ဖားကန့်တွင် မိုးအဆက်မပြတ်ရွာသွန်းနေခြင်းကြောင့် ရေကြီးရေလျှံဆက်လက်ဖြစ်ပွား၊ ဒေသခံပြည်သူ ၂၀၀၀ ခန့် အရေးပေါ်အကူအညီလိုအပ်နေသေး
ကချင်ပြည်နယ်၊ ဖားကန့်မြို့တွင် ယမန်နေ့ ဇွန် ၁၅ ရက်အထိ မိုးဆက်တိုက်ရွာသွန်းနေရာရေကြီးရေလျှံဆက်လက်ဖြစ်ပွားနေသဖြင့် ဒေသခံပြည်သူ ၂၀၀၀ခန့် အစားအသောက်များအရေးပေါ်အကူအညီလိုအပ်နေသည်ဟု ဒေသခံတစ်ဦးထံမှသိရသည်။
အဆိုပါ ရေကြီးရေလျှံဖြစ်ပွားမှုသည့် ပြီးခဲ့သော ဇွန် ၁၁ ရက်၌ ဥရုချောင်း ရေကြီးရာမှ မြို့ပေါ်ရပ်ကွက်များရေနစ်မြှပ်မှုဖြစ်ပွားခဲ့ခြင်းဖြစ်သည်။
ဇွန် ၁၁ရက်မှစတင်၍ ရေကြီးရေလျှံဖြစ်ပွားခဲ့သော ဖားကန်မြို့ပေါ် ရပ်ကွက်များသည် ဇွန် ၁၃ ရက်တွင် ရေအနည်းငယ်ပြန်လည်ကျဆင်းခဲ့သော်လည်း နောက်ရက်တွင်မိုးဆက်တိုက်ဆက်လက်ရွာသွန်းခဲ့ခြင်းကြောင့် ရေဘေးဆက်လက်သင့်နေကြခြင်းဖြစ်သည်။
ရေကကျလိုက် တက်လိုက်ဆိုတော့လေ တချို့ရေအရမ်းမဝင်တဲ့ အိမ်တွေကျတော့ ရေနည်းနည်းကျသွားတဲ့ခါ ပြန်နေကြတာကိုတွေ့ရတယ်။ အကူအညီကတော့ပြောမှာ မဟုတ်တော့ဘူး။ တတ်နိုင်တဲ့ဘက်ကနေ ဝိုင်းဝန်း ကူညီပေးကြပါလို့ပဲ ပြောချင်ပါတယ် ဟု ကယ်ဆယ်ရေးအဖွဲ့တာဝန်ရှိသူတစ်ဦးကပြောကြားထားသည်။
ဖားကန့်မြို့ ရပ်ကွက်များ၏ လူနေအိမ်များသည် လမ်းထက်နိမ့်နေသောကြောင့် နေအိမ်အတွင်း ရေဝင်ရောက်မှု ပိုမိုများပြားခဲ့ခြင်းဖြစ်ကြောင်း သိရသည်။
ဥရုချောင်းရေကြီးလာသဖြင့် ဇွန်လ ၆ ရက်နေ့ကလည်း ဖားကန့်မြို့နယ် ဆိပ်မူကျေးရွာအုပ်စု မမုံစံပြကျေးရွာနှင့် ဆိုင်းတောင်ကျေးရွာကို ဆက်သွယ်ထားသော တံတားမျောပါသွားခဲ့သည်။
ဖားကန့်မြို့နယ် ဆယ်ဇင်ကျေးရွာတွင်လည်း ဇွန်လ ၁၂ ရက်နေ့က စတင်ပြီး အိမ်ခြေ ၁၀၀ ကျော် ရေဘေးဒဏ် ခံခဲ့ရသည်။
ဖားကန့်မြို့နယ်တွင် နှစ်စဉ်နှစ်တိုင်း ဥရုချောင်းရေကြီးသဖြင့် ဖားကန်မြို့မ ကျောက်ဝိုင်း၊ ဌက်ပျော်တော၊ မရှီကထောင်စသည့်ရပ်ကွက်များနှင့် လုံးခင်းကျေးရွာအုပ်စုတွင် ရေဘေးဒဏ်ခံနေရကြောင်း သိရသည်။
