တောင်ကိုရီးယားနှင့်ကနေဒါတို့ အရေးပါသောတွင်းထွက်ပစ္စည်းဆိုင်ရာ ပူးပေါင်းမှုပြုလုပ်ရန်ကြိုးပမ်းလျက်ရှိ

0
109

တောင်ကိုရီးယားနှင့်ကနေဒါတို့ အရေးပါသောတွင်းထွက်ပစ္စည်းဆိုင်ရာ ပူးပေါင်းမှုပြုလုပ်ရန်ကြိုးပမ်းလျက်ရှိ

အော့တဝါ၊စက်တင်ဘာ ၂၄

‌တောင်ကိုရီးယားသမ္မတ မစ္စတာယွန်းဆော့ယော်နှင့်ကနေဒါဝန်ကြီးချုပ် ဂျက်စတင်ထရူဒိုတို့သည် ရာသီဥတုပြောင်းလဲမှုကို တုံ့ပြန်ရန်အတွက် အစားထိုးအသုံးပြုသည့် လျှပ်စစ်ကားဘက္ထရီများ၌ပါဝင်သော အရေးပါသည့် တွင်းထွက်ပစ္စည်းဆိုင်ရာကိစ္စများတွင် ပိုမိုပူးပေါင်းဆောင်ရွက်သွားရန် သဘောတူခဲ့ကြကြောင်းသိရှိရသည်။

သမ္မတယွန်းသည် ဘုရင်မကြီးအဲလိဇဘက်၏ ဈာပနအခမ်းအနားအတွက် လန်ဒန်သို့ သွားရောက်ခဲ့ခြင်းဖြစ်သည်။ ထို့နောက်တွင် ၎င်း၏ပထမဆုံးသော အမေရိကန်ခရီးစဉ်အဖြစ် ကုလသမဂ္ဂ အထွေထွေညီလာခံသို့ တက်ရောက်ရန် နူးယော့ခ်သို့သွားခဲ့ပြီး ကြာသပတေးနေ့၌ ကနေဒါသို့ရောက်ရှိခဲ့သည်။  

သောကြာနေ့၌ ယွန်းသည် အာတဝါတွင် ထရူဒိုနှင့်တွေ့ဆုံခဲ့ပြီး ၎င်းတို့နှစ်ဦးစလုံးသည် သတင်းထောက်များအား တွေ့ဆုံစကားပြောခဲ့ကြသည်။

“မစ္စတာယွန်းနဲ့ ကျွန်တော်ဟာ မရှိမဖြစ်လိုအပ်တဲ့ သတ္တုဓာတ်ပစ္စည်းတွေ၊ လျှပ်စစ်ကားတွေအတွက် ဘက်ထရီတွေ၊ Al (ဥာဏ်ရည်တု) အပါအဝင် ထွန်းသစ်စ နည်းပညာနယ်ပယ်အမျိုးမျိုးမှာ ပူးပေါင်းဆောင်ရွက်ဖို့ နည်းလမ်းတွေကို ဆွေးနွေးခဲ့ပါတယ်” ဟု ထရူဒို ကသတင်းထောက်များကို ပြောကြားခဲ့သည်။

ကနေဒါတွင် လစ်သီယမ်၊ကိုဘော့နှင့် နီကယ်ကဲ့သို့သော အရေးပါသည့် သတ္တုများစွာရှိပြီး ယင်းတို့ကို လျှပ်စစ်ကားများအတွက် ဘက္ထရီများထုတ်လုပ်ရန် အသုံးပြုလျက်ရှိသည်။အစိုးရကလည်းထုတ်လုပ်သူများကို အတိုင်းအတာတစ်ခုအထိ ကူညီရန်ကြိုးပမ်းနေသည်ဟုသိရှိရသည်။

“ကနေဒါသည် သတ္တုများထုတ်လုပ်ရာတွင် ကမ္ဘာ့ထိပ်တန်းအဖြစ်ရှိနေပြီး အဓိက တစ်ပိုင်းလျှပ်ကူး နှင့် ဘက္ထရီထုတ်လုပ်သည့်ကိုရီးယားနိုင်ငံတို့သည် ကမ္ဘာလုံးဆိုင်ရာထောက်ပံ့ရေးကွင်းဆက်များတွင် အရေးပါသောအခန်းကဏ္ဍမှ ပါဝင်နေကြသည်” ဟု ယွန်းကစကားပြန်မှတဆင့် ပြောကြားခဲ့သည်။

“ပြောင်းလဲနေသောကမ္ဘာ့အစီအစဉ်မှ ထွက်ပေါ်လာသည့် စိန်ခေါ် မှု များကိုတုံ့ပြန်ရန်နိုင်ငံနှစ်နိုင်ငံအစိုးရနဲ့ စီးပွားရေးလုပ်ငန်းတွေက သတ္တုအရင်းအမြစ်ကဏ္ဍအတွက်အတူတကွ ပူးပေါင်းဆောင်ရွက်သွားမှာဖြစ်ပါတယ်” ဟု ၎င်းကဆိုသည်။

ပူးတွဲထုတ်ပြန်ချက်တွင် နှစ်နိုင်ငံသည် ၎င်းတို့၏ ထောက်ပံ့မှုကွင်းဆက်၏ ပြန်လည်ရုန်းထ နိုင်စွမ်းအပေါ်  မဟာဗျူဟာမြောက် မိတ်ဖက်ဆက်ဆံရေးကို နက်နက်ရှိုင်းရှိုင်းလုပ်ဆောင်ရန် သဘောတူညီခဲ့ကြပြီး အရေးကြီးသော တွင်းထွက်ပစ္စည်းထောက်ပံ့ရေးကွင်းဆက်၊ဘက္ထရီနှင့် လျှပ်စစ်ကားထုပ်လုပ်မှုတွင်ယှဉ် ပြိုင် နိုင်စွမ်းရှိသောထုတ်လုပ်သူများအဖြစ် ရပ်တည်ရန် ကြိုးပမ်းသွားမည်ဟုလည်း ပြောကြားခဲ့သည်။

ယင်းနောက် အရေးကြီးသောသတ္တုဓာတ်များနှင့်စပ်လျဉ်း၍ သန့်ရှင်းသောစွမ်းအင်အသွင်ကူးပြောင်းမှုနှင့် စွမ်းအင်ဖူ လုံရေးကိုပံ့ပိုးကူညီရန် လာမည့်လများအတွင်းနားလည်မှုစာချွန်လွှာတစ်ခု‌ရေးထိုးရန်လည်းနှစ်နိုင်ငံသဘောတူခဲ့ကြသည်။

Source -Reuters


LEAVE A REPLY

Please enter your comment!
Please enter your name here