၂၀၂၂ ခုနှစ် မေလတွင် တက္ကသိုလ်များ၊သင်တန်းများအားလုံး ပြန်လည်ဖွင့်လှစ်သွားမည်

၂၀၂၂ ခုနှစ် မေလတွင် တက္ကသိုလ်များ၊သင်တန်းများအားလုံး ပြန်လည်ဖွင့်လှစ်သွားမည်

ကိုဗစ်ကြောင့် ယာယီပိတ်ထားသည့် တက္ကသိုလ်များကို ပြီးခဲ့သည့်နှစ်မေ ၅ ရက်မှစတင်၍ နောက်ဆုံးနှစ် မဟာဘွဲ့၊ ပါရဂူဘွဲ့၊ ဘွဲ့လွန်ဒီပလိုမာဘွဲ့သင်တန်းများ ဖွင့်လှစ်ခဲ့ကာ အဆင့်မြင့်တန်းများနှင့် အဝေးသင်သင်တန်းများကိုလည်း ဖွင့်လှစ်ခဲ့သည်။

ယခုဆက်၍ ကျန်ရှိသည့် တက္ကသိုလ်များ၊သင်တန်းများအားလုံးကို မေလလယ်မှစ၍ အားလုံးပုံမှန်အတိုင်းပြန်လည် ဖွင့်လှစ်သွားမည်ဖြစ်သည်ဟု နစကဥက္ကဋ္ဌ၏ မတ်လ၂၉ ရက်နှင့် မတ်လ ၃၀ရက် အစည်းအဝေးများအရသိရသည်။

ယင်းသို့ဖွင့်လှစ်ချိန်တွင် ၂၀၁၉ ပညာသင်နှစ်တွင် ၂၀၂၀ တက္ကသိုလ်ဝင် တန်းအောင်မြင်ခဲ့သည့် ကျောင်းသား၊ကျောင်းသူများအားလုံး တက်ရောက် ကြရမည်ဟု နစကဥက္ကဋ္ဌက ပြောကြားသည်။

တက္ကသိုလ်တက်ရောက်မည့် ကျောင်းသား၊ကျောင်းသူများအား ကျောင်းမတက်ရန် ခြိမ်းခြောက်မှုမျိုးစုံရှိလာနိုင်သဖြင့် တာဝန်ရှိသူများအနေဖြင့် လုံခြုံရေးကိစ္စရပ်များ ဆောင်ရွက်ပေးနိုင်ရေး ကြိုတင်ပြင်ဆင်စီမံဆောင်ရွက်ထားရှိရန် လိုကြောင်းလည်းမှာကြားခဲ့သည်။

ပညာရေးဝန်ကြီးဌာနက တက္ကသိုလ်များ၊ ဒီဂရီကောလိပ်များအားလုံး အတန်းစုံ ကျောင်းပြန် ဖွင့်လှစ်မှုအား မေလ ၁၂ ရက်ဟု သတ်မှတ်ထားသည်။

ထိုသို့ဖွင့်လှစ်နိုင်ရေး ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာ ညွန့်ဖေသည် ပညာရေးဝန်ကြီးဌာန အဆင့်မြင့်ပညာဦးစီးဌာနရှိ တက္ကသိုလ်ပါမောက္ခချုပ် များ၊ ဆရာအတတ် ပညာဦးစီးဌာနရှိ ပညာရေးဒီဂရီ ကောလိပ် ကျောင်းအုပ်ကြီးများ၊ အခြေခံပညာဦးစီး ဌာနရှိ တိုင်းဒေသကြီး/ပြည်နယ် ပညာရေးမှူးများနှင့် တွေ့ဆုံပွဲကို ယခုရက်ထဲမှာပင်ကျင်းပခဲ့ကြသည်။

၂၀၂၀ ပြည့်နှစ် တက္ကသိုလ်ဝင်တန်းအောင် ကျောင်းသား ကျောင်းသူများ၏ ပထမနှစ် သင်တန်း များကိုပါ မေ ၁၂ ရက်တွင် ဖွင့်လှစ်သွား မည်ဖြစ်ကြောင်း၊ ဝင်ခွင့်ရတက္ကသိုလ်များ စာရင်းကို သက်ဆိုင်ရာတက္ကသိုလ်အသီးသီးတွင် ဧပြီ ၁ ရက်၌ ကြေညာသွားမည်ဖြစ်ကာ၊ အဝေးသင်တက္ကသိုလ် သင်တန်းများသည် စက်တင်ဘာလနှင့် အောက်တိုဘာလတို့တွင် အနီးကပ်သင်တန်း တက်ရောက် ဖြေဆိုကြ မည်ဖြစ်သည်။

နိုဝင်ဘာလတွင် စာသင်နှစ်ဝက်အသစ်အတွက် တက္ကသိုလ်အတန်း များကို ပြန်လည်ဖွင့်လှစ်မည်ဖြစ်ပြီး ၂၀၂၂ ခုနှစ် တက္ကသိုလ်ဝင်တန်းအောင် ကျောင်းသား ကျောင်းသူ များလည်း တက်ရောက်ကာ ပုံမှန်စာသင်နှစ်ဖြင့် ဖွင့်လှစ်သင်ကြားပေးနိုင်ရန် စီစဉ်ထားသည်ဟု ပညာရေးဝန်ကြီးဌာနမှသိရသည်။