ကပ်ရောဂါဖြစ်ပွားမှု၌ ဂျပန်ကမ္ဘာ့နံပါတ်တစ်ဖြစ်နေ

ကပ်ရောဂါဖြစ်ပွားမှု၌ ဂျပန်ကမ္ဘာ့နံပါတ်တစ်ဖြစ်နေ

တိုကျို၊ဇူလိုင် ၂၇

ယခုအခါတွင် ဂျပန်နိုင်ငံသည် ကပ်ရောဂါဖြစ်ပွားမှု၌ကမ္ဘာ့စံချိန်တင်အနေအထား၌ရှိနေပြီး နိုင်ငံ၏တင်းကျပ်သော နယ်စပ်ထိန်းချုပ်မှုများကိုဖြေလျှော့ပေးမည့် မျှော်လင့်ချက်ကလည်း မရေမရာဖြစ်လာခဲ့သည်။

အင်္ဂါနေ့တွင် နိုင်ငံတစ်ဝန်း ကူးစက်မှုအသစ် ၁၉၆,၀၀၀ ကိုအတည်ပြုခဲ့ပြီး၊ ဒုတိယအများဆုံး စံချိန်တင်ကာအမေရိကန်နှင့်ဂျာမနီကိုကျော်ခဲ့သည်။Our World In Data အရ ဂျပန်သည် တဦးချင်းအလိုက်နှိုင်းယှဥ်ပါက စင်္ကာပူနှင့်သြစတြေးလျတို့နောက် အဆင့် ၉ တွင်ရှိနေသည်။

တချိန်က ဂျပန်သည် အခြားနိုင်ငံအများစုထက် နယ်စပ်ဖြတ်ကျော်ခွင့်ကို ပိုမိုတင်းကျပ်ထားခဲ့သည်။ဥပမာအားဖြင့် ခရီးသွားများကို သတ်မှတ်ထားသော ပက်ကေ့ဂျ်ခရီးစဉ်များဖြင့်သာ ဝင်ခွင့်ပြုပြီး နေ့စဉ်လာရောက်သူဦးရေ ၂၀,၀၀၀ ကို ကန့်သတ်ထားခြင်းမျိုးဖြစ်ပြီး ၎င်းပမာဏသည် ၂၀၁၉ ခုနှစ်ကပ်ရောဂါမဖြစ်ပွားမီ ဝင်ရောက်ခဲ့သောနေ့စဉ်ပျမ်းမျှလူ ၁၄၀,၀၀၀ ထက် နည်းပါးကြောင်းတွေ့ရှိရသည်။

အစိုးရ၏ကိုဗစ် ထိန်းချုပ်ရေးတွင်ပါဝင်သောအလုပ်အဖွဲ့တစ်ဖွဲ့က ကူးစက်မြန်သော်လည်း အသေအပျောက်နည်းသော BA.5 အိုမီခရွန်မျိုးကွဲကြောင့် ရောဂါဖြစ်ပွားမှု သိသိသာသာတိုးလာခြင်းဖြစ်သည်ဟုဆိုသည်။ဂျပန်လူမျိုး ၆၀ ရာခိုင်နှုန်းကျော်ကို ကာကွယ်ဆေးသုံးကြိမ်ထိုးထားပြီးဖြစ်သော်လည်း နောက်ဆုံးအကြိမ်ထိုးနှံပြီးမှုကြာပြီဖြစ်သောကြောင့်ရောဂါပိုးကူးစက်မှု မြင့်တက်လာနိုင်သည် ဟုလည်းဆိုသည်။

ကူးစက်လွယ်သော အိုမီခရွန်မျိုးကွဲများ ပျံ့နှံ့နေသော်လည်း လူများသည်ကပ်ရောဂါနှင့်လိုက်လျောညီထွေ နေထိုင်ရမှုကို ငြီးငွေ့လာကြသည်။Japan Productivity Center မှ မကြာသေးမီက လူပေါင်း ၁,၁၀၀ အားပြုလုပ်ခဲ့သော အွန်လိုင်းစစ်တမ်းတစ်ခုအရ အိမ်မှအလုပ်လုပ်သူပမာဏသည် ၁၆ ရာခိုင်နှုန်းသာရှိကာ ၂၀၂၀ ခုနှစ် မေလတွင် စတင်ခဲ့သော စစ်တမ်းများ၏နောက်ပိုင်း အနိမ့်ဆုံးကိန်းဂဏန်းပမာဏဖြစ်သည်။လူအချင်းချင်း ထိတွေ့ဆက်ဆံမှု များလာသည်နှင့်အမျှ ကူးစက်နိုင်ခြေလည်း တိုးလာနိုင်သည်ဟုဖော်ပြထားသည်။

