မြန်မာအိမ်အကူအား နှိပ်စက်သည့် စင်္ကာပူအိမ်ရှင်အမျိုးသမီး ထောင်ဒဏ်၊ငွေဒဏ်ချမှတ်ခံရ
စင်္ကာပူ၊မေ ၃၀
မြန်မာအိမ်အကူအမျိုးသမီးကို ရိုက်နှက်ညှဉ်းပမ်းခဲ့သည့် စင်္ကာပူအိမ်ရှင်အမျိုးသမီးအား စင်္ကာပူဒေါ်လာတစ်ထောင်နှင့် ထောင်ဒဏ်ငါးလကျခံစေရန် ယနေ့တွင် အမိန့်ချမှတ်ခဲ့ကြောင်းသိရသည်။
အသက် ၃၅ နှစ်အရွယ်ရှိ Zhao Lin ဆိုသူအမျိုးသမီးသည် အိမ်အကူအား နာကျင်စေမှု လေးခုနှင့် အိမ်အကူအမျိုးသမီး၏ ဖုန်းအားဖျက်စီးခဲ့မှုအတွက် စွဲချက်တစ်မှု စုစုပေါင်းအမှုငါးမှုအတွက် အပြစ်ရှိကြောင်း သူမကိုယ်တိုင်ဝန်ခံခဲ့သည်။
ယခုအမိန့်သည် အမှုတစ်ခုစာအတွက်ဖြစ်ကာကျန်လေးမှုကိုမူ စီရင်ချက်မချရသေးပေ။Zhao ၏အိမ်တွင် မြန်မာအိမ်အကူအမျိုးသမီးသည် ၂၀၁၆ ခုနှစ်ကတည်းကစတင်အလုပ်ဝင်ခဲ့ခြင်းဖြစ်ကာ Zhao သည်သူမ၏ပထမဆုံး အလုပ်ရှင်ဖြစ်သည်။
ထိုအချိန်က အသက်လေးနှစ်အရွယ်ရှိ Zhao ၏ကလေးအားထိန်းသိမ်းစောင့်ရှောက်ခြင်းအပါအဝင် အခြားအိမ်မှုကိစ္စများအတွက် အိမ်အကူအမျိုးသမီးအား ငှားရမ်းခဲ့ခြင်းဖြစ်သည်။တစ်နှစ်ခန့်ကြာသည်အထိ ဘာပြဿနာမှမရှိခဲ့ပဲ ၂၀၁၇ ခုနှစ်မှစကာ Zhao သည်အိမ်အကူအား ကိုယ်ထိလက်ရောက်ရိုက်နှက်ခဲ့ခြင်းဖြစ်သည်။
လုပ်ငန်းခွင်အမှားများ (ပန်းကန်ခွက်ယောက်ကွဲခြင်း) လုပ်မိပါက လစာ စင်္ကာပူဒေါ်လာ ငါးရာရသည့်အထဲမှ ဒေါ်လာတစ်ရာမှနှစ်ရာအထိဖြတ်ခြင်းအပါအဝင်၊ရိုက်နှက်ကန်ကျောက်ခြင်းများအထိပါပြုလုပ်ခဲ့သည်။
ကျူးလွန်ခံရသူအမျိုးသမီးသည် Zhao မှ၎င်း၏သားဖြစ်သူ အရုပ်များအားသေချာမသိမ်းဟု အကြောင်းပြကာ ပါးရိုက်ခြင်း၊ကန်ကျောက်ခြင်းနှင့်ဆံပင်ဆွဲပါးရိုက်ခြင်းစသဖြင့်အနှိပ်စက်ခံခဲ့ရသည်။
နောက်ဆုံးတွင်ကျူးလွန်ခံရသူအမျိုးသမီးမှ သည်းမခံနိုင်သည့်အဆုံး ရဲကို ၂၀၁၈ ခုနှစ်က ဖုန်းဆက်အကြောင်းကြားကာတိုင်တန်းခဲ့ခြင်းဖြစ်သည်။ရဲများရောက်လာချိန်တွင် အိမ်ရှိ စီစီတီဗွီမှတ်တမ်းပြရန်ပြောသော်လည်း Zhao ကငြင်းဆန်ခဲ့သည်။ထို့နောက်တွင်တော့ ၎င်း၏ခင်ပွန်းပြန်ရောက်လာကာ ကင်မရာထဲမှ စီစီတီဗွီမှတ်တမ်းအား ရဲများစစ်ဆေးနိုင်ရန်ပေးခဲ့သည်။
ထို့နောက်ကျူးလွန်ခံရသူအမျိုးသမီးအား ရရှိဒဏ်ရာများအတွက်ဆေးကုသရန်ဆေးရုံသို့ပို့ဆောင်ပေးခဲ့သည်။အစောပိုင်းတွင် Zhao မှ အိမ်အကူအမျိုးသမီးအား သူမကျူးလွန်ခဲ့သည်များအပါအဝင်၊ဖုန်းပျက်ဆီးစေခဲ့မှုအတွက် စင်္ကာပူဒေါ်လာ ၆၃၀၀ ကိုဆန္ဒအလျောက်လျော်ကြေးပေးခဲ့သည်။
Zhao သည် တရားဥပဒေအရ မိမိ၏အိမ်အကူအပေါ်ကျူးလွန်ခဲ့သောပြစ်မှုများထက် တစ်ဆခွဲပိုမြင့်သော ပြစ်ဒဏ်ကိုအမြင့်ဆုံးအပြစ်ဒဏ်အနေဖြင့် ချမှတ်ခံရနိုင်ချေရှိသည်။အိမ်အကူ၏ဖုန်းကို ဖျက်ဆီးခဲ့သောအမှုအတွက်ကိုမူ ထောင်ဒဏ်တစ်နှစ်ဖြစ်စေ၊ငွေဒဏ်ဖြစ်စေ၊ဒဏ်နှစ်ရပ်လုံးဖြစ်စေချမှတ်ခံရနိုင်ကြောင်းသိရှိရသည်။
Source – CNA