အိန္ဒိယနှင့် ဂျပန်နိုင်ငံတို့သည် ဉာဏ်ရည်တု (AI)၊ သတ္တုနှင့် စွမ်းအင်ကဏ္ဍများတွင် ပူးပေါင်းဆောင်ရွက်မှု မြှင့်တင်ရေးအတွက် သဘောတူညီချက်များကို ဇူလိုင် ၃ ရက်က လက်မှတ်ရေးထိုးခဲ့ကြောင်း အိန္ဒိယဝန်ကြီးချုပ် နာရင်ဒြာ မိုဒီက ပြောကြားသည်။
ဂျပန်ဝန်ကြီးချုပ် ဆနာအဲ တာကာအိချီနှင့် နယူးဒေလီမြို့၌ ကျင်းပသည့် (၁၆) ကြိမ်မြောက် အိန္ဒိယ-ဂျပန် နှစ်ပတ်လည် ထိပ်သီးအစည်းအဝေးအပြီး ပြုလုပ်သည့် ပူးတွဲသတင်းစာရှင်းလင်းပွဲတွင် မိုဒီက နှစ်နိုင်ငံအနေဖြင့် စီးပွားရေးလုံခြုံရေးဆိုင်ရာ ပူးတွဲအစီအစဉ်တစ်ရပ်ကိုလည်း ရေးဆွဲထားကြောင်း ထုတ်ဖော်ပြောကြားခဲ့သည်။
“ဂျပန်၏ တိကျမြင့်မားသော နည်းပညာနှင့် အိန္ဒိယ၏ ဆော့ဖ်ဝဲဖွံ့ဖြိုးရေးစွမ်းရည်တို့ ပေါင်းစပ်လိုက်ခြင်းသည် ကမ္ဘာလုံးဆိုင်ရာ AI ဖွံ့ဖြိုးတိုးတက်ရေးအတွက် အရှိန်အဟုန်သစ်နှင့် အင်အားသစ်များ ဖန်တီးပေးနိုင်မည်ဖြစ်သည်” ဟု မိုဒီက ပြောကြားခဲ့သည်။
အိန္ဒိယအစိုးရ၏ အချက်အလက်များအရ နှစ်နိုင်ငံကုန်သွယ်မှုတန်ဖိုးသည် ၂၀၂၅-၂၀၂၆ ဘဏ္ဍာရေးနှစ်အတွင်း အမေရိကန်ဒေါ်လာ ၂၇ ဒသမ ၅ ဘီလီယံအထိ ရောက်ရှိခဲ့ပြီး၊ ၂၀၂၅ ခုနှစ် ဧပြီလမှ ဒီဇင်ဘာလအတွင်း ဂျပန်၏ အိန္ဒိယနိုင်ငံအတွင်း ရင်းနှီးမြှုပ်နှံမှုမှာ အမေရိကန်ဒေါ်လာ ၃ ဒသမ ၂ ဘီလီယံရှိခဲ့ကြောင်း သိရသည်။
Quad အဖွဲ့ဝင်နိုင်ငံများဖြစ်သည့် အိန္ဒိယနှင့် ဂျပန်တို့သည် ကာကွယ်ရေးကဏ္ဍ၌ ပထမဆုံး ပူးတွဲဖွံ့ဖြိုးတိုးတက်ရေး စီမံကိန်းတစ်ရပ်အတွက်လည်း သဘောတူညီချက်ကို လက်မှတ်ရေးထိုးခဲ့ကြောင်း မိုဒီက ပြောကြားသည်။
ထို့ပြင် “အိန္ဒိယ-ဂျပန် ဇီဝဓာတ်ငွေ့အစီအစဉ်” အရ အိန္ဒိယနိုင်ငံတစ်ဝန်း ဇီဝဓာတ်ငွေ့နှင့် အော်ဂဲနစ်ဓာတ်မြေဩဇာ ထုတ်လုပ်ရေးစက်ရုံ ၁,၀၀၀ ကို တည်ဆောက်သွားမည်ဖြစ်ကြောင်းလည်း ၎င်းက ထည့်သွင်းပြောကြားခဲ့သည်။
ဂျပန်နိုင်ငံသည် အိန္ဒိယ၏ အကြီးဆုံး ရင်းနှီးမြှုပ်နှံသူများအနက် တစ်နိုင်ငံဖြစ်ပြီး မွန်ဘိုင်း-အာမက်ဒါဘတ် မြန်နှုန်းမြင့်ရထားလမ်း စီမံကိန်းအပါအဝင် အဓိက အခြေခံအဆောက်အအုံစီမံကိန်းများကို ထောက်ပံ့လျက်ရှိသည်။ ထို့အပြင် ဂျပန်ကုမ္ပဏီများသည် Yes Bank တွင် ရှယ်ယာ ၂၀ ရာခိုင်နှုန်း ရင်းနှီးမြှုပ်နှံခြင်းအပါအဝင် အိန္ဒိယကုမ္ပဏီများတွင် ရင်းနှီးမြှုပ်နှံမှုများကိုလည်း တိုးမြှင့်ဆောင်ရွက်လျက်ရှိကြောင်း သိရသည်။
ဂျပန်ဝန်ကြီးချုပ် တာကာအိချီနှင့်အတူ စီးပွားရေးကိုယ်စားလှယ်အဖွဲ့ အများအပြား လိုက်ပါလာခဲ့ပြီး နယူးဒေလီ၌ ကျင်းပမည့် စီးပွားရေးညီလာခံတွင်လည်း မိန့်ခွန်းပြောကြားရန် စီစဉ်ထားကြောင်း သိရသည်။
Ref: Reuters