ပြည်တွင်းရုပ်ရှင် ဇာတ်ကား၊ ဇာတ်လမ်းတွဲနှင့် နိုင်ငံခြား ဇာတ်ကား၊ ဇာတ်လမ်းတွဲများအား ဆင်ဆာ စိစစ်ခွင့်ပြုချက်ယူရမည်
ပြည်တွင်းရုပ်ရှင် ဇာတ်ကား၊ ဇာတ်လမ်းတွဲနှင့် နိုင်ငံခြား ဇာတ်ကား၊ ဇာတ်လမ်းတွဲများအား ဆင်ဆာ စိစစ်ခွင့်ပြုချက်ယူရမည်ဖြစ်ကြောင်း ပြန်ကြားရေးနှင့် ပြည်သူ့ဆက်ဆံရေးဦးစီးဌာန ထံမှ သိရသည်။
မြန်မာအသံနှင့်ရုပ်မြင်သံကြားနှင့် ဆက်စပ်ပြီး ရုပ်မြင်သံကြား ထုတ်လွှင့်ဝန်ဆောင်မှုပေးနေသည့် ကုမ္ပဏီများနှင့် Content Provider များအနေဖြင့် ပြည်တွင်းရုပ်ရှင် ဇာတ်ကား၊ ဇာတ်လမ်းတွဲ၊ နိုင်ငံခြား ဇာတ်ကား၊ ဇာတ်လမ်းတွဲများအား ဗီဒီယိုဆင်ဆာ စိစစ်ခွင့်ပြုချက်ရယူပြီးမှ ပြသရေးညှိနှိုင်းအစည်းအဝေးတစ်ခုကို စက်တင်ဘာ ၂၆ ရက် မွန်းလွဲပိုင်းက ရန်ကုန်မြို့ ဗဟန်းမြို့နယ် ကုက္ကိုင်းရိပ်သာလမ်းရှိ ပြန်ကြားရေးနှင့် ပြည်သူ့ဆက်ဆံရေးဦးစီးဌာန ရုပ်ရှင်မြှင့်တင်ရေးဌာနခွဲ၌ ကျင်းပခဲ့သည်။
ရုပ်သံထုတ်လွှင့်မှုတွင် နိုင်ငံပိုင်မီဒီယာများအပြင် ပုဂ္ဂလိကမီဒီယာများကလည်း ရုပ်သံထုတ်လွှင့်မှု ဆောင်ရွက်လျက်ရှိကြောင်း၊ မြန်မာ့ရုပ်မြင်သံကြားနှင့် ပူးပေါင်းဆောင်ရွက်နေသည့် ရုပ်မြင်သံကြား ထုတ်လွှင့်နေသူများအနေဖြင့် ရုပ်ရှင်ဇာတ်ကားကြီးများနှင့် ဗီဒီယိုဇာတ်ကားကြီးများကို ဆင်ဆာခွင့်ပြုချက်ရပြီးမှ ပြသလျက်ရှိကြသော်လည်း ပြည်တွင်းပြည်ပ ဇာတ်လမ်းတွဲများနှင့် နိုင်ငံခြားဇာတ်လမ်းတွဲများကို မြန်မာစာတန်းထိုး၊ မြန်မာစကားပြော အသံထပ်၍ ပြသခြင်းတို့ကိုမူ ဆင်ဆာစိစစ်ရေးအဖွဲ့သို့ မတင်ဘဲ မိမိတို့ကိုယ်တိုင် စိစစ်တာဝန်ယူမှုဖြင့် ပြသလျက်ရှိကြောင်း ယခုအခါ ၎င်းဇာတ်လမ်းတွဲများ၏ ဇာတ်လမ်းနှင့် ပါဝင်သော စကားပြောများနှင့် ဇာတ်လမ်းတွဲများမှာ လက်ရှိအခြေအနေအရ မပြသင့်သည်များ ပါနေသည်ကို တွေ့လာရကြောင်း၊ ထို့ကြောင့် ယခုမှ စတင်၍ ဇာတ်လမ်းတွဲများကိုပါ ဆင်ဆာခွင့်ပြုချက် ရယူပြီးမှ ပြသရန်လိုကြောင်း၊ နေပြည်တော်တွင် သက်ဆိုင်ရာကုမ္ပဏီများမှ အကြီးအကဲများနှင့် ရှင်းလင်းဆွေးနွေးပြီးဖြစ်၍ ယခုလက်တွေ့လုပ်ကိုင်နေသည့် ရုပ်သံလွှင့်တာဝန်ခံဝန်ထမ်းများနှင့် ရုပ်ရှင်နှင့် ဗီဒီယိုဆင်ဆာအဖွဲ့တို့တွေ့ဆုံ၍ ညှိနှိုင်း ဆောင်ရွက်ကြရန် ပြန်ကြားရေးဝန်ကြီးဌာန ဒုတိယဝန်ကြီး ဦးရဲတင့်က အစည်းအဝေးတွင်ပြောကြားခဲ့သည်။
လက်ရှိ ပြသဆဲ ရုပ်ရှင်နှင့် ဗီဒီယိုဇာတ်ကားများ၊ ဇာတ်လမ်း တိုများကိုလည်း မပြသမီ သေချာစိစစ်ပြီး နိုင်ငံရေး၊ ဘာသာရေး၊ ယဉ်ကျေးမှုနှင့် အမျိုးသားစည်းလုံး ညီညွတ်မှုကို ထိခိုက်စေသည့် အပြောအဆို၊ စာသားများ၊ ကာမရာဂကို နှိုးဆွသည့် အကြောင်းအရာများ မပါရှိစေရေး အလေးထား ကြပ်မတ်ဆောင်ရွက်ပေးကြရန် တိုက်တွန်းမှာကြားခဲ့သည်ဟုလည်း သိရသည်။