟာ 7-Eleven ဆီကနေ အိုင်ဒီယာယူပြီး ထုတ်ထားတာဖြစ်တယ်လို့ ရေးသားကြတဲ့ မီဒီယာသတင်းတွေကိုလည်း သက်သေအဖြစ် ထည့်သွင်းကိုးကားထားပါသေးတယ်။
တရားမစွဲခင်မှာ ဒီပြဿနာကို ပြေလည်အောင် ဖြေရှင်းဖို့ အကြိမ်ကြိမ် ကြိုးစားခဲ့ပါသေးတယ်၊ ဒါပေမဲ့ Nike ဘက်ကတော့ ဖိနပ်ကို ဆက်ပြီး ကြော်ငြာအားစိုက်နေသလို လာမယ့် ဇူလိုင် ၁၁ ရက် ဖြန့်ချိမယ့်အစီအစဉ်ကိုလည်း ဆက်လုပ်ဖို့ပဲ ရည်ရွယ်ထားတယ်လို့ 7-Eleven ဘက်ကတော့ ဆိုပါတယ်။ ဒီကိစ္စနဲ့ပတ်သက်ပြီး Reuters သတင်းဌာနက Nike ဘက်ကို မှတ်ချက်ပေးဖို့ ဆက်သွယ်ခဲ့ပေမဲ့ ချက်ချင်း ပြန်လည်တုံ့ပြန်ခြင်း မရှိသေးပါဘူး။
အခုအခါမှာတော့ 7-Eleven က ဒီဖိနပ်ရောင်းချမှုကို ပိတ်ပင်တားဆီးပေးဖို့ တရားရုံးကို လျှောက်ထားသလို၊ ဖြန့်ဖြူးပြီးသား ကုန်ပစ္စည်းတွေကိုလည်း ပြန်လည်သိမ်းဆည်းပေးဖို့ (Recall လုပ်ပေးဖို့) တောင်းဆိုထားပါတယ်။ ဒါ့အပြင် ထိခိုက်နစ်နာမှုအတွက် လျော်ကြေးငွေနဲ့ ဒီဖိနပ်ရောင်းရငွေကနေ Nike ရရှိမယ့် အမြတ်ငွေတွေကိုပါ ပေးလျော်ဖို့ တောင်းဆိုထားပါတယ်။
ဒီအမှုတွဲကို တက္ကဆက်မြောက်ပိုင်းခရိုင် အမေရိကန်ခရိုင်တရားရုံးမှာ 7-Eleven Inc v Nike Inc ဆိုပြီး တရားစွဲဆိုထားတာဖြစ်ပြီး အမှုတွဲနံပါတ်ကတော့ 3:26-cv-02201-X ဖြစ်ပါတယ်။