ဝါရှင်တန်၊ ဇန်နဝါရီ ၁၇
အမေရိကန် နိုင်ငံခြားရေးဝန်ကြီး ဘလင်ကန်သည် ပေကျင်းသို့ ဖေဖော်ဝါရီလ ၅ ရက် မှ ၆ ရက်နေ့အထိ သွားရောက်လည်ပတ်မည်ဖြစ်ကြောင်း အမေရိကန်အရာရှိတစ်ဦးက ဇန်နဝါရီလ ၁၇ ရက် အင်္ဂါနေ့တွင် ပြောကြားခဲ့သည်။
ကမ္ဘာ့စီးပွားရေး အင်အားအကြီးဆုံး နှစ်နိုင်ငံကြား မြင့်တက်နေသော တင်းမာမှုများအား ပြန်လည် ထိန်းချုပ်နိုင်ရန် ရည်ရွယ်၍ စောင့်မျှော်ခဲ့ရသော ခရီးစဉ်တစ်ခုဖြစ်သည်။
ဘလင်ကန်သည် တရုတ်နိုင်ငံ၏ မြို့တော် ပေကျင်းသို့ ဖေဖော်ဝါရီလ ၅ ရက်နေ့တွင် ရောက်ရှိမည်ဖြစ်ပြီး ၆ ရက်နေ့တွင်မူ ဆွေးနွေးမှုများ ပြုလုပ်ကျင်းပ သွားမည်ဖြစ်ကြောင်း အမည်မဖော်လိုသူ အရာရှိတစ်ဦးက ပြောသည်။
ဘလင်ကန်၏ ခရီးစဉ်နှင့် ပတ်သက်၍ နှစ်ဘက်စလုံးက အသေးစိတ်အချက်အလက်များ ဖော်ပြထားခြင်း မရှိသော်လည်း ဘလင်ကန်သည် အသစ်ခန့်အပ်ထားသော တရုတ်နိုင်ငံခြားရေးဝန်ကြီး ကျင်ဂန်း နှင့် တွေ့ဆုံရန် မျှော်မှန်းထားပြီး သမ္မတ ရှီနှင့်ပါ တွေ့ဆုံနိုင်ချေရှိနေသည်။
ဘလင်ကန်သည် ၂၀၁၈ ခုနှစ် အောက်တိုဘာလ နောက်ပိုင်း တရုတ်နိုင်ငံသို့ သွားရောက်မည့် ပထမဆုံးအမေရိကန် နိုင်ငံခြားရေး ဝန်ကြီးဖြစ်လာမည်ဖြစ်သည်။
တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ ဝမ် ဝမ်းဘင်းက ပေကျင်းသို့ ဘလင်ကန် လာရောက်မည့်အပေါ် ကြိုဆိုပါကြောင်းနှင့် ဘင်လန်ကင်သည် ရှီနှင့် ဘိုင်ဒင်၏ အစည်းအဝေး လမ်းစဉ်ဖြစ်သော တရုတ်-အမေရိကန် ဆက်ဆံရေးကို တည်ငြိမ်၍ အမြင်လွဲမှုမရှိသော လမ်းကြောင်းပေါ်သို့ ပြန်လည်တွန်းပို့ရာတွင် ကူညီပေးမည်ဟု မျှော်လင့်ကြောင်း ပြောခဲ့သည်။
Source:CNA