ဒေါ်လာဈေး၊ ရွှေဈေးနှင့် ပတ်သက်သည့် ကောလာဟလများ စီးပွားကူးသန်းဝန်ကြီးထွက်ရှင်း၊ လူထုကို ခြောက်တွန်းသည့် လုပ်ရပ်ဟုဆို
ယခုရက်ပိုင်း ထွက်ပေါ်နေသည့် ရွှေဈေးနှင့် ဒေါ်လာဈေး နှုန်းများနှင့် ပတ်သက်သည့် ကောလာဟလများနှင့် ပတ်သက်၍ သတင်းမှားများသာဖြစ်ပြီး လူထုကိုခြောက်တွန်းသည့် သတင်းများသာ ဖြစ်ကြောင်း စီးပွားကူးသန်း ဝန်ကြီး ဦးအောင်နိုင်ဦးက ပြောသည်။
အစိုးရ အစည်းဝေးဆုံးဖြတ်ချက်အရ ဒေါ်လာ ဈေးနှုန်း ၂၅၀၀ ကျပ်နှင့် ရွှေ တစ်ကျပ်သား ၂၅ သိန်းနှုန်း ရောင်း ချရမည်ဟု ထွက်ပေါ်နေသည့် သတင်းများနှင့် ပတ်သက် ၍ ၎င်းက ပြောကြားခဲ့ခြင်း ဖြစ်သည်။
“မယုံပါနဲ့။ဒီရက်ပိုင်းတွေမှာ စီးပွားရေးနဲ့ ငွေကြေးစျေးကွက်အတွင်း သမားရိုးကျမဟုတ်တဲ့ လုပ်ဆောင်မှုတွေ။လူထုကို ထင်ယောင်ထင်မှားဖြစ်စေမယ့် သတင်းမှားထုတ်လွှင့်မှုတွေ ခပ်စိတ်စိတ် တွေ့လာရပါတယ်။ ဒီနေ့တွေ့လိုက်ရတဲ့ လုပ်ကြံသတင်း။ သတင်းမှားတစ်ခုကို ပူးတွဲဖော်ပြပေးလိုက်ပါတယ်။ လုံးဝမှားယွင်းပြီး အခြေအမြစ်မရှိဘဲ လူထုကို ချောက်တွန်းတဲ့ သတင်းလို့ ပြောပြလိုပါတယ်” ဟု ဝန်ကြီး ဦးအောင်နိုင်ဦးက ၎င်းကိုယ်တိုင် အသုံးပြုသည့် လူမှုကွန်ရက်စာမျက်နှာတွင် ရေးသားခဲ့ခြင်း ဖြစ်သည်။
လက်ရှိတွင် ဈေးကွက်အတွင်း အမေရိကန် တစ်ဒေါ်လာလျှင် မြန်မာငွေ ၃၂၀၀ ကျပ် ပေါက်နေပြီး အကယ်ဒမီ မီးလင်းအခေါက်ရွှေ တစ်ကျပ်သားလျင် ၂၉ သိန်းကျပ်ဝန်း ကျင်ရောင်းဝယ်နေကြခြင်း ဖြစ်သည်။
နစက အစိုးရက ရွှေဈေးနှင့် ဒေါ်လာဈေးနှုန်း သတ်မှတ်ချက်များ မကြာခဏ ပြောင်းလဲလုပ်ဆောင်နေသော် လည်း ဈေးကွက်အတွင်း ဈေးနှုန်းကွာဟမှုကို မထိန်း ချုပ်နိုင်သည့်အခြေအနေရင်ဆိုင်နေချိန်တွင် လူမှုကွန်ရက် အ သုံးပြုသူအချို့၏ စိစစ်ခြင်းကင်းမဲ့စွာ ရေးသားဖြန့်ဝေမှု၊ ထပ်ဆင့် ကူးယူမျှဝေမှုများကြောင့် အသိအမြင်နည်းပါးသည့် အခြေခံပြည်သူများအကြား ကောလာဟလများ မကြာခဏ ပေါ်ပေါက်နေခြင်း ဖြစ်သည်။
ယခုရက်ပိုင်းအတွင်း ပြည်တွင်းမှ ရွှေလုပ်ငန်းရှင်များကို နေပြည်တော်သို့ ခေါ်ယူတွေ့ဆုံမှုများ ပြုလုပ်ကာ ရွှေဈေး နှုန်းနှင့်ပတ်သက်သည့် ဆွေးနွေးမှုများ လုပ်ဆောင်ခဲ့သော်လည်း နစကအနေဖြင့် ဈေးနှုန်း တရားဝင်သတ်မှတ်သည့် သတင်းထုတ်ပြန်မှု တစ်စုံတရာ လုပ်ဆောင်ခြင်းမရှိသေးပေ။
လက်ရှိထွက်ပေါ်နေသည့် ကောလာဟလသတင်းများနှင့်ပတ်သက်၍ ပြည်သူများအနေဖြင့် မယုံကြည်ကြရန်လည်း စီးပွားကူးသန်းဝန်ကြီး ဦးအောင်နိုင်ဦးက ထပ်မံ ပြောကြားထားသည်။