ရေဘေးသင့်ပါကစ္စတန်သို့ မင်းသမီးအင်ဂျလီနာဂျိုလီသွားရောက်
ဟာလဝတ်ဒ် နာမည်ကြီးမင်းသမီးတစ်ဦးဖြစ်သကဲ့သို့ ကုလသမဂ္ဂလူသားချင်းစာနာထောက်ထားသူ တစ်ဦးလည်းဖြစ်သည့် အင်ဂျလီနာဂျိုလီသည် ပါကစ္စတန်တောင်ပိုင်းရှိ ရေလွှမ်းမိုးမှုဒဏ်အဆိုးရွားဆုံးခံခဲ့ရကာ သေဆုံးသူဦးရေ ၁,၅၅၉ ဦးအထိမြင့်တက်ခဲ့သည့် ဒေသများသို့ စက်တင်ဘာ ၂၀ ရက် အင်္ဂါနေ့က ကြိုတင်အကြောင်းကြားခြင်းမရှိ သွားရောက်လည်ပတ်ခဲ့သည်ဟု တာဝန်ရှိသူများက ပြောကြားခဲ့သည်။
ဇွန်လလယ်ကတည်းက ရေကြီးမှုကြောင့် လူပေါင်း ၆၉၂ ဦးသေဆုံးကာ နေအိမ်ထောင်ပေါင်းများစွာပျက်စီးခဲ့ပြီး လူသန်းတစ်ဝက်ခန့် အိုးမဲ့အိမ်မဲ့ဖြစ်ခဲ့သည့်တောင်ပိုင်း ဆဒ်ပြည်နယ်၏မြို့တော် ကာရာချီရှိလေဆိပ်တစ်ခုသို့ မင်းသမီးဂျိုလီရောက်ရှိလာသည်ကို ရုပ်မြင်သံကြားအစီအစဉ်တစ်ခု၌ပြသခဲ့သည်။ယင်းနောက်သူသည် ရေဘေးသင့်ဒေသအချို့သို့သွားရောက် အားပေးခဲ့ကြောင်းဒေသခံမီဒီယာများ၏ ဖော်ပြချက်အရသိရှိရသည်။
ထင်ရှားသောနိုင်ငံတကာ အကူအညီပေးရေးအဖွဲ့တစ်ခုဖြစ်သည့် IRC ၏ပြောကြားချက်အရ ဂျိုလီသည်ရေလွှမ်းမိုးမှုဒဏ် အဆိုးရွားဆုံးခံခဲ့ရသော ပါကစ္စတန်ပြည်သူများအား ကူညီထောက်ပံ့ရန်သွားရောက်ခြင်းဖြစ်ကြောင်းသိရှိရသည်။
ရေကြီးပြီးနောက် ရေမှတဆင့်ကူးစက်သောရောဂါများပါဖြစ်ပွားလျက်ရှိပြီး ဇူလိုင်လမှစ၍သေဆုံးသူ ၃၀၀ နီးပါးရှိခဲ့သည့် ဒါဒူဒေသသို့သွားရောက်ခဲ့သည့် ဂျိုလီ၏ခရီးစဉ်နှင့်ပတ်သက်၍ အစိုးရကမှတ်ချက်တစ်စုံတစ်ရာ မပြုခဲ့ပေ။လက်ရှိတွင် ရေဘေးသင့်ပြည်သူများကြားဖြစ်ပွားနေသော ရေမှတဆင့် ကူးစက်သည့်ရောဂါများအား ထိန်းချုပ်နိုင်ရန်ဆရာဝန်များကြိုးပမ်းလျက်ရှိသည်။
၇၇ ကြိမ်မြောက် ကုလသမဂ္ဂအထွေထွေညီလာခံကို တက်ရောက်ရန် ပါကစ္စတန်ဝန်ကြီးချုပ် ရှာဘတ်ဇ်ရှာရစ်ဖ် သည် နူးယော့ခ်မြို့သို့ရောက်ရှိနေစဉ် ဂျိုလီက ယခုကဲ့သို့လာရောက်ခြင်းဖြစ်သည်။ဝန်ကြီးချုပ်သည် ၎င်း၏မိန့်ခွန်း၌ ရာသီဥတုပြောင်းလဲမှုကြောင့် ရေလွှမ်းမိုးမှုခံခဲ့ရသည့် ဆင်းရဲနွမ်းပါးသောနိုင်ငံ၏ ပျက်စီးဆုံးရှုံးမှုများကို အဓိကထားမီးမောင်းထိုးပြမည်ဖြစ်သည်။
ရေကြီးရေလျှံမှုများကြောင့် နိုင်ငံ၏စီးပွားရေးကို အမေရိကန်ဒေါ်လာ ၃၀ ဘီလီယံ (စင်္ကာပူဒေါ်လာ ၄၂ ဒသမ ၃ ဘီလီယံ) အထိပျက်စီးစေခဲ့သည်ဟု ပါကစ္စတန်ကပြောကြားခဲ့သည်။
Source – AP/sr
Photo credit – TIME OF PAKISTAN