နိုင်ငံ၏ မြစ်ချောင်းကွန်ရက်များအား ရေရှည်ထိန်းသိမ်းအသုံးပြုနိုင်ရန် ရေဝေရေလဲဒေသ သစ်တောများ ထိန်းသိမ်းရေးအား ထိရောက်စွာ ဆောင်ရွက်ရန်လိုအပ်ဟု နစက ဥက္ကဋ္ဌပြော
နစက ဥက္ကဋ္ဌက နေပြည်တော်၊ဒက္ခိဏခရိုင်၊ဒက္ခိ ဏသီရိမြို့နယ်၊မာရဝိဇယဘုရားသွားလမ်း စံ ပယ်လမ်းဘေးဝဲယာ၌ သြဂုတ် ၁၁ ရက်(ယနေ့) နံနက်ပိုင်းကပြုလုပ်သည့် ၂၀၂၂ ခုနှစ်၊မိုးရာသီသစ်ပင်စိုက်ပျိုးပွဲ၌ ပြောကြားခဲ့ခြင်းဖြစ်သည်။
မြန်မာနိုင်ငံ၌ မြစ်ကြီး ၄ သွယ် အပါအဝင် မြစ်ချောင်းကွန်ရက်များမှ နှစ်စဉ်ရေချို ဧကပေသန်း ၈၀၀ ကျော် စီးဆင်းလျက်ရှိကာ တစ်နိုင်ငံလုံးအတိုင်းအတာဖြင့် နှစ်စဉ်ရေချိုပမာဏ ဧကပေ ၄၅ သန်းကျော်သာ အသုံးပြုလျက်ရှိ၍ နှစ်စဉ်စီးဆင်းနေသည့် ရေချိုပမာဏ၏ ၅ ရာခိုင်နှုန်းခန့်သာ သုံးစွဲနေသည်ဟုပြောသည်။
“နိုင်ငံဖွံ့ဖြိုးတိုးတက်ဖို့အတွက် ရေသယံဇာတဖွံ့ဖြိုးရေးလုပ်ငန်းတွေ ရေအရင်းအမြစ်တွေကို အခြေခံတဲ့ စီးပွားရေးရင်းနှီးမြှုပ်နှံမှုလုပ်ငန်းတွေလုပ်ဖို့ အလားအလာကောင်းတွေရှိပါတယ်”ဟု နစက ဥက္ကဋ္ဌကပြောသည်။
ထို့ကြောင့် နိုင်ငံ၏ မြစ်ချောင်းကွန်ရက်များအား ရေရှည်ထိန်းသိမ်းအသုံးပြုနိုင်ရန် ရေဝေရေလဲဒေသ သစ်တောများထိန်းသိမ်းရေးအား ထိရောက်စွာဆောင်ရွက်ရန်လိုအပ်သည်ဟုပြော သည်။
အလားတူ ရေဝေရေလဲဒေသရှိ သစ်တောများ ပျက်စီးပြုန်းတီးပါက နုန်းအနည်အနှစ်များသည် ရေများ၊မြစ်ချောင်းများအတွင်း တိုက်ရိုက်စီးဆင်းခြင်း၊ရေစီးကြောင့်မြေပြိုတိုက်စားခြင်း၊ရေကြီးခြင်း၊မြေအောက်ရေထိန်းသိမ်းနိုင်မှုမရှိခြင်း၊မြစ်ချောင်းများတိမ်ကောစေခြင်း၊စိုက်ပျိုးမြေများရေတိုက်စားမှုကြောင့်ပျက်စီးခြင်း စသည့် နောက်ဆက်တွဲဆိုးကျိုးများဖြစ်ပေါ်စေနိုင်သည်ဟု ပြောသည်။
“ဒါ့အပြင် ရေသယံဇာတအခြေပြုဖွံ့ဖြိုးရေး လုပ် ငန်းတွေဖြစ်တဲ့ ရေအသုံးပြုရေး၊လျှပ်စစ်ထုတ် လုပ်ရေး၊ငါးနဲ့ရေထွက်ကုန် သယံဇာတထုတ်လုပ်ရေး၊သယ်ယူပို့ဆောင်ရေးလုပ်ငန်းများကိုပါ ထိ ခိုက်နိုင်တာကြောင့် ရေဝေရေလဲ ဧရိယာအတွင်းက သစ်တောတွေထိန်းသိမ်းရေးကို ထိထိရောက်ရောက်ဆောင်ရွက်သွားကြဖို့လိုပါတယ်”ဟု နစက ဥက္ကဋ္ဌကပြောသည်။
အလားတူ မြန်မာနိုင်ငံမိုးနည်းရပ်ဝန်းရှိ အပူပိုင်းဒေသသစ်တောများ ထိန်းသိမ်းရေးကိုလည်း အာရုံစိုက်ဆောင်ရွက်ရမည်ဟု ပြောသည်။
အပူပိုင်းဒေသသစ်တောများ ပြုန်းတီးပါက မိုးကွင်းကာ မိုးခေါင်ရေရှားခြင်း၊မြေအောက်ရေဆုံးရှုံးခြင်း၊ရေထွက်စိမ့်စမ်းများပျောက်ကွယ်ခြင်း၊ မြေဆီလွှာ အဆင့်အတန်း ကျဆင်းရာမှ သဲကန္တာရဖြစ်ထွန်းနိုင်ခြင်း အကျိုးဆက်များ ဖြစ်လာနိုင်သည်ဟုပြောသည်။
“စိုက်ပျိုးရေရရှိရေးကိုလည်း ထိခိုက်စေသလို ဒေသခံပြည်သူတွေရဲ့ အသက်မွေးဝမ်းကျောင်း လုပ်ငန်းတွေကိုလည်း ထိခိုက်စေပါတယ် အပူပိုင်းဒေသရဲ့ အိုအေစစ်ဖြစ်တဲ့ ပုပ္ပါးတောင်စိမ်း လန်းစိုပြည်ရေးလုပ်ငန်းများကို ၁၉၉၀ ပြည့်နှစ်ကစပြီး ထိထိရောက်ရောက် ဆောင်ရွက်ခဲ့တာကြောင့် ရေထွက်စိမ့်စမ်းများ ပြန်လည်ပေါ်ထွက်လာပြီး ရာသီဥတုမှန်လာတာကြောင့် စိုက်ပျိုးရေးလုပ်ငန်းတွေ အရင်ကထက် ပိုမိုဆောင်ရွက်လာနိုင်သလို စိမ်းလန်းစိုပြည်သာယာလှပပြီး ဖွံ့ဖြိုးလာတာကို တွေ့ရှိရမှာဖြစ်ပါတယ်”ဟု နစက ဥက္ကဋ္ဌကပြောသည်။