တိုကျိုတွင်ဆေးရုံရှိကုတင်များ၏ ၅၀ ရာခိုင်နှုန်းသည် လူနာများဖြင့်ပြည့်နေသည်။ကျန်းမာရေး စောင့်ရှောက်မှုအားနည်းသော ကျေးလက်ဒေသများတွင် အခြေအနေသည် ပိုမိုဆိုးရွားလာကာ Shizuoka စီရင်စု၏အုပ်ချုပ်ရေးမှူး Heita Kawakatsu က သတင်းထောက်များအား “ပုံမှန်ကျန်းမာရေးစနစ်က ထိခိုက်နေပြီ” ဟု ပြောကြားခဲ့ကာ ရောဂါအခြေနေမပြင်းထန်ပါက အရေးပေါ်အခန်းများအသုံးမပြုကြရန်ဒေသခံများအားတိုက်တွန်းထားသည်။

ဂျပန်နိုင်ငံတွင် နွေရာသီအားလပ်ရက် ရာသီသို့ ရောက်ရှိလာပြီး ပြည်တွင်းခရီးသွားများ ပိုမိုများပြားလာခြင်းကြောင့်လည်း အခြေအနေက ပိုမိုဆိုးရွားလာနိုင်သည်။ဩဂုတ်လ ၁၀ ရက်မှ ၁၇ ရက်အထိ တစ်ပတ်အတွင်း ကျည်ဆန်ရထားလက်မှတ်များ ကြိုတင်ဝယ်ယူမှုမှာ စုစုပေါင်း ၁ ဒသမ ၄ သန်းရှိပြီး ယမန်နှစ်အလားတူအချိန်ထက် ၂ ဒသမ ၈ ဆခန့် ပိုများကြောင်း JR Group ကုမ္ပဏီက ကြေညာခဲ့သည်။

ကိုဗစ်ရောဂါဖြစ်ပွားမှုများ မြင့်တက်နေသော်လည်း ဗဟိုအစိုးရသည် လူမှုရေးဆိုင်ရာပွဲလမ်းသဘင် ကန့်သတ်ချက်များနှင့်တင်းကျပ်သော နယ်စပ်စည်းမျဥ်းများကို ချမှတ်ထားခြင်းမရှိပေ။

သို့သော်လည်း “ပြည်တွင်းအခြေအနေကို နိုင်နိုင်နင်းနင်း မထိန်းချုပ်နိုင်သရွေ့ နယ်စပ်စည်းမျဥ်းကန့်သတ်ချက်များ လျှော့ပေါ့ရန်ခက်ခဲ‌နေသေးသည်” ဟု Japan Research Institute မှ စီးပွားရေးပညာရှင်အကြီးအကဲ Shinichi Nishioka က ပြောကြားခဲ့သည်။ သို့သော်လည်း ဂျပန်နိုင်ငံသည်ကူးစက်မှုအသစ်များနှင့် စီးပွားရေးလုပ်ဆောင်မှုအပေါ် ကန့်သတ်ချက်များကြားတွင် ကုန်သွယ်ရေးသဘောထားကို ဟန်ချက်ညီစေရန် ရုန်းကန်နေရဆဲဖြစ်ကြောင်း ၎င်းကထပ်လောင်းပြောကြားခဲ့သည်။

သတင်းကောင်းကတော့ လက်ရှိဖြစ်ပွားမှုလှိုင်းဟာ မကြာခင်မှာ အထွတ်အထိပ်သို့ ရောက်နိုင်ဖွယ်ရှိပါတယ်။Nagoya Institute of Technology မှ ပါမောက္ခအဖွဲ့တစ်ဖွဲ့သည် ယခင်က ဖြစ်ပွားခဲ့ဖူးသော‌ဒေတာများ၊ ကာကွယ်ဆေးထိရောက်မှုနှင့် လူသားစီးဆင်းမှုဒေတာများအပေါ် အခြေခံ၍ ရောဂါအသစ်အရေအတွက်ကို ခန့်မှန်းရန်ဥာဏ်ရည်တုကိုအသုံးပြုခဲ့သည်။

BA.5 ၏ကူးစက်မှုသည် BA.2 ထက် ၁ ဒသမ ၃ ဆပိုမိုမြင့်မားသည်ဟူသော အချက်အပေါ်အခြေခံ၍ တိုကျိုမြို့တွင်ကူးစက်မှုအသစ် အရေအတွက်သည် အင်္ဂါနေ့ကကူးစက်မှုပေါင်း ၃၁,၅၉၃ ခုနှင့်နှိုင်းယှဉ်ပါက သြဂုတ်လ ၆ ရက်နေ့တွင်လူပေါင်း ၃၉,၀၀၀ ဝန်းကျင်ဖြင့်အထွတ်အထိပ်သို့ရောက်ရှိရန်ခန့်မှန်းထားကြောင်းသိရှိရသည်။

Source – Nikkei Asia