ရန်ကုန်၊ ဩဂုတ် ၁၇
AFC Women’s Champions League 2026/27 Preliminary Stage Group (F) ပြိုင်ပွဲတွင် မြန်မာနိုင်ငံ၏ဂုဏ်ကိုဆောင်နိုင်ရန် အစွမ်းကုန်ယှဉ်ပြိုင်သွားမည်ဖြစ်ကြောင်း ဧရာဝတီအက်ဖ်စီ အမျိုးသမီးအသင်းနည်းပြချုပ် Kumiko Tashiro က ပြောသည်။
ဩဂုတ် ၁၆ ရက် မွန်းလွဲပိုင်းက သုဝဏ္ဏအားကစားကွင်း၌ ပြုလုပ်သည့် ပြိုင်ပွဲအကြို သတင်းစာရှင်းလင်းပွဲတွင် နည်းပြချုပ် Kumiko Tashiro က ပြောကြားခဲ့ခြင်းဖြစ်သည်။
“ဒီပွဲမှာ အနိုင်ရဖို့အတွက် အကောင်းဆုံးပြင်ဆင်ထားပါတယ်။ အသင်းတိုင်းကလည်း အနိုင်ရဖို့ ပြင်ဆင်လာကြတာဖြစ်တဲ့အတွက် လွယ်ကူတဲ့ပွဲတော့ မဟုတ်ပါဘူး။ ဒါပေမဲ့ ကျွန်မတို့အသင်း အနိုင်ရဖို့ ပြင်ဆင်ထားတာတွေကို ကွင်းအတွင်း အကောင်းဆုံးပြသသွားမှာဖြစ်သလို မြန်မာနိုင်ငံရဲ့ဂုဏ်ကိုဆောင်နိုင်ဖို့လည်း အစွမ်းကုန်ယှဉ်ပြိုင်သွားပါမယ်” ဟု ၎င်းက ပြောသည်။
ဧရာဝတီအက်ဖ်စီ အမျိုးသမီးအသင်းခေါင်းဆောင် နော်ထက်ထက်ဝေကလည်း အိမ်ကွင်းတွင် ယှဉ်ပြိုင်ရမည့် အခွင့်အရေးကို အကောင်းဆုံးအသုံးချသွားမည်ဖြစ်ပြီး ပြိုင်ပွဲအတွက် အစစအရာရာ အပြည့်အဝပြင်ဆင်ထားကြောင်း ပြောသည်။
“ဒီပွဲကို အိမ်ကွင်းကစားရမှာဖြစ်တာကြောင့် အခွင့်အရေးကို အကောင်းဆုံးအသုံးချသွားမှာပါ။ အစစအရာရာ အပြည့်အဝပြင်ဆင်ထားတာဖြစ်တဲ့အတွက် အကောင်းဆုံးပွဲကောင်းတစ်ခုဖြစ်အောင် အစွမ်းကုန်ကြိုးစားသွားပါမယ်” ဟု နော်ထက်ထက်ဝေက ပြောသည်။
ပွဲကြိုသတင်းစာရှင်းလင်းပွဲတွင် FC Jurong၊ NO Limits နှင့် New Taipei Hang Yuan FC အသင်းတို့မှ နည်းပြချုပ်များနှင့် အသင်းခေါင်းဆောင်များကလည်း ပြိုင်ပွဲအတွက် ပြင်ဆင်ထားမှုများကို အသီးသီး ရှင်းလင်းပြောကြားခဲ့ကြသည်။
ဧရာဝတီအက်ဖ်စီ အမျိုးသမီးအသင်းသည် ယနေ့ ဩဂုတ် ၁၇ ရက် ညနေ ၄ နာရီတွင် သုဝဏ္ဏဘောလုံးကွင်း၌ FC Jurong အသင်းနှင့် AFC Women’s Champions League 2026/27 Preliminary Stage Group (F) အဖွင့်ပွဲအဖြစ် ယှဉ်ပြိုင်ကစားမည်ဖြစ်သည်။