ကုန်တင်သင်္ဘောလေးစင်းယူကရိန်းမှဆက်လက်ထွက်ခွာ

0
153

ကုန်တင်သင်္ဘောလေးစင်းယူကရိန်းမှဆက်လက်ထွက်ခွာ

ကိဗ်၊ဩဂုတ် ၇

ယူကရိန်းမှစားသောက်ကုန်များကို တင်ဆောင်ထားသည့် သင်္ဘောလေးစင်းသည် ယူကရိန်းပင်လယ်နက်ဆိပ်ကမ်းများမှ တနင်္ဂနွေနေ့ (သြဂုတ် ၇ ရက်)တွင် ထွက်ခွာသွားခဲ့ကြောင်း ယူကရိန်းနှင့်တူရကီတာဝန်ရှိသူများကပြောကြားခဲ့သည်။

အဆိုပါ သင်္ဘောလေးစင်းတွင် ပြောင်းနှင့် အခြားအစားအစာတန်ချိန် ၁၇၀,၀၀၀ နီးပါး တင်ဆောင်ထားကြောင်း ယူကရိန်းပင်လယ် ဆိပ်ကမ်းအာဏာပိုင်က ဖေ့စ်ဘွတ်တွင် ပြောကြားခဲ့သည်။

ရုရှား၊ ယူကရိန်း၊ တူရကီနှင့်ကုလသမဂ္ဂ အမှုထမ်းများပါဝင်သည့် အစ္စတန်ဘူလ်ရှိ ပူးတွဲညှိနှိုင်းရေးစင်တာ (JCC) ကစပါးတင်ပို့မှု ပြန်လည်စတင်ခြင်းကိုကြီးကြပ်လျက်ရှိသည်။

ကုလသမဂ္ဂနှင့်တူရကီတို့သည် ပြီးခဲ့သည့်လက သဘောတူညီချက်ကို ကြားဝင်စေ့စပ်ခဲ့သည်။ယူကရိန်းကဂျုံတင်ပို့မှုရပ်တန့်သွားခြင်းကြောင့် ကမ္ဘာတစ်ဝန်းတွင် ငတ်မွတ်ခေါင်းပါးမှုနှင့်ဈေးနှုန်းမြင့်မားမှုများဖြစ်ပွားနိုင်ကြောင်းလည်း ကုလသမဂ္ဂက သတိပေးထားသည်။

စနေနေ့၌ ဂျုံများတင်ဆောင်ရန် ယူကရိန်းသို့ နိုင်ငံခြားအလံတင်သင်္ဘောတစ်စင်း ပထမဆုံးအကြိမ် ရောက်ရှိလာခဲ့ကြောင်း အခြေခံအဆောက်အဦဝန်ကြီး Oleksandr Kubrakov ကပြောကြားခဲ့သည်။

“သိပ်မကြာခင်မှာ တစ်လကိုသင်္ဘောအစီးရေ ၁၀၀ လောက်နဲ့ ဆိပ်ကမ်းတွေရဲ့စွမ်းဆောင်ရည်‌ေကာင်းအောင်ဆောင်ရွက်ပေးသွားဖို့ စီစဉ်ထားပါတယ်” ဟုလည်း၎င်းကပြောကြားခဲ့သည်။

ယူကရိန်းသည်မကြာမီတွင် ဂျုံတင်ပို့မှု၏ ပဏာမခြေလှမ်းအဖြစ် Pivdennyi ဆိပ်ကမ်းကို ထပ်တိုးအသုံးပြုရန် စီစဉ်နေကြောင်း ၎င်းကပြောကြားခဲ့သည်။ရလဒ်အနေဖြင့် ယူကရိန်းသည် တစ်လလျှင် အနည်းဆုံးကုန်စည်တန်ချိန် ၃ သန်း တင်ပို့နိုင်မည်ဟုမျှော်လင့်ထားရသည်။

ယူကရိန်းကို ရုရှားမကျူးကျော်ခင်က ရုရှားနှင့် ယူကရိန်းတို့ပေါင်းပါက ကမ္ဘာ့ဂျုံတင်ပို့မှု၏ သုံးပုံတစ်ပုံနီးပါးရှိသည်ဟုသိရသည်။ ရုရှားကယူကရိန်းအား ကျူးကျော်တိုက်ခိုက်မှုကို အထူးစစ်ဆင်ရေးဟုသာခေါ်ဆိုခဲ့သည်။ပင်လယ်နက်လမ်းကြောင်းမှတစ်ဆင့် သင်္ဘောအသစ်ငါးစင်း ထွက်ခွာခွင့်ပြုခဲ့ကြောင်း JCC က စနေနေ့နှောင်းပိုင်းတွင် ပြောကြားခဲ့သည်။လေးစင်းတွင် မက်ထရစ်တန်ချိန် ၁၆၁,၀၈၄ ပမာဏရှိသည့် အစားအစာများပါဝင်ပြီး Chornomosk နှင့် Odesa ဆိပ်ကမ်းများမှထွက်ခွာသွားကာ အခြားတစ်စင်းသည် ယူကရိန်းသို့ဆိုက်လာခြင်းဖြစ်သည်ဟုဆိုသည်။

ယူကရိန်းမှထွက်ခွာသွားသော သင်္ဘောများထဲတွင် Glory အမည်ဖြင့်သင်္ဘောတွင် တန်ချိန် ၆၆,၀၀၀ ပမာဏရှိသည့် ပြောင်းများတင်ဆောင်ကာ အစ္စတန်ဘူလ်သို့ထွက်ခွားသွားကြောင်းနှင့် တူရကီ၏ Iskenderun မြို့သို့သွားမည့် Riva Wind အမည်ရှိသင်္ဘောတွင် ပြောင်းတန်ချိန် ၄၄,၀၀၀ တင်ဆောင်ထားသည်ဟု တူရကီကာကွယ်ရေးဝန်ကြီးဌာနကဆိုသည်။

အခြားနှစ်စင်းအနက်တစ်စင်းမှာ Star Helena အမည်ရှိသင်္ဘောဖြစ်ကာ စားသောက်ကုန်တန်ချိန် ၄၅,၀၀၀ ပါရှိကာ တရုတ်နိုင်ငံသို့ဆိုက်ကပ်မည်ဖြစ်ပြီး အခြားတစ်စင်းမှာ Mustafa Necati အမည်ရှိပြီး နေကြာဆီတန်ချိန် ၆,၀၀၀ တင်ဆောင်လာကာ အီတလီသို့ဆိုက်ကပ်မည်ဟုသိရသည်။

Source – Reuters/mi


LEAVE A REPLY

Please enter your comment!
Please enter your name here