ပေကျင်း၊ ဩဂုတ် ၁၆
ကမ္ဘာကြီးပူနွေးလာမှုနှင့်အတူ ပြင်းထန်ရာသီဥတုဖြစ်စဉ်များ ပိုမိုများပြားလာနေသဖြင့် သဘာဝဘေးအန္တရာယ် ကြိုတင်ကာကွယ်ရေး၊ ဘေးဒဏ်လျှော့ချရေးနှင့် အရေးပေါ်တုံ့ပြန်ရေးဆိုင်ရာ နိုင်ငံ၏စွမ်းဆောင်ရည်ကို စဉ်ဆက်မပြတ်မြှင့်တင်ရန် တရုတ်သမ္မတ ရှီကျင့်ဖျင်က တိုက်တွန်းပြောကြားခဲ့သည်။
တရုတ်ကွန်မြူနစ်ပါတီ၏ အဓိကသဘောတရားရေးရာဂျာနယ် Qiushi တွင် ဩဂုတ် ၁၅ ရက်က ဖော်ပြခဲ့သည့် ရှီ၏ပြောကြားချက်များတွင် မိုးသည်းထန်စွာရွာသွန်းမှု၊ ရေကြီးရေလျှံမှု၊ တိုက်ဖွန်းမုန်တိုင်းနှင့် မိုးခေါင်ရေရှားမှုကဲ့သို့သော ပြင်းထန်ရာသီဥတုဖြစ်စဉ်များ သိသိသာသာ များပြားလာပြီး ဘေးအန္တရာယ်များ၏ အဖျ-က်စွမ်းအားလည်း ပိုမိုပြင်းထန်လာနေကြောင်း ထောက်ပြထားသည်။
ထို့ကြောင့် ဘေးအန္တရာယ်မဖြစ်ပွားမီ ကြိုတင်ကာကွယ်ရေးကို ဦးစားပေးကာ ဘေးအန္တရာယ်စောင့်ကြည့်ခြင်းနှင့် ကြိုတင်သတိပေးစနစ်များ ပိုမိုအားကောင်းစေရန်၊ အထူးသဖြင့် တရုတ်နိုင်ငံမြောက်ပိုင်းရှိ ရေကြီးရေလျှံမှုထိန်းချုပ်ရေးနှင့် ရေနုတ်မြောင်းအခြေခံအဆောက်အအုံများ၏ အားနည်းချက်များကို ဖြည့်ဆည်းရန် ရှီက တိုက်တွန်းခဲ့သည်။
ယခုနှစ်အတွင်း တရုတ်နိုင်ငံ၌ ပြင်းထန်သည့် တိုက်ဖွန်းမုန်တိုင်းများနှင့် မိုးသည်းထန်စွာရွာသွန်းမှုများ ကြုံတွေ့ခဲ့ရသည့်အပြင် ဇူလိုင်လအတွင်း ကန်စုပြည်နယ်၌ ရုတ်တရက်ရေကြီးမှုနှင့် မြေပြိုမှုကြောင့် လူ ၂၅ ဦး ေ-သဆုံးခဲ့ပြီး ချုံချင့်ဒေသတွင် မြေပြိုမှုကြောင့် လူ ၅၁ ဦး ေ-သဆုံးခဲ့ကြောင်း သိရသည်။
သဘာဝဘေးအန္တရာယ်များကြောင့် စီးပွားရေး၊ စွမ်းအင်၊ စားနပ်ရိက္ခာနှင့် လူမှုဖူလုံရေးကဏ္ဍများအပေါ် ထိခိုက်မှုမရှိစေရေး ကြိုတင်ပြင်ဆင်ထားရန်လည်း ရှီက အလေးထားပြောကြားခဲ့သည်။ ထို့ပြင် ဘေးအန္တရာယ်စောင့်ကြည့်ခြင်းနှင့် ကယ်ဆယ်ရေးလုပ်ငန်းများတွင် ဉာဏ်ရည်တု (AI)၊ ဒရုန်းနှင့် ဂြိုဟ်တုအဝေးထိန်းအာရုံခံနည်းပညာများကို ပိုမိုအသုံးချရန် တိုက်တွန်းခဲ့သည်။
တရုတ်နိုင်ငံအနေဖြင့် သဘာဝဘေးအန္တရာယ်အမျိုးမျိုးကို ကြိုတင်ကာကွယ်ခြင်းနှင့် တုံ့ပြန်ခြင်းဆိုင်ရာ စွမ်းဆောင်ရည်ကို ဆက်လက်မြှင့်တင်ကာ ပြည်သူများ၏ အသက်အိုးအိမ်စည်းစိမ်နှင့် လူမှုတည်ငြိမ်ရေးကို ထိရောက်စွာ ကာကွယ်စောင့်ရှောက်သွားရမည်ဟု ရှီက ပြောကြားခဲ့သည်။
Ref: The Straits Times