၂၀၂၃ ခုနှစ် နှစ်ဆန်းပိုင်းမှစတင်ကာ တဖြေးဖြေးကျဆင်းလာသည့် ပြည်တွင်းစက်သုံးဆီ ဈေးနှုန်းများ ဆက်လက်ကျဆင်းနေပြီး ယနေ့ နံနက်ပိုင်းတွင် တစ်လီတာ ၁၉၅၀ ကျပ်သို့ ရောက်ရှိလာကြောင်း သိရသည်။
ပြီးခဲ့သည့် ဒီဇင်ဘာလကုန်ပိုင်းအထိ တစ်လီတာ ၂၁၀၀ ကျပ်ဝန်းကျင်ဖြင့် တည်ငြိမ်နေရာမှ ယခုတပတ်အတွင်း တဖြေးဖြေးအကျဖက်သို့ ဦးတည်လာနေခြင်းလည်း ဖြစ် သည်။
ယနေ့ ဇန်နဝါရီ (၈) ရက် နံနက်ပိုင်း စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေး ကော်မတီ ၏ ရည်ညွှန်းဈေးနှုန်းများအရ တစ်လီတာလျင် ၃၀ ဝန်းကျင်ထပ်မံ ကျဆင်းခဲ့ပြီး ဒီဇင်ဘာလကုန်ပိုင်းနှင့် နှိုင်းယှဉ်ပါက တစ်လီတာ ၂၀၀ ကျပ်ဝန်းကျင်အထိ ဆက်တိုက် ကျဆင်းလာခြင်း ဖြစ်သည်။
ယနေ့ ဇန်နဝါရီ (၈)ရက်အတွက် သတ်မှတ်ပေးထားသည့် ရည်ညွှန်းဈေးနှုန်းများမှာ 92 Ron တစ်လီတာလျင် ၁၉၅၀ ကျပ်ဖြစ်ပြီး 95 Ron တစ်လီတာ ၂၀၂၀ ကျပ်ဖြစ်ကြောင်း သိရသည်။
ထို့အပြင် လက်ကားရည်ညွှန်းဈေးနှုန်းများ အနေဖြင့် 92 Ron တစ်လီတာလျင် ၁၈၅၂ ကျပ် ဖြစ်ပြီး 95 တစ်လီတာကို ၁၉၂၂ ကျပ်ဖြင့် ရောင်းချရန် ရည်ညွှန်းသတ်မှတ်ပေးထားခြင်း ဖြစ်သည်။
စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေး ကော်မတီက ရန်ကုန်၊ မန္တလေးနှင့် အခြားတိုင်းနှင့်ပြည်နယ် အသီးသီးတွင် ရောင်းချရမည့် စက်သုံးဆီ အခြေခံရည်ညွှန်းဈေးမှားကို အပတ်စဉ် သတ်မှတ်ပေးနေခြင်းဖြစ်ပြီး အဆိုပါဈေးနှုန်းများအတိုင်း ရောင်းချစေခြင်းလည်း ဖြစ်သည်
မန္တလေးတိုင်းအတွက် ယနေ့သတ်မှတ်ပေးထားသည့် ရည်ညွှန်းဈေးနှုန်းမှာ 92 တစ်လီတာလျှင် လက်လီအနေ ဖြင့် ၁၉၉၅ ကျပ်နှင့် လက်ကားဈေးနှုန်းမှာ တစ်လီတာလျင် ၁၉၂၃ ကျပ် ဖြစ်ပြီး 95 တစ်လီတာလျင် လက်လီဈေးနှုန်း ၂၀၇၀ ကျပ်နှင့် လက်ကားဈေးနှုန်းမှာ ၁၉၉၄ ကျပ် ဖြစ်ကြောင်း သိရသည်။
ထို့အပြင် ရန်ကုန်တိုင်းအတွင်း ရောင်းချရမည့် ဒီဇယ်နှင့် ပရီမီယံဒီဇယ်ဈေးနှုန်းအနေဖြင့် တစ်လီတာလျင် ၂၁၇၄ ကျပ်ဖြင့် ရောင်းချရန် သတ်မှတ်ပေးထားပြီး မန္တလေးတိုင်းတွင် တစ်လီတာ ၂၂၄၇ ကျပ်ဖြင့် ရောင်းချရန်သတ် မှတ်ပေးထားသည်။
ပြည်တွင်းရှိ စက်သုံးဆီ ရောင်းချသူများအနေဖြင့် စက်သုံးဆီ ဈေးနှုန်းများကို မရိုးဖြောင့်သော နည်းလမ်းများဖြင့် ဈေးကစားခြင်း ၊ သိုလှောင်ထားရှိခြင်းများ ၊ ဈေးတင်ရောင်းချခြင်းများ မပြုလုပ်ရန်နှင့် ယင်းသို့ ပြုလုပ်ပါက အရေးကြီးကုန်စည် ဥပဒေဖြင့် အရေးယူဆောင်ရွက်မည် ဖြစ်ကြောင်းလည်းစက်သုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေး ကော်မတီက ကြေညာထားသည်။