ပခုက္ကူမြို့မဈေးရှိ ရတနာရွှေဆိုင် တစ်ဆိုင်မှ ရွှေထည်ပစ္စည်းမျိုးစုံ အလေးချိန် ၅၀ ကျပ်သားခန့်နှင့် ငွေကျပ်သိန်း ၃၀ ခန့် သေနတ်ပြခြိမ်းခြောက် လုယက်ခံရ

ပခုက္ကူမြို့မဈေးရှိ ရတနာရွှေဆိုင် တစ်ဆိုင်မှ ရွှေထည်ပစ္စည်းမျိုးစုံ အလေးချိန် ၅၀ ကျပ်သားခန့်နှင့် ငွေကျပ်သိန်း ၃၀ ခန့် သေနတ်ပြခြိမ်းခြောက် လုယက်ခံရ

မကွေးတိုင်းဒေသကြီး၊ ပခုက္ကူမြို့ရှိ ရတနာရွှေဆိုင်တစ်ဆိုင်မှ ရွှေထည်ပစ္စည်းမျိုးစုံ အလေးချိန် ၅၀ ကျပ်သားခန့်နှင့် ငွေကျပ်သိန်း ၃၀ ခန့်တို့အားအမည်မသိ လက်နက်ကိုင် ၄ ဦးက သေနတ်ပြခြိမ်းခြောက်ကာ လုယက်ယူဆောင်သွားကြောင်း သတင်းရရှိသည်။

စက်တင်ဘာလ ၂၃ ရက် ညနေ ၃ နာရီခွဲအချိန်ခန့်တွင် ပခုက္ကူမြို့၊ (၁)ရပ်ကွက် မြို့မဈေး နောက်ဘက် တန်ဆောင်းတန်းလမ်းရှိ “ဦးသိန်းမောင်+ဒေါ်ရင်မေ သားသမီးများ” ရတနာ ရွှေဆိုင်၌ ဒေါ်ရင်မေ၏တူဖြစ်သူ ဦးအောင်နိုင်ဦး (၄၇)နှစ် (ဘ)ဦးစံတင်ပါ ဝန်ထမ်း ၆ ဦးမှ ရွှေထည် ပစ္စည်းများ ရောင်းချနေစဉ် ဆိုင်အရှေ့သို့ MASK ကိုယ်စီတပ်ဆင်ထားသည့် အမည်မသိ လက်နက်ကိုင် ၄ ဦး(စိစစ်ဆဲ)က ဆိုင်ကယ်များဖြင့် ရောက်ရှိလာပြီး ဆိုင်အတွင်းဝင်ရောက်ကာ သေနတ်ကိုင်ဆောင်ထားသည့် ၃ ဦးက ဦးအောင်နိုင်ဦးနှင့် ဆိုင်ဝန်ထမ်းများအား သေနတ်ဖြင့် ခြိမ်းခြောက်၍ ဆိုင်အတွင်းထိုင်ခိုင်းထားပြီး ကျန်တစ်ဦးမှာ ဆိုင်အတွင်းရောင်းချရန် ခင်းကျင်းပြသထားသည့် ရွှေထည်ပစ္စည်းမျိုးစုံ အလေးချိန် ၅၀ ကျပ်သားခန့်နှင့် ငွေသိမ်း ကောင်တာအတွင်း သိမ်းဆည်းထားရှိသည့် ငွေကျပ်သိန်း ၃၀ ခန့်တို့အား လုယက်ယူဆောင်ကာ အမှတ်(၉)ရပ်ကွက် ဘက်သို့ မောင်းနှင်ထွက်ပြေးသွားခဲ့ကြောင်း သိရသည်။

အထက်ပါဖြစ်စဉ်မှ လုယက်မှုကျူးလွန်ခဲ့သူများအား ဖမ်းဆီး ရမိနိုင်ရေးအတွက် လုံခြုံရေးတပ်ဖွဲ့ဝင်များက ပိတ်ဆို့ရှာဖွေစစ်ဆေးခြင်းများ ဆောင်ရွက်လျက်ရှိသည်ဟု သိရသည်။