မြန်မာနေရှင်နယ်လိဂ် ၂၀၂၂ အမှတ်ပေးလိဂ်ပြိုင် ပွဲအား ဇွန် ၂၅ ရက်မှစတင်ကာပြန်လည်ကျင်းပသွားမည်

0
184

မြန်မာနေရှင်နယ်လိဂ် ၂၀၂၂ အမှတ်ပေးလိဂ်ပြိုင် ပွဲအား ဇွန် ၂၅ ရက်မှစတင်ကာပြန်လည်ကျင်းပသွားမည်

ကိုဗစ်(၁၉)ရောဂါအခြေအနေကြောင့် ယာယီရပ်နားထားခဲ့သည့် မြန်မာနေရှင်နယ်လိဂ် ၂၀၂၂ အမှတ်ပေးလိဂ်ပြိုင်ပွဲများအား ဇွန် ၂၅ ရက်မှစတင်ကာ နိုဝင်ဘာ ၆ ရက်အထိ ပြန်လည်ကျင်းပသွားမည်ဖြစ်ကြောင်း မြန်မာနေရှင်နယ်လိဂ်ကော်မတီအစည်းအဝေး(၂/၂၀၂၂)မှ သိရသည်။

ထို့ပြင် မြန်မာနေရှင်နယ်လိဂ်(၂) ၂၀၂၂ အမှတ်ပေးလိဂ်ပြိုင်ပွဲအား ဩဂုတ်ပထမပတ်မှ နိုဝင်ဘာဒုတိယပတ်အထိ၊ ၂၀၂၂ Myanmar Women League ပြိုင်ပွဲအား ယခုနှစ်ထဲ၌ ပြန်လည်ကျင်းပရန် စီစဉ်သွားမည်ဟု သိရသည်။

အဆိုပါ အစည်းအဝေးအား ဇွန် ၉ ရက်ကပြုလုပ်ရာ မြန်မာနိုင်ငံဘောလုံးအဖွဲ့ချုပ်ဥက္ကဋ္ဌနှင့် MNL ကလပ်အသင်းပိုင်ရှင်/ဥက္ကဋ္ဌများတက်ရောက်၍ ပြိုင်ပွဲများပြန်လည်ကျင်းပရန် သဘောတူဆုံးဖြတ်ခဲ့ကြခြင်းဖြစ်ကာ အာရှကလပ်အသင်းပြိုင်ပွဲများတွင် မြန်မာကလပ်အသင်းများပုံမှန် ပြန်လည်ယှဉ်ပြိုင်နိုင်ရန်လည်း အတည်ပြုဆုံးဖြတ်ခဲ့ကြသည်။

ထို့ကြောင့် လိဂ်တာဝန်ရှိသူများအနေဖြင့် တတ် နိုင်သမျှစပွန်ဆာများများရရှိရန် ကြိုးစားဆောင် ရွက်သွားပြီး ကျစ်ကျစ်လစ်လစ်ဖြင့် လိဂ်ပြိုင်ပွဲများအား အောင်မြင်စွာကျင်းပနိုင်ရန် ပိုမိုအားထည့်ကြိုးစားကာ စနစ်တကျစီမံဆောင်ရွက်သွားရေး၊ဘတ်ဂျက်အား ပိုမိုစိစစ်ခြိုးခြံချွေတာပြီး အောင်မြင်စွာကျင်းပပြုလုပ်နိုင်ရန် စီမံဆောင်ရွက်သွားရေးတို့အား ဆွေးနွေးခဲ့ကြသည်။

အလားတူ လိဂ်ပြိုင်ပွဲများမှာ ကာလအတန်ကြာ ရပ်နားထားရ၍ ကစားသမားများ၊နည်းပြအဖွဲ့များအပါအဝင် ဒိုင်လူကြီးများ၊ဘောလုံးနှင့်ဆက် နွယ်သည့် ဘောလုံးလောကသားများ စားဝတ်နေရေးအတွက် ရုန်းကန်နေရသည့်အခြေအနေများအား အတိုင်းအတာတခုထိပြေလည်စေရန်၊က လပ်အသင်းများနှင့်လိဂ်တာဝန်ရှိသူများမှ တတ်နိုင်သမျှစောင့်ရှောက်ပံ့ပိုးသွားရန်တို့ကိုလည်း ဆွေးနွေးခဲ့ကြသည်။

ထို့အတူ လိဂ်ကလပ်အသင်းများ ACL/ AFC Cup ပြိုင်ပွဲများ ပုံမှန်ပြန်လည်ဝင်ရောက်ယှဉ်ပြိုင်နိုင်ရန် လိဂ်အနေဖြင့်သင့်တင့်သည့် ရံပုံငွေတခုပံ့ပိုးထောက်ပံ့ပေးနိုင်ရန် စီစဉ်ဆောင်ရွက်သွားရေး၊ကလပ်အသင်းများလေ့ကျင့်မှုပြုလုပ်နိုင်ရေးအတွက် တတ်နိုင်သမျှစီစဉ်ညှိနှိုင်းဆောင်ရွက်ပေးရေး၊လိဂ်ပြိုင်ပွဲမှလက်ရွေးစင်အသင်းများအတွက် အားထားရသည့် ကစားသမားကောင်းများ ပေါ်ထွက်လာစေရေးတို့အတွက် တာဝန်ရှိသူအားလုံးမှ ပိုမိုအားထည့်ကြိုးစားဆောင်ရွက်သွားရေးတို့အား အသေးစိတ်ဆွေးနွေးခဲ့ကြသည်။

Photo-MNL


LEAVE A REPLY

Please enter your comment!
Please enter your name